कैलारीमे मावि स्तरीय हाजिरी जवाफ प्रतियोगिता
दिपेन्द्र मावि पहिल स्थान हासिल
पहुरा समाचारदाता
धनगढी, १३ माघ । कैलाली जिल्लाके कैलारी गाउँपालिकामे मावि स्तरीय हाजिरी जवाफ प्रतियोगितामे दिपेन्द्र मावि पहिल स्थान हासिल करले बा ।
कैलारी गाउँपालिका विपद व्यवस्थापन शाखाके आयोजना तथा युनिसेफ नेपालके सहयोगमे जलबायु परिवर्तन सम्बन्धी हाजिरी जवाफ प्रतियोगितामे दिपेन्द्र मावि १९ नम्बर ल्यानके पहिल हुइल हो ।
ओस्टेक करके जानकी मावि कैलारी–६ बनकट्टा १६ नम्बर ल्यानके दुसरा ओ कैलारी–२ उजलीसेमरामे रहल राष्ट्रिय मावि १२ नम्बर ल्यानके टिसरा स्थान हासिल करले बा ।
हाजिरी जवाफ प्रतियोगिताके सहजीकरण दिपेन्द्र माविके शिक्षक नारायण ढकाल करल रहिट । कैलारी गाउँपालिकामे रहल सामुदायिक नौ मावि भाग लेहलमे जनकल्याण मावि पवेरा ११ नम्बर, राष्ट्रिय मावि भुइयाफाटा १० नम्बर, सरस्वती मावि खरवासेरा १० नम्बर, लक्ष्मी मावि पृथ्वीपुर ९ नम्बर, जनकल्याण मावि के गाउँ ८ नम्बर ओ जनता मावि गदरिया ७ नम्बर केल्ह ल्याले रहे ।
उदघाटन कार्यक्रम गाउँपालिका अध्यक्ष राजसमझ चौधरी ओ समापन कार्यक्रम गाउँपालिका उपाध्यक्ष भगवतीकुमारी चौधरीके अध्यक्षतामे हुइल रहे । समापन कार्यक्रममे सम्बोधन करटी उहाँ शिक्षासंगे अतिरिक्त क्रियाकलाप ओ व्यवहारिक ज्ञान हासिल कैना जरुरी रहल उहाँ बटैली ।
कार्यक्रममे प्रमुख प्रशासकीय अधिकृत खगेन्द्रराज जोशी, शिक्षा शाखा प्रमुख गणेश प्रसाद मिश्र, विपद व्यवस्थापन शाखाके फोकल पर्सन भुवन बखरिया, रोशन चौधरी, शिक्षा अधिकृत रेखा पन्तलगायत उ टमान विद्यालयके शिक्षकहु्कनके सहभागिता रहे । कार्यक्रम संचालन सामाजिक विकाश शाखा प्रमुख यगम कलेल करल रहिट ।
कार्यक्रममे सह प्रायोजक सानवी बुक्स एण्ड स्टेशनरी धनगढी ओ धिरज स्टेशनरी स्पोर्ट ट्रेस हाउस कैलारी–१ हसुलिया रहल बटै ।
