कैलाली क्षेत्र नम्बर ५ मे काँग्रेस उम्मेदवार शाहके सक्रियता बह्रटी, सक्कु वडामे सम्पर्क कार्यालय स्थापना
पहुरा समाचारदाता
धनगढी, १४ माघ । नेपाली काँग्रेस कैलाली क्षेत्र नम्बर ५ के प्रतिनिधि सभा सदस्य उम्मेदवार नरनारायण शाह (मनु) अपन निर्वाचन क्षेत्रके सक्कु वडामे सम्पर्क कार्यालय स्थापना करटी चुनावी गतिविधिहे तीव्र बनैले बटै ।
निर्वाचन मिति लग्गे हुइटी जाईबेर संगठन विस्तार, मतदाता भेटघाट ओ पार्टी गतिविधिहे व्यवस्थित बनैना उद्देश्यसहित उहाँ वडास्तरमे सम्पर्क कार्यालय सञ्चालनमे ल्यानल हुइट ।
सम्पर्क कार्यालय स्थापनासँगे उम्मेदवार शाह टोल–टोलमे पुगके मतदातासँग प्रत्यक्ष भेटघाटहेफे निरन्तरता डेटी रहल बटै । स्थानीय समस्या, आवश्यकता ओ जनअपेक्षा बुझ्न तथा काँग्रेसके नीति, कार्यक्रम ओ प्रतिबद्धता जनतामाझ पुगैना लक्ष्यके साथ उहाँ दैनिक रूपमे टमान वडामे सक्रिय डेखल बटै ।
स्थानीय तहमे पार्टी कार्यकर्ता, शुभेच्छुक ओ आम मतदाताबीच उत्साह बह्रटी गैल काँग्रेस कार्यकर्ताहुकनके कहाई बा । कार्यक्रमअनुसार सोम्मार धनगढी उपमहानगरपालिका वडा नम्बर १, २, ३, ४, ५, ६, ११ ओ १३ मे सम्पर्क कार्यालय स्थापना करल रहे । ओस्टेक करके मंगरके वडा नम्बर १४ से १९ समके वडामे साथे कैलारी गाउँपालिका वडा नम्बर ६ ओ ९ मेफे सम्पर्क कार्यालय उद्घाटन करल बा ।
बुधके रोज धनगढी उपमहानगरपालिका वडा नम्बर ७, ८, ९, १० ओ १२ मे कार्यालय स्थापना हुइलसँगे क्षेत्र नम्बर ५ अन्तर्गतके उ सक्कु वडामे काँग्रेसके सम्पर्क कार्यालय सञ्चालनमे आइल बटै ।
सम्पर्क कार्यालय उद्घाटनके क्रममे उम्मेदवार शाह नेपाली काँग्रेसके संस्थापक नेता बीपी कोइरालाके तस्बिरमे माल्यार्पण करटी उ रिबन काटके कार्यक्रमके औपचारिक शुभारम्भ करल रहिट । बीपीके विचार, लोकतान्त्रिक मूल्य ओ समाजवादप्रतिके प्रतिबद्धताहे आत्मसात करटी आघे बह्रना सन्देशसहित कार्यालय स्थापना करल पार्टीके नेताहुक्रे बटैले बटै ।
कैलाली क्षेत्र नम्बर ५ अन्तर्गत धनगढी उपमहानगरपालिकाके १९ ठो वडा ओ कैलारी गाउँपालिकाका २ ठो वडा परठ । यी सक्कु वडामे स्थापना करल सम्पर्क कार्यालयमार्फत पार्टीके दैनिक गतिविधि सञ्चालन कैनाके साथे मतदातासँग नियमित सम्पर्क कायम कैना योजना रहल काँग्रेस जनैले बा । सम्पर्क कार्यालयहे चुनावी प्रचारके केन्द्र केल्ह नैहोके जनताके समस्या सुन्न ओ समाधानके लाग पहल कैना थलोके रूपमे विकास कैना उम्मेदवार शाहके कहाई बा ।
सम्पर्क कार्यालय स्थापना करटी उम्मेदवार नरनारायण शाह अपने पार्टीभिटर सक्कुहुनके साझा उम्मेदवार हुइल ओरसे सक्कु जानेक साथ ओ समर्थन प्राप्त हुइना विश्वास व्यक्त करलै । उहाँ पार्टीके नेता, कार्यकर्ता ओ समर्थकहुकनहे निर्वाचन प्रचारमे मर्यादित ओ अनुशासित ढंगसे लग्ना आग्रह करलै । ‘हम्रे अपन गतिविधिमे केन्द्रित बनी । कोई आउरप्रति आक्षेप लगना काम नकरी,’ उहाँ कहलै, ‘सभ्य हुके खटिं, निर्वाचन आचारसंहिताके पूर्ण पालना करी ।’
उहाँ निर्वाचनहे लोकतन्त्रके महत्वपूर्ण अभ्यासके रूपमे उल्लेख करटी सभ्य, संयमित ओ अनुशासित तरिकासे चुनावी प्रतिस्पर्धामे सहभागी हुईपर्नामे जोड डेलै । व्यक्तिगत आलोचना ओ नकारात्मक प्रचारसे राजनीति कमजोर बनैना कहटी विकास, सुशासन ओ जनसेवाके मुद्दाहे प्राथमिकतामे रख्न उहाँ कार्यकर्ताहे निर्देशन डेलै ।
स्थानीय काँग्रेस कार्यकर्ताके अनुसार शाहके सक्रियता ओ वडास्तरमे सम्पर्क कार्यालय स्थापना हुइलसंगे संगठन थप सुदृढ हुइल बा । नम्मा समयसे क्षेत्रके सामाजिक तथा राजनीतिक गतिविधिमे संलग्न शाह स्थानीय समस्या मजासे बुझल ओ जनताके भरोसा जिटे सेक्ना उम्मेदवार रहल ओइनके दाबी बा ।
आगामी निर्वाचनहे लक्षित करटी काँग्रेस कैलाली क्षेत्र नम्बर ५ से घरदैलो अभियान, कोणसभा, अन्तरक्रिया ओ जनसम्पर्क कार्यक्रमहे आउर व्यापक बनैना तयारी करल बा । सम्पर्क कार्यालयहे केन्द्र बनाके प्रचार–प्रसारहे प्रभावकारी बनैना जनाइल बा । चुनावी माहोल तत्टी जाके उम्मेदवार शाहके सक्रियता ओ संगठन विस्तारसे क्षेत्र नम्बर ५ मे राजनीतिक प्रतिस्पर्धा थप रोचक बन्न संकेत डेखल बा ।
