‘चैतन्य प्रतिभा सम्मान समारोहमे एक हजारसे ढेर विद्यार्थी सम्मानित

पहुरा समाचारदाता
धनगढी, १६ माघ । शिक्षा ओ संस्कारके सङ्गम, वेद ओ विज्ञानके संयोजन तथा प्रकृति ओ संस्कृतिके सम्मान कना मूल भावहे आत्मसात् करटी आघे बह्रटी रहल चैतन्य पाठशालासे ‘चैतन्य प्रतिभा सम्मान समारोह–२०८२ शुकके रोज सम्पन्न करले बा ।

समारोहमे शैक्षिक उत्कृष्टता, अनुशासन, नेतृत्व क्षमता, खेलकुद, विज्ञान–प्रविधि तथा सृजनशीलताके टमान विधामे उल्लेखनीय उपलब्धि हासिल करल विद्यार्थीनहे सम्मान करल हो । प्रतिभा वान विद्यार्थीनहे सिल्ड मेडल ओ प्रमाण पत्र करल हो ।

पाठशालाके पिटिए अध्यक्ष ईश्वर गिरीके अध्यक्षतामे सम्पन्न कार्यक्रममे प्रमुख अतिथि सुदूरपश्चिम प्रदेश खेलकुद परिषद्के सदस्य सचिव लोकबहादुर खड्का रहल रहिट ।

शिक्षा ओ संस्कारहे सँगसँगै आघे बह्रैटी गुणस्तरीय ओ व्यवहारिक शिक्षामे जोड डेटी आइल चैतन्य पाठशालाके चैतन्य प्रतिभा सम्मान समारोह–२०८२ भविष्यके सक्षम, जिम्मेवार ओ नवप्रवर्तनशील नागरिक निर्माणओरके महत्त्वपूर्ण कदमके रूपमे अपने लेहल ओ शिक्षा केवल किताबी ज्ञानमे सीमित नैरहके जीवन उपयोगी सीप, अनुशासन ओ नैतिकताके विकाससँग जोेपर्नामे प्रमुख अतिथि तथा सुदूरपश्चिम प्रदेश खेलकुद परिषद्े सदस्य–सचिव लोकबहादुर खड्का जोड डेलै ।

उहाँ चैतन्य पाठशालासे शिक्षा, संस्कार, खेलकुद ओ विज्ञानहे एकसाथ आघे बह्रैटी उदाहरणीय काम करटी रहल ओ चैतन्य पाठशालासे कैना खेलकुदके कार्यक्रममे तथा सुदूरपश्चिम प्रदेश खेलकुद परिषद् समेत सदैव सहयोग कैना बटैलै ।

चैतन्य पाठशालाके निर्देशक कटक बहादुर सिंह संस्थासे अपनैटी आइल संस्कारयुक्त, खेलमैत्री प्रविधिमैत्री ओ विद्यार्थी–केन्द्रित शिक्षासे विद्यार्थीहुकनहे राष्ट्रिय तथा प्रादेशिक स्तरके प्रतियोगितामे सफल बनाइल उल्लेख करलै । उहाँ भर्खर सम्पन्न सुदूरपश्चिम आइटी रोबोटिक्स प्रतियोगितालगायत टमान क्षेत्रमे चैतन्यके विद्यार्थीसे हासिल करल उपलब्धि यकर पुष्टि करल समेत बटैैलै ।

कार्यक्रमसे विद्यार्थीनमे आत्मविश्वास अभिवृद्धि कैनाके साथे आउर मजा कैना प्रेरणा डेना ओ यी सम्मानसे विद्यार्थीमे थप खेल भावनाके विकास हुइना चैतन्य पाठशालाके अध्यक्ष गणेश प्रसाद जोशी बटैलै ।

कार्यक्रमके समापनमे बोल्टी पाठशालाके पिटिए अध्यक्ष ईश्वर गिरी पाठशालासे समय समयमे यैसिन कार्यक्रमके आयोजना करके विद्यार्थीके अन्तरनिहित प्रतिभाके प्रस्फुटन कैना कार्य करटी आइल बटैलै ।

समारोहमे अभिभावक, शिक्षक, शिक्षाविद्, विद्यार्थी तथा समाजके टमान क्षेत्रके विशिष्ट व्यक्तित्वहुकनके उल्लेखनीय उपस्थिति रह रहे ।