टिसरा स्वर्गिय पतिराम स्मृति कप सुरु
पहुरा समाचारदाता
धनगढी, ८ माघ । कैलाली जिल्लाके कैलारी गाउँपालिका वडा नम्बर ३ यौङ ब्वाइज क्लवके खेलकुद मैदानमे विफेक रोजसे टिसरा स्वर्गिय पतिराम स्मृति रनिङ फुटबल प्रतियोगिता सुरु हुइल बा ।
निम्हान गोतियार परिवार कैलारी–३ उत्तर भडरीके आयोजनामे प्रतियोगिताके उदघाटन कैलारी गाउँपालिकाके अध्यक्ष राजसमझ चौधरी करल रहिट । उदघाटन कार्यक्रममे सम्बोधन करटी उहाँ गायक स्वर्गिय पतिराम चौधरी यी पालिकाके एक गहनाके रुपमे बटैलै । उहाँक योगदानसे थारु भाषा, संस्कृति संरक्षणमे टेवा पुगल कहटी उहाँ सम्झनाहे सदैव जीवान्त राखेक लाग प्रत्येक बरस यी प्रतियोगिता जारी रख्ना आग्रह करलै । उहाँ कहलै, प्रतियोगिता जे आयोजना करलेसेफे हुईठ । मोर आपन व्यक्तिगत ओरसे प्रत्येक बरस २० हजार सहयोग करम । स्थानीय तहके ओरसे स्वर्गिय पतिरामके सम्झना ओ सम्मानमे कार्यपालिकासे ओरसे एक ठो डगर उहाँक नाउँमे नामाकरण करजाई ।
कार्यक्रमके विशिष्ट पहुना कैलारी गाउँपालिका वडा नम्बर४ के वडा अध्यक्ष ठागुराम चौधरी स्वर्गिय पतिराम चौधरी सस्कृतिके माध्यमसे कैलारीमे भारी योगदान पुगाइल चर्चा करलै । थारु समुदायके पहिचान गीतबाँस ओ संस्कृति हो उहाँ कहलै, स्वर्गिय पतिराम उ बेलासे सुरुवाट करल रहिट । जबसम रहनै टबसम योगदान करलै ।
कैलाली जिल्ला फुटवल संघके सदस्य मनिराम चौधरी गायक स्वर्गिय पतिराम चौधरी बहुआयमिक, समाजसेवी ओ संस्कृतिमे योगदान पुगल बटैलै।
कैलारी–३ भडरीके भल्मन्सा छोटेलाल चौधरी पहिले डिजिटल युग नैरहल ओरसे असरक डगर गीति एल्बममे निकारेक लाग भारत गैलबेला उहे उहाँक दुखद निधन हुइल बटैलै । उहाँ कहलै, गायक स्वर्गिय पतिराम चौधरी मोर लङगुटिया संघरीया रहिट । संगे खैना संगे सुटना, ओ थारु भाषा कला, संस्कृति जोगाइक लाग संगसँगे नेग्ना करिट उहाँक यी संसारसे गैलपाछे अपुरणिय क्षति पुगल बा । उहाँकमे अदभुत कला रहे ।
कार्यक्रममे योङ ब्वाइज क्लवके पूर्व सचिव लिखराम चौधरी स्वर्गिय पतिराम चौधरीके योगदान कबु विस्राई नैसेक्ना छाप बनल बटैलै । उहाँ कैलारी गाउँपालिकाके विभुतिके रुपमे रहल बटैलै ।
स्वर्गिय पतिराम चौधरीके बहिनीय बालिका चौधरी यी स्मृति कपहे निरन्तरता डेना जरुरी रहल बटैलै । कार्यक्रममे स्वागत तथा स्वर्गिय पतिराम चौधरीके जीवनीबारे थारु लेखक संघ कैलालीके सहसचिव दिनेश चौधरी डेहल रहिट । स्वर्गिय पतिराम चौधरीके जलम २०३४ साल कार्तिक २७ गते कैलारी गाउँपालिका ३ भडरीमे हुइल रहे । कलेसे उहाँ २०५८ साल पुस २५ गते भारतके मृत्यु हुइल रहे । उहाँक थारु भाषक पहिल गिति एल्बम माधे ओ डुसरा असरक डगर हो ।
कार्यक्रम स्वर्गिय पतिराम चौधरीके डाडा हरिराम चौधरीके अध्यक्षतामे हुइल रहे कलेसे संचालन गायक राजु चौधरी राज करल रहिट ।
संगीतमे मिठास खेलमे सहास यिहे हो यूवनके अभास, माधो, असरक डगरमे बा थारु गीतबाँसके पहिचान, भडरी कैलारीके गितकार स्वर्गिय पतिराम हुइट हमार शान कना मुल नाराके साथ हुइल प्रतियोगिताके मुख्य प्रयोजक कैलारी–१ हसुलिया निवासी हाल इजरायल बैठना विष्णु चौधरी ओ सहप्रयोजक कैलारी गाउँपालिकाको कार्यालय कैलाली रहल बा ।
प्रतियोगिताके प्रवद्र्धकमे कैलाली जिल्ला फुटवल संघ, सहकार्य योङ ब्वाइज क्लव, मुख्य व्यानर प्रायोजक एसएन एडभरटाइजिङ धनगढी, क्याम्पस रोड रहल बा । प्रतियोगितामे १३ ठो टिमके सहभागिता रहल बा । प्रतियोगिताके विजेता ४१ हजार ५ सय ओ उपविजेता २१ ह्जार ५ सय पैना आयोजक जनैले बा । उदघाटन खेल मोहना यूवा क्लव खोनपुर ओ पूर्णगिरी यूवा क्लव बसौटी विच हुइल रहे । उदघाटन कार्यक्रममे वडा नम्बर ३ के वडा अध्यक्ष सन्तराम चौधरी विशिष्ट पहुना रहिट ।
कार्यक्रममे किरण नेपालके अध्यक्ष अमृति चन्द्र चौधरी, योङ ब्वाइज क्लवके अध्यक्ष मुकेश बखरिया, इप्रका प्रमुख ऐनबहादुर पाललगागत स्वर्गिय पतिराम चौधरीके बाबा, बरापु, निम्हान गोतियार परिवारके सदस्यहुकनके सहभागिता रहे ।
