थारु समुदायमे भुरा खेल सुरु
गाउँ गाउँमे धमाधाम भल्मन्सा छानजैटी
पहुरा समाचारदाता
धनगढी, २ माघ । थारु समुदायमे माघ २ गतेसे भुरा खेल सुरु हुइल बा । भुरा खेलसे गाउँ गाउँमे धमाधाम लौव नेतृत्व छनौटके कैजैटी रहल बा । माघ २ गतेसे सुरुवाट हुइट भुरा खेल, खोज्नीबोज्नी, माघी डेवानीसे ढेर थारु गाउँमे लौवा नेतृत्व छनौट कैगिल बा ।
जाई गाउँक भल्मन्सामे कुलविर चौधरी
धनगढी उपमहानगरपालिका वडा नम्बर ५ जाई गाउँक भुरा खेल अनुभवी भल्मन्सा कुलविर चौधरीहे फेरसे भल्मन्सा बनागिल बा । उहाँक गाउँमे समाज सेवा कैटी अइलक आठ बरस पुगल बा । गाउँक चौकीदारमे सन्तराम चौधरी, गुरुवामे दलबहादुर दहित ओ सचिवमे राम प्रसाद दहित छनौट हुइल बटै ।
गाउँक भुरा खेलसे भल्मन्साहे बार्षिक रुपमे पारिश्रामिक ३२ हजार, चौकीदारहे ३० हजार, गुरुवाहे २२ हजार ओ केसौकाहे २० हजार पारिश्रामिक डेना निर्णय हुइल सचिव राम प्रसाद चौधरी बटैलै । ओस्टेक करके गाउँक भुरा खेलसे महत्वपूर्ण निर्णय थारु समुदायके परम्परागत भोज करुइयाहे दुई लाख रुप्या डेना निर्णय करल बा । दुल्हक घरहे १ लाख ओ दुल्हीक घरहे एक लाख डेना निर्णय करल उहाँ बटैलै । ओस्टेक करके गाउँक केसौका छनौटके लाग गुरुवा तालिम करैना निर्णयफे हुइल उहाँ बटैलै । जाई गाउँमे १८८ घरधुरी बा । कलेसे भल्मन्सा, चौकीदार, गुरुवाहे टिहाई डेहक लाग घरौरा ८४० रुप्या उठैना निर्णयफे कैगिल बा ।
कञ्चनपुरके शुक्लाफाँटा नगरपालिका वडा नं. ८ बेल्डाँडी गाउँक भल्मन्सामे हरपाल चौधरी
कञ्चनपुरके शुक्लाफाँटा नगरपालिका वडा नं. ८ बेल्डाँडी गाउँक माघी डेवानी कार्यक्रमसे भल्मन्सामे हरपाल चौधरी निर्वाचित हुइल बटै । गाउँक माघी डेवानीसे उहाँक लगायत कार्यसमितिहे सर्वसहमतिसे छानगिलक हो । ओस्टेक करके सह भल्मन्सा धन बहादुर चौधरी, केसौका गंगाराम चौधरी, गुरुवा जग्गु चौधरीहे छानगिल हो ।
बेल्डाँडी गाउँमे ७७ घरधुरी रहल ओ घरौरा २७ किलो धान उठैना टिहाई उठाके ओम्नेसे भल्मन्सा,उपभल्मन्सा, गुरुवा, ओ केशौकाहे डेना निर्णय हुइल गाउँक बुद्धिजीवि चन्द्र चौधरी जनैलै । माघी डेवानीसे भल्मन्सा, उपभल्मन्सा, गुरुवाहे यी बरस निरन्तरता डेहल हो कलेसे केसौका भर लौवा चुनल हो ।
माघी डेवानीसे स्थानीय सरकारसे योजना माग कैना, डगर बनैना, भल्मन्सा घर बनैना, सामाजिक कार्य सबजे मिल्के कैना, लौवा नेतृत्वहे भल्मन्सा एक बर्षके मान्यता डेना, थारु चलन अनुसार भोज विहा कैना, स्थानीय सरकारसे ल्यन्ना भल्मन्सा ऐनमे जटरा रहलेसेफे गाउँमे भर भल्मन्साहुकनके कार्यकाल एक बर्ष मन्ना निर्णय सर्वसहमतिसे पास कैलक उहाँ बटैै ।
फकलपुरके भल्मन्सामे यमबहादुर चौधरी
कैलाली जिल्ला गोदावरी न.पा.८ फकलपुरमे माघ २ गते गाउँक बखेरी (खोज्नी बोज्नी)से निम्नानुसार भल्मन्सा ओर्गान ओ भल्मन्सा सहयोगी सर्बसम्मत चयन कैगिल बा ।
जेम्ने भल्मन्सामे यमबहादुर चौधरी, ओर्गान गोपीलाल चौधरी भल्मन्सा सहयोगीमे भागीराम चौधरी, छबिलाल चौधरी, लालबहादुर चौधरी, धनलाल चौधरी, फुलाराम चौधरी रहल बटै । गाउँक बखेरी (खोज्नी बोज्नी)से निम्नानुसार टिहाई (बाली) भल्मन्सा १५ किलो, ओर्गान १५ किलो ज्याला निर्धारण कर्ना निर्णय करल बा ।
बैठकमे अनुस्थिति हुउइयन प्रति बैठक ५० रुप्या बर बेगारीमे अनुस्थिति हुउइयन प्रति बेगारी रु. पाँच सय जरिवाना निर्धारण हुइल बा ।
गाउँक बखेरी (खोज्नी बोज्नी)से गाउँघर सडक सरसफाई कर्ना, सडक बिजुली जडान कर्ना ओ चौक, सडक नामाकरण साइनबोर्ड ब्यस्थापन कर्ना, गाउँ सुधारके कार्यमे सक्कु गाउँक मनै एकताबद्ध रना निर्णय करल फकलपुरके स्थानीय तथा थारु वुद्धिजीवि माघव थारु जानकारी डेलै ।
जब्डह्वा गाउँक भल्मन्सामे ठग्गु चौधरी
कैलाली जिल्ला कैलारी गाउँपालिका वार्ड नम्बर ५ जब्डह्वा गाउँके भुरा खेलसे लौवा नेतृत्व चयन करल बा । भुरा खेलसे भल्मन्सामे ठग्गु चौघरी, सचिवमे दिपक चौघरी, अघारीमे मिलाराम चौघरीहे सहमतिसे चुनल हो ।
