प्यारेलाल राना कैलाली क्षेत्र ५ से स्वतन्त्र उम्मेदवारी
पहुरा समाचारदाता
धनगढी, ६ माघ । संविधान सभा सदस्य हुसेकल कैलालीके धनगढी निवासी प्यारेलाल राना प्रतिनिधि सभा सदस्यमे स्वतन्त्र उम्मेदवारी दर्ता करैले बटै ।
लम्मा समय नेपाली कांग्रेससे राजनीति करल कुछ समयआघे नेपाली कांग्रेस पार्टी परित्याग करल उहाँ राना थारू समुदायके प्रतिनिधित्व करटी कैलाली क्षेत्र नम्बर ५ से स्वतन्त्र उम्मेदवारी दर्ता कराइल हुइट ।
मुख्य राजनीतिक दलहुक्रे यी बार राना थारू समुदायसे उम्मेदवार बनैले नैहुइट । निर्वाचन क्षेत्रमे २०७४ के निर्वाचनमे कांग्रेस नेतृ आरजु राणा देउवाहे पराजित करल नारदमुनि राना यी बार टिकट नैपैलै । रानाथारू समुदायसे एक जनहनहेफे दलहुक्रे अवसर नैडेहलपाछे प्यारेलाल चुनावी मैदानमे उटरल परल बटैलै । यी आघे उहाँ समानुपातिकसे संविधान सभा सदस्य रहिट ।
क्षेत्र नम्बर ५ मे नेकपा (एमाले) से यज्ञराज ढुङ्गानाहे उम्मेदवार बनाइल बा । ओस्टेक, कांग्रेससे नरनारायण शाह मनु, नेकपासे प्रेम आले, रेशमलाल चौधरी नेतृत्वके नागरिक उन्मुक्ति पार्टी नेपालसे जगन्नाथ चौधरी, राष्ट्रिय स्वतन्त्र पार्टीसे आनन्द चन्दहे उम्मेदवार बनाइल बा ।
