मजगाउँमे माघ महोत्सव हुइना
पहुरा समाचारदाता
धनगढी, २६ पुस । थारू समुदायके हेरैटी गैल लोककला, रिती संस्कृति, संरक्षण सम्र्बद्धन तथा पहिचान बचाइक लाग मजगाउँमे गोदावरी नगरस्तरीय थारु माघ महोत्सव २०८२ हुइना हुइल बा ।
‘संस्कृति संरक्षण, स्थानीय पर्यटन ओ आधुनिक कृषि प्रर्वद्धनके लाग एकजुट हुइ’ कना मुल नाराके साथ गोदावरी नगरपालिका वडा नम्बर ८ मजगाउँमे तीनदिने माघ महोत्सव आयोजना हुइना हुइल हो । शनिच्चरके रोज पत्रकार सम्मेलन मार्फत महोत्सव आयोजनाबारे जानकारी कराइल हो ।
थारू कल्याणकारिणी सभा गोदावरी नगर समिति, बरघर भलमन्सा नगरसमिति, मजगाउँ थारु सामुदायिक होमस्टे ओ न्यू खुँटिया चारपाटे युवा क्लबके आयोजनामे महोत्सव हुइ लागल जनाइल बा ।
महोत्सव माघ १२, १३ र १४ गते आयोजना करे लागल थारु कल्याण कारिणी सभा गोदावरी नगर अध्यक्ष जनकलाल चौधरी बटैलै । उहाँ थारू समुदायके लोककला, रितीसंस्कृति, गीतबास, रितीरिवाज, चालचलन बोलीभाषा संरक्षण सम्बद्धनके लाग महोत्सव आयोजना करे लागल बटैलै ।
‘थारू समुदायके पहिचानसँग जोरल लोककला, रितीसंस्कृति, गीतबास, रितीरिवाज, चालचलन, बोलीभाषा, लवाई खवाई दिनप्रति दिन हेरैटी गैल बा, उहीहे संरक्षण सम्वद्र्धनके लाग महोत्सव आयोजना करे लागल बाटी’,उहाँ कहलै ।
थाकसके केन्द्रिय पार्षद माधव चौधरी थारू समुदायके संस्कृति संरक्षण तथा ऐतिहासिक बस्तु जगेर्ना कैना उद्देश्य सहित महोत्सव आयोजना करे लागल बटैलै । यकर साथ उहाँ स्थानीय पर्यटन, आधुनिक कृषि प्रवर्धन ओ पर्यावरण संरक्षणके लाग फेन महोत्सव आयोजना करे लागल बटैलै ।
उहाँ कहलै,‘थारू समुदाय लोककला, रितीसंस्कृति ओ ऐतिहासिक बस्तुके जगेर्ना ओ स्थानीय पर्यटन तथा आधुनिक कृषि प्रर्वद्धनके लाग महोत्सवके आयोजना करे लागल बाटी । इहीसे समाजके लाग सकारत्मक भूमिका खेल्ना बा ।’
गोदावरी नगरपालिका वडा नम्बर ८ के कार्यवाहक अध्यक्ष हरिराम चौधरी महोत्वसवसे लोककला भाषा संस्कृति संरक्षणके साथे आर्थिक सामाजिक, राजनीतिक चेतना स्तर बह्रल बटाइल रहिट ।
महोत्सवमे स्थानीय भाँकी प्रदर्शनके साथे थारू राष्ट्रिय कलाकारनके बेजोड प्रस्तुति रहना बा । महोत्सवमे ऐतिहासिक थारू खानपानके व्यवस्था, थारू कला संस्कृतिके जगेर्ना सम्बन्धी विविध कार्यक्रम, थारू समाज सेवा तथा प्रतिभावान व्यक्तिहे सम्मान, हिरोल्ना, चर्खा तथा अन्य रमाइलो मेला प्रदर्शन हुइना आयोजक जनैले बा ।
महोत्सवमे परिवर्तनके लाग युवा समूह (याक नेपाल) धनगढीसे स्थानीउ थारु खानपान, भेषभूषा, भाषा, कला, सीप तथा पर्यावरण संरक्षण, स्थानीय पर्यटन तथा आधुनिक कृषि पवद्र्धन कैना ओ स्थानीय स्तरमे उत्पादित पोषणयुक्त रैथाने खानपान पवद्र्धन कैना तथा आधुनिक कृषि तता जलवायुमैत्री प्रविधिके प्रवद्र्धन कैना रहल बा ।
महोत्सवके मुख्य हस्पिटल पार्टनरमे निसर्ग हस्पिटल एण्ड रिसर्च सेन्टर, हस्पिटल पार्टनरके रुपमे कैलाली हस्पिटल, संजिवी हस्पिटल, नवजीवन हस्पिटल, नोभा हस्पिटल, पद्मा हस्पिटल रहल बा कलेसे स्कूल पार्टनरके रुपमे चैतन्य पाठशाला रहल बा ।
पत्रकार सम्मेलनमे थारु कल्याण कारिणी सभा गोदावरी नगरके कोषाध्यक्ष्ँ शोभा चौधरी, मजगाउँ थारु सामुदायिक होमस्टेके अध्यक्ष कल्पना चौधरी, बरघर भलमन्सा गोदावरी नगर समितिके रन्जिता चौधरी, न्यू खुटिया चारपाते युवा क्लबके अध्यक्ष अनुप चौधरी लगायत रहल रहिट ।
