बैजपुर गाउँक भलमन्सामे ओम प्रकाश बौखाही
पहुरा समाचारदाता
धनगढी, ८ माघ । थारु बस्तीमे धमाधम लावा नेतृत्व चयन हुइटी रहल बा । माघक डोसर सकारसे भुरा खेल कैटी धमाधाम गाउँक लावा नेतृत्व चयन हुइटी रहल हो ।
इहे बिच कैलारी गाउँपालिका वडा नम्बर ५ बैजपुर गाउँके फेन लावा नेतृत्व चयन करगिल बा । गाउँक भुरा खेलसे भल्मन्सामे ओम प्रकाश बौखाही, अघरियामे काली चरण चौधरी ओ सचिवमे राम कुमार चौधरी चयन हुईल बटै ।
ओस्टके हरेक पुर्वाके लाग एकठो अघरिया फेन चुनल जनाइल बा । सात पुर्वा रहल गाउँक १ से ७ समके पुर्वाके लाग क्रमश दिनेश चौधरी, प्रमिला चौधरी, आशा देवी चौधरी, सीता देवी चौधरी, राम कालू चौधरी, मान बहादुर ओ लक्ष्मी देवि चौधरीहे अघरियाके जिम्मेवारी सौँपल जनाइल बा ।
ओस्टके कैलारी गाउँपालिका वडा नम्बर ७ तिघरी गाउँके भुरा खेलसे फेन लावा नेतृत्व चयन करल बा । लावा भल्मन्सामे अर्जुन चौधरी ,अघरियामे सन्तुरिया चौधरी ओ सचिवमे दिलिप चौधरी चयन करल जनाइल बा ।
उहोँर शुक्लाफाँटा नगरपालिका वडा नम्बर ३ पिपलाडी कञ्चनपुर गाउँ समाजके खोज्नी बोज्नीसे बरघरियामे राजु दहित चयन हुइल बटै ।
