कैलारीमे सडक दुर्घटना न्युनिकरण कैना ट्राफिक नियम सम्बन्धी सचेतना कार्यक्रम

पहुरा समाचारदाता
धनगढी, २५ पुस । कैलाली जिल्लाके कैलारी गाँपालिकामे सडक दुर्घटना न्यूनिकरण करेक लाग एक दिने ट्राफिक नियम ओ यी सम्बन्धी रहल कानूनी व्यवस्थाबारे सचेतना कार्यक्रम कैगिल बा ।

कैलारी गाउँपालिका महिला बालबालिका तथा जेष्ठ नागरिक शाखाके आयोजनामे हुइल कार्यक्रम गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल रहे । कार्यक्रममे उहाँ ट्राफिक सम्बन्धी ज्ञान नैहुइल कारण सडक दुर्घटना बह्रटी रहल बटैली । ट्राफिक नियम एक ठो व्यक्तिसे लेके छोट गाडी, भारी गाडी सक्कु जनहनमे लागु हुइना हो, उपाध्यक्ष कहली, ट्राफिक ज्ञान ओ नियमबारे पत्ता नैहुके ढेर जैसिन दुर्घटना बह्रटी गैल बा । ट्राफिक ज्ञान हुइलेसे सडक दुर्घटना न्युनिकरण करेसेक्जाई ।

उहाँ युवाहुकनहे ट्राफिक नियम ओ कानूनी व्यवस्थाबारे जानकारी लेके अपन गाउँ ठाउमे सिखैना आग्रह करली । सडक दुर्घटनाके कारण मृत्यु हुइना ओ अंगभंग हुके अपाङता समेट हुइटी रहलफे उहाँ बटैली ।

कार्यक्रममे सहजीकरण हसुलिया ट्राफिक प्रहरी पोष्टके जवान अनिल रावल ओ कैलारी गाउँपालिका महिला बालबालिका तथा जेष्ठ नागरिक शाखाके प्रमुख बालकुमारी चौधरी करल रहिट ।

कैलारी गाउँपालिकाके सामाजिक विकास समितिके संयोजक सन्तराम चौधरीके अध्यक्षतामे हुइल कार्यक्रममे ९ वडाके युवा क्लवसे ३५ जाने युवा, सवारी चालकहुकनके सहभागिता रहे ।