जिल्ला स्तरीय समन्वय तथा सल्लाहकार समितिके बैठक सम्पन्न

पहुरा समाचारदाता
धनगढी, ९ माघ । प्राकृतिक स्रोत द्वन्द्व रुपान्तरण केन्द्र नेपालके जिल्ला स्तरीय समन्वय तथा सल्लाहकार समितिके बैठक सम्पन्न हुइल बा ।

प्राकृतिक स्रोत द्वन्द्व रुपान्तरण केन्द्र नेपालके आयोजना तथा जिल्ला समन्वय समिति कैलालीके सहयोगमे जिल्ला स्तरीय समन्वय तथा सल्लाहकार समितिके बैठक सम्पन्न हुइल हो । जिल्ला समन्वय समितिके सभापति टीकाकुमारी चौधरी भुलके अध्यक्षतामे हुइल कार्यक्रममे प्राकृतिक स्रोत द्वन्द्व रुपान्तरण केन्द्र नेपालके पश्चिम क्षेत्रीय संयोजक बल्लु चौधरी संस्थासे करटी आइल गतिविधि ओ प्रगतीबारे जानकारी डेहल रहिट ।

उहाँ संस्थागत जानकारी, संस्थासे करल क्रियाकलापके बारेमे जानकारी, स्थानीय स्तरमे रहल जल, जंगल ओ जमिनसंग सम्बन्धित रहल बहुसरोकारवाला विवादके पहिचान कैना, कार्यक्रम प्रभावकारी बनैना सरोकारवाला निकायके सुझाव सल्लाह लेहक लाग बैठकके आयोजना हुइल जनैलै । संस्थासे बहुसरोकारवाला द्वन्द्व रुपान्तरण अभियान संचालन करल जनैलै । जंल, जंगल जमिन सम्बन्धी समुदाय स्तरके द्वन्द्व, २०७९ चैत्रसम २८९ ठो द्वन्द रुपान्तरण हुइल अब्बे ढेर द्वन्द रुपान्तरण कैसेकल बटैलै । द्वन्द रुपान्तरण कैटी सम्बन्ध सुधार तथा विकास निर्माणके कार्य सुचारु हुइटी रहल बटैलै । बहुसरोकारवाला द्वन्द्व रुपान्तरण प्रक्रिया १२ विधिसे कैटी रहल बटैलै ।

ओस्टेक करके केन्द्रके जिल्ला संयोजक गंगा दुलाल जिल्लामे करल गतिविधिबारे जानकारी डेहल रहिट । उहाँ बहु सरोकारवाला विवादमे सहजीकरण, स्थानीय सरकारके आर्थिक सहयोगमे, स्थानीय सरकारके आर्थिक सहयोगमे मेलमिलाप सम्बन्धी आधारभूत तालिम सञ्चालन, उच्च तालिम, पुनताजाकी तालिम संचालन करल बटैलै ।

उहाँ भजनीके बनजरिया सामुदायिक वन ओ जग्गा धनी किसान विच डगर सम्बन्धी विवाद सहमति ल्यानल बटैलै । ओस्टेक भजनी–७ मे रहल लालपुर गौरी हुइटी मोहना लडियासम डगरके विवाद सहमति ल्यानल, कैलारी–२ के श्री गौरीगणेश ओ करमदेव सामुदायिक वन के सिमना सम्बन्धी विवाद सहमतिमे आइल, घोडाघोडी–१ के सितल ओ जनप्रिय सामुदायिक वनके सिमाना विवाद सहमति आइल उहाँ बटैलै ।

ओस्टेक करके चुरे गापा–५ मे रहल जनजागरण ओ गोदावरी –४मे रहल सेती सामुदायिक वनके सिमाना विवाद प्रक्रियामे रहल, भजनी–१ ठेगरपुरमे रहल डगर निकास सम्बन्धी प्रक्रियामे रहल बटैलै ।

बैठकमे गोदावरी नगरपालिकाके उपप्रमुख शारदा देवी रोकाय, घोडाघोडी नगरपालिकाके उप प्रमुख ग्ुलियाकुमारी चौधरी, लम्की चुहा नगरपालिकाके उपप्रमुख जुना चौधरी, कैलारी गाउँपालिकाके उपाध्यक्ष भगवतीकुमारी चौधरी, जानकी गाउँपालिकाके उपाध्यक्ष लालमति कठरिया, डिभिजन वन कार्यालय धनगढीमे प्रमुख रामविचारी ठाकुर, बार कैलालीके अध्यक्ष नाथुराम महतो, नेपाल पत्रकार महासंघ कैलालीके अध्यक्ष श्रवण देउवा, फेकोफन प्रदेश अध्यक्ष झुमा चौधरीलगायत मन्तव्य राखल रहिट ।

कार्यक्रममे स्वागत मन्तव्य केन्द्रके सहजकर्ता बन्धुविवस चौधरी ओ संचालन केन्द्रके जिल्ला संयोजक गंगादुलाल करल रहिट । कार्यक्रममे स्थानीय तहके उपप्रमुख, सरोकारवाला सरकारी तथा गैरसरकारी संघसस्थाके प्रतिनिधिहुकनके सहभागिता रहे ।