नुक्लिपुर सामुदायिक होमस्टेसे २७ जाने गुरुवा व भल्मन्सन सम्मान

पहुरा समाचारदाता
धनगढी, २२ पुस । कैलाली जिल्लाके गौरीगंगा नगरपालिका वडा नम्बर १० मे रलक नुक्लिपुर सामुदायिक होमस्टेसे २७ जान गुरुवा व भल्मन्साहन सम्मान कैगिल बा ।

थारु समुदायका गुरुवा व भल्मन्साहुँक्रे निश्वार्थ भावना लेके समाज सेवा कैटी रलक वरसे वहाँहुँक्रनके मनोवल बह्राइक लाग वडा नम्बर १० मे रलक ७ भल्मन्सा व २० जाने गुरुवा कैके २७ जाहनहे सम्मान कैलक नुक्लिपुर सामुदायिक होमस्टेके अध्यक्ष दिनेश दहित जनैलै ।

गौरीगंगा नगरपालिका वडा नम्बर १० के वडाध्यक्ष नरसिंह सार्कीके प्रमुख आतिथ्यतामे हुइलमे हुइल कार्यक्रममे गुरुवा व भल्मन्साहुँक्रनहन सम्मान कैगिल रहे । वडा अध्यक्ष सार्की होमस्टेक यी अभियान मजा रलक कहटी थारु समुदायके यी प्रथा परम्पराहे सरक्षण ओ सम्बद्र्धनके लाग गुरुवा व भल्मन्सहे प्रोत्साहन कैना जरुरी रहल बटैलै । भल्मन्सा व गुरुवाहे प्रमुख अथितिलगायतसे एक÷एक ठो टोपी, गम्छा फुल माला लगाके सम्मान करल रहे ।

कार्यक्रममे पूर्व वडा सदस्य गौरीलाल चौधरी, दाङके पत्रकार सहित्यकार शिवहरी चौधरीके सहभागिता रहे । होमस्टेके अध्यक्ष दिनेश दहितके अध्यक्षतामे हुइलक कार्यक्रममे थारु देउथान उदासीपुरहे ठप व्यवस्थापन कैसिक करे सेक्ना कना बिषयमे छलफल करल रहे । कार्यक्रमके संचालन हिंगु राम चौधरी करल रहिट ।