नाष्टसे पाइलट टीकाहे सम्मान
पहुरा समाचारदाता
धनगढी, २९ पुस । थारू समुदायसे पहिल महिला पाइलट बन्न सफल कैलालीके टीका चौधरीहे मंगरके रोज धनगढीमे सम्मान कैगिल बा ।
नाष्ट कलेज धनगढी चौधरीहे सम्मान करल हो । नाष्ट कलेजके प्राचार्य शिवहरी मुडभरी टीकाहे ओ ओहकान बाबा मानबहादुर चौधरीहे दोसल्ला ओह्राके सम्मानपत्र सहित सम्मान करल रहिट । टीका नाष्ट कलेजके पूर्व विद्यार्थी हुइटी । उहाँ नाष्ट कलेजमे विज्ञान ओर २०७८ मे भर्ना होके २०८० मे पासआउट हुइल रही ।
धनगढी उपमहानगरपालिका–१३, कैलाली गाउँके २१ वर्षीया चौधरी दक्षिण अफ्रिकासे प्राइभेट पाइलटके लाइसेन्स प्राप्त करले बटी । मने पाइलट तालिम पूरा करेक लाग उहाँ अभिन एक सय घण्टाके एकल उडान बाँकी रहल बा ।
अपने पाइलट तालिम पूरा कैना अभिन छ महिनासम लागे सेक्ना चौधरी बटैली । विदामे आइल उहाँ पाइलट तालिम गाह्रो रना करल उल्लेख करटी अपने हिम्मत, संघर्ष करके तालिम पूरा कैना क्रममे रहल उल्लेख करली । थारू समुदायसे टीका चौधरी पाइलट बन्न सिंगो समुदायके लाग गर्वके विषय रहल प्राचार्य मुडभरी बटैलै । ओस्टके अपने विद्यार्थीहे सम्मान करे पाइलमे उहाँ आपनहे गर्व महसुस हुइल फेन बटाइल रहिट ।
कार्यक्रम नाष्टके प्राध्यापक दुर्गा दत्त भट्टके घरगोसियाइमे हुइल रहे । कार्यक्रममे प्राध्यापक डा. प्रेम बहादुर चन्द, प्राध्यापक हरिदत्त पन्त लगायत मनतब्य राखल रहिट ।
