परम्परागत धार्मिक गुरु तथा समुदायके अगुवा ओ टमान क्षेत्रमे नेतृत्व करटी रहल व्यक्तिनसंग सामाजिक मुल्यमान्यता, सामाजिक अभ्यासके विषयमे संवाद कार्यक्रम
पहुरा समाचारदाता
धनगढी, १० माघ । कैलाली जिल्लाके कैलारी गाउँपालिकामे परम्परागत धार्मिक गुरु तथा समुदायके अगुवा ओ टमान क्षेत्रमे नेतृत्व करटी रहल व्यक्तिनसंग सामाजिक मुल्यमान्यता, सामाजिक अभ्यासके विषयमे गाउँपालिका स्तरीय संवाद कार्यक्रम हुइल बा ।
याक नेपाल, केयर नेपाल, आइडिइ नेपाल आयोजना तथा कैलारी गाउँपालिकाके समन्वय, सहकार्यमे परम्परागत धार्मिक गुरु तथा समुदायके अगुवा ओ टमान क्षेत्रमे नेतृत्व करटी रहल व्यक्तिनसंग सामाजिक मुल्यमान्यता, सामाजिक अभ्यासके विषयमे गाउँपालिका स्तरीय संवाद कार्यक्रम हुइल हो ।
उ कार्यक्रममे कैलारी गाउँपालिका वडा नम्बर ३ के वडा अध्यक्ष तथा सामा विकास समिति संयोजक सन्तराम चौधरी, सामाजिक विकास शाखा प्रमुख यगम कलेल, स्वास्थ्य शाखा प्रमुख नरेशकुमार चौधरी, महिला, बालबालिका तथा जेष्ठ नागरिक शाखाके प्रमुख बालकुमारी चौधरी, ओ धार्मिक अगुवा मनबुझौना चौधरीसे पत्रकार उन्नती चौधरी पोषण तथा सामाजिक मुल्यमान्यता, सामाजिक अभ्यासके विषयमे प्यानल छलफल कराइल रहिट ।
परम्परागत धार्मिक गुरु तथा समुदायके अगुवा ओ टमान क्षेत्रमे नेतृत्व करटी रहल व्यक्तिनहे हुइल प्यानल छलफलमे गाउँघरमे रहल गलट अभ्यास न्यूनिकरण कैना उहाँहुक्रे सहमत हुइल रहिट ।
बाल विवाहके कारण ओइनमन्से जलमना बच्चाके कम्जोर ओ कुपोषणके शिकार बन्ना मुख्य कारण रहल महिला, बालबालिका तथा जेष्ठ नागरिक शाखाके प्रमुख बालकुमारी चौधरी बटैली । उहाँ कहली, छोटेम मसे भागके भोज कैना, शरिर परिपक्का हुइलविन लर्का जलमा लेटी रलक कारण छाई ओ लर्काके स्वास्थ्य कम्जोर हुइना ओ पाछे लर्काफे कुपोषिट हुइल डेखा पर्ना पहिल कारण हो ।
स्वास्थ्य शाखा प्रमुख नरेशकुमार चौधरी लर्कनहे डाईक दुध चाहल जछरा नैपुगके लर्का कुपोषित हुइटी रहल बटैलै । उहाँ कहलै, भर्खर जलमल लर्कनहे ६ महिनासम पानीफे निखवाके डाईक दुध केल्ह खवैना हो । यहाँ टे का बा कलेसे छोटिमसे भोज कैना हालहाली बच्चा जलमलेना हुइल तथ्याङकमे डेखा परठ । ओ आपन शरिर विगरक डरे डब्बक दुध खवैना करल डेखजाइठ ।
भर्खर जलमल लर्कनहे डाईक दुधमे पैना सक्कु तत्व रहठ, मने डिब्बाके दुध खवैना कारण बच्चा कम्जोर हुइना, ओ कुपोषित हुइल डेखापर्ना उहाँ बटैलै । निप्पलसे दुध खवाई नैपना कहटी सरकार निप्पलफे बेच्ना निषेध करल उहाँ बटैलै ।
सामाजिक विकास शाखा प्रमुख यगम कलेल गाउँपालिकामे पोषण सुधारमे लाग संघ संस्थाके सहकार्यमे टमान मेरिक कार्यक्रम हुइटी रहल बटैलै । टमान वडामे याक नेपाल, केयर नेपाल, आइडिइ नेपाल आयोजना तथा कैलारी गाउँपालिकाके समन्वयमे पोषण बगैचाफे सुरुवाट हुइल उहाँ बटैलै । लैङिक ंिहसा न्यूनिकरण करेक ससुइया पटुहिया कार्यक्रमफे संचालन करल उहाँ बटैैलै ।
सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरी पोषण सुधारमे लाग एकल प्रयाससे केल्ह नैहोके परम्परागत धार्मिक गुरु तथा समुदायके अगुवा ओ टमान क्षेत्रमे नेतृत्व करटी रहल व्यक्ति लागेपर्ना बटैलै ।
ओस्टेक करके धार्मिक अगुवा मनबुझौना चौधरी आपनेफे गाउँघरमे सामाजिक मुल्यमान्यता, सामाजिक अभ्यासके पाछे केल्ह नैलागके स्वास्थ्य संस्था, अस्पतालमे जाके चेकजाँच करुवइना सुझाव डेटी आइल बटैैलै ।
कार्यक्रममे ठप सहजीकरण करटी याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना कैलारी गाउँपालिका वडा नम्बर ४ ओ ७ के २५ ठो आमा समुह पोषण सुधारके लाग पोषण बगैचा सुरुवाट करल बटैली ।
हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीसे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।
कार्यक्रममे कैलारी गाउँपालिका वडा नम्बर ४ के वडा सदस्य शोभा परियार, कैलारी–४ के गाउँ घुम्टी टोलके भल्मन्सा तिर्थ प्रसाद नेपाललगायत मन्तव्य राखल रहिट । कार्यक्रम वडा सदस्यहुक्रे, टमान गाउँक भल्मन्सा, धार्मिक अगुवा, कैलारी गाउँपालिका योजना शाखा प्रमुख सन्तोषकुमार चौधरी, याक नेपालके सामाजिक परिचालक लक्ष्मी चौधरी, आशा चौधरीलगायतके सहभागिता रहे ।
