जनता सामुदायिक वनके १३औं वार्षिक साधारणसभा

पहुरा समाचारदाता
पहलमानपुर, १७ पुस । कैलाली जिल्लाके घोडाघोडी नगरपालिका–१२ नकफोरुवामे रहल जनता सामुदायिक वन उपभोक्ता समूहके १३औं वार्षिक साधारणसभा तथा सार्वजनिक सुनवाई कार्यक्रम विफेक रोज सम्पन्न हुइल बा ।

उ सामुदायिक वनके अध्यक्ष कृष्णबहादुर चौधरीके घरगोसियामे हुइल कार्यक्रमके वरका पहुना घोडाघोडी –१२ के वडाध्यक्ष राम दुलारे चौधरी रहल रहिट । कार्यक्रममे सम्बोधन करटी उहाँ संरक्षणसँगे सदुपयोग मजासे करेपर्नामे जोड डेहल रहिट ।
खास पहुना सबडिभिजन वन कार्यालय पचमुडियाके वनरक्षक खुम लाल चौधरी बनुवा आपन सम्पत्ति रहल बटैलै । नोक्सानी कर्लेसे अपनही सखाप हुइना कहलै ।

कार्यक्रममे गाउँ भल्मन्सा हरिप्रसाद चौधरी मन्तव्य राखल रहिट । बनुवाके हिसाब वन समिति कार्यालयमे आके खोजे परल कहलै । घोराही समूहके सचिव बन्दना चौधरी चुनौतीसे हार नैमान्के बरु सामना करे सिखेपर्ना बटैली ।
२९ लाख ७३ हजार १८ रुप्या बराबरक वनुक आय व्यय विवरण समूहके सचिव रामकुमारी चौधरीे सुनाइल रही । कार्यक्रम सञ्चालन राष्ट्रिय मावि के प्रधानाध्यापक प्रागीलालसे हुइल रहे ।