मजगैंमे माघ विशेष साँस्कृतिक कार्यक्रम

पहुरा समाचारदाता
धनगढी, ४ माघ । कन्चनपुरके कृष्णपुर ८ मजगैं गाउँमे माघ विशेष साँस्कृतिक कार्यक्रम हुइल बा । कार्यक्रम ८ नम्बर भलमन्सा समितिके आयोजना ओ कृष्णपुर नगरपालिका वडा नम्बर ८ के आर्थिक सहयोगमे हुइल रहे ।

कार्यक्रममे प्रमुख अतिथि कृष्णपुर नगरपालिकाके नगरप्रमुख हेमराज ओझा रहिंट । उहाँ थारु समुदायके बहुट मेरके संस्कृति रहल बटैलैं । उहाँ कहलैं, ुथारु समुदायमे पाछेक समयमे थारु युबा हुँके संस्कृति बचैनामे जोरसे लागल बटैं । आझ जस्टके इ साँस्कृतिक कार्यक्रम हुइटा ओस्टके थारु जातीनके कला, संस्कृति, भासा, चालचलन बचाइ सेक्लेसे बरसौं बरससम थारु समुदायके इतिहास जोग्ना बटैलैं ।

कार्यक्रमके विशिष्ट अतिथि उपनगरप्रमुख द्रोपती राना रहिंट । उहाँ कार्यक्रमके सफलताके कामना करटी, माघ हमार थारुनके प्रमुख टिहुवार हो इहे थारु समुदायके पहिचान रहल बटैलैं । उहाँ कहलैं, ुहरेक जातजातिनके अपन अपन मौलिक संस्कृतिहे लावा अइना पुस्टाहे हस्तान्तरण करे सेक्लेसे किल संस्कृति बचाइ सेक्ना बटैलैं । इ माघ टिहुवार हमार थारु समुदायके किल नैहोके सक्कु समुदायके साझ टिहुवार रहल बटैलैं ।ु

ओस्टेके ८ नम्बर वडा अध्यक्ष दिनेश खड्का इ मेरके साँस्कृतिक कार्यक्रम कैना मजा बात हो बटैलैं । उहाँ कहलैं, ुअइसिन कार्यक्रम निरन्तर करे सेक्लेसे समाजमे एकता फेन लानठ, ओहेमारे सक्कु जे अपन अपन भेसभुसा, संस्कार, संस्कृति फेन बचाइ परठ ।ु

माघ विशेष साँस्कृतिक कार्यक्रममे थारु समुदायके पहिल महिला पाइलट टीका चौधरी, खेलाडी, जोगेन्दर राना, प्रशान्त चौधरीहे दोसल्ला ओ सम्मानपत्रसे सम्मान फेन कैगैल रहे ।

इ कार्यक्रमहे आकुर राहरंगी कराइक लाग गायक दर्पण कुसुम्याँ, राजु चौधरी, ओ साहित्यकार सागर कुस्मीके विशेष प्रस्तुति फेन रहे । उहाँ लोग अपन अपन गीत, गजलसे मजगैं गाउँके कार्यक्रमहे चम्पन बनैले रहिंट ।

कार्यक्रमके सफलताके कामना करटी, थाकस कन्चनपुरके अध्यक्ष सुनिता चौधरी, वडा सदस्य, फुलराम चौधरी, समाजसेवी जयसिंह बिष्ट अपन अपन मन्तव्य डेले रहिंट ।

कार्यक्रममे मजगैं गाउँके ओ राजघाट गाउँके सखिया, झुमरा, मघौटा फेन डेखागैल रहे । अस्टेके मेरमेरिक भैयाबाबुनके थारु संस्कृति झल्कैना गीतमे कैयो मेरिक नाच फेंन डेखैले रहिंट । कार्यक्रममे, सक्कु टोलके भलमन्सन, गाउँक बुद्धिजीवी, अगुवा लगायत सहभागी हुइल रहिंट ।

मजगैंके भलमन्सा रामु कुस्मीके सभाअध्यक्षतामे हुइल कार्यक्रममे भरत डंगौरा ओ सुमित रत्गैंयाँ सहजीकरण कैले रहिंट ।