हृदयनारायाणहे थारु साहित्य पुरस्कार, समीक्षाहे प्रतिभा महिला सशक्तिकरण पुरस्कार
पहुरा समाचारदाता
धनगढी, १३ माघ । थारू भाषा साहित्यमे कलम चलुइया साहित्यकार तथा पत्रकार हृदयनारायाण चौधरी थारूहे ‘थारू साहित्य पुरस्कार २०८२’ से सम्मान कैना हुइल बा ।
थारू लेखक संघ नेपाल कैलालीसे साहित्यकार चौधरीहे सम्मान कैना हुइल हो । उहाँहे इहे माघ १५ गतेसे १७ गतेसम पटेर्वा सुगौली गाउँपालिका–२, बेलवा पर्सामे हुइना १०औं राष्टिूय थारू साहित्य सम्मेलनमे सम्मान कैना संघके सचिव अनिल कुश्मी जानकारी डेलै ।
बारा जिल्लाके चौधरी विशेष कैके कथा, कविता, लघुकाव्य, महाकाव्य लगायतके किताव लिख्ले बटै । वि.सं २०३२ सालसे हालसम सक्रिय रुपमे लागके उहाँ बहुविधामे कलम चलैटी आइल बटै ।
संघके पूर्व अध्यक्ष सीताराम चौधरीके संयोजकत्वमे पुरस्कारके लाग छनौट समिति चयन करल रहे । उक्त समितिके सदस्यमे मोहन चौधरी, मनमति बखरिया, सुवेश कठरिया ओ सदस्य सचिवमे अनिल कुश्मी रहल रहिट । उक्त समितिसे छनौट कैके सिफारिस करल स्रष्टाहे ‘थारू साहित्य पुरस्कार २०८२’ से सम्मानित करे लागल हो ।
थारु भाषा, साहित्य, संस्कृति ओ गीत संगीतके क्षेत्रमे विशेष योगदान पुगुइया एक जाने स्रष्टाहे संघसे हरेक बरस साहित्यिक सम्मेलनमे सम्मान कैटी आइल बा ।
संघसे स्थापना करल अक्षय कोषके ब्याज रकमसे नगद ६० हजार रुपिया नगद पुरस्कार सहित प्रमाणपत्रसे सम्मान कैना सचिव कुश्मी जानकारी डेलै । थारू भाषा, साहित्य, कला ओ संस्कृति आदि विधामे कलम चलाके थारू वाङ्गमयमे महत्वपूर्ण योगदान पुगुइया लेखक, स्रष्टा, साहित्यकार, कलाकार एवं अनुसन्धान कर्ताहे सम्मान तथा पुरस्कार प्रदान कैना उद्देश्यसे संघसे अक्षय कोष स्थापना करले बा ।
उहे कार्यक्रममे प्रतिभा महिला सशक्तिकरण पुरस्कारसे लम्कीचुहा नगरपालिका कैलालीके गायिका समीक्ष चौधरी फेन सम्मानित हुइना हुइल बटी । चर्चित तथा सफल कलाकारके रुपमे सफल रहल गायिका चौधरी थारू गीत संगीत उत्पादन, वितरण कैके थारू मौलिक कला संस्कृतिके प्रचारप्रसार, संरक्षण सम्वद्र्धनमे योगदान पुगाइल बाफत उहाँहे सम्मान करे लागल हो । पुरस्कार राशी नगद ३० हजार रहल बा ।
रोदन मेडिकल कैलालीके सञ्चालक चन्द्रसिंह चौधरी आपन स्वर्गीय गोसिनीया प्रतिभा चौधरीके पहिल वार्षिक पुण्य तिथीको अवसरमे उक्त पुरस्कार घोषणा करल रहिट । सञ्चालक चौधरी एकलाखके अक्षयकोष स्थापना करले बटै । कोरोनाके कारण २०७८ मे उहाँके गोसिनीया प्रतिभाके निधन हुइल रहे ।
