कैलारी–४ के गाउँमे माघ मिलन कार्यक्रम

पहुरा समाचारदाता
धनगढी, १८ माघ । कैलाली जिल्लाके कैलारी गाउँपालिका वडा नम्बर ४ के गाउँमे आदिवासी जनजाति थारुनके माघ मिलन कार्यक्रम शनिच्चरके रोज सम्पन्न हुइल बा ।

कैलारी गाउँपालिका वडा नम्बर ४ के कार्यालयके आयोजनामे तथा सहास नेपालके सहकार्यमे माघ मिलन कार्यक्रम हुइल हो । वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रममे गाउँपालिका अध्यक्ष राजसमझ चौधरी वरका पहुना रहल रहिट । कार्यक्रममे सम्बोधन करटी उहाँ माघ मिलन कार्यक्रमसे थारु समुदायके परम्परागत कला, संस्कृति लौवा पुस्तामे पुस्तान्तरणमे सहयोग पुग्न बटैलै ।

हमार पुर्खा कला, सस्कृति, गीतबाँसके भण्डार हुइट, गाउँपालिका अध्यक्ष कहलै, उ चिज लौव पुस्तामे कैसिक सर्ना कना यी कार्यक्रम माध्यम केल्ह हो । यदि हम्रे कौनो माध्यमसेफे सारे नैसेकब कलेसे पुर्खा ओरैही कलेसे संगसंगे लैजिही । पाछे हमार पहिचानफे नैरहिजाई टबमारे यकर महत्व ढेर बा ।

उहाँ कला, संस्कृति संरक्षण तथा प्रवद्र्धनके लाग हुइना कार्यक्रमहे निरन्तरता डेहे पर्ना बटैै ।

माघ मिलन कार्यक्रममे कार्यपालिका सदस्य लाल बहादुर विक, सहास नेपालके परियोजना संयोजक तिर्थ योगी, गाउँपालिका स्तरीय भल्मन्सा समितिके संयोजक सन्तराम चौधरी, वडा स्तरीय भल्मन्सा समितिके संयोजक जगलाल डगौंरा, थारु बुद्धिजिवी देवनारायण चौधरी, कैलारी गाउँपालिका योगपताञ्जली समितिके महासचिव तिर्थ प्रसाद नेपाललगायत शुभकामना मन्तव्य राखल रहिट ।

कार्यक्रममे कृषि क्षेत्रमे उदाहरणीय कार्य करटी आइल भिजन कृषि फर्मके सञ्चालक बुधराम चौधरीहे एक ठो हजारीसहित सम्मानपत्रसे सम्मान कैगिल बा । कलेसे ओरेक नेपालसे वडा नम्बर ४ मे पुगाइल योगदान करटी प्रशंसापत्रफे प्रदान कैगिल बा । कार्यक्रममे स्वागत मन्तव्य वडा सदस्य मोहनलाल चौधरी ओ संचालन वडा नम्बर ४ के वडा सचिव श्रीप्रसाद चौधरी ओ वृक्षलाल चौधरी करल रहिट ।

कार्यक्रममे वडा सदस्य लक्ष्मी चौधरी, हरिद्वारी चौधरी, शोभा परियार, सहास नेपालके नर जिरेल, दलित महिला अधिकार मञ्चके निलु चौधरी, नवजीवन सेवा संघके अंगदुलारु चौधरी, मुक्तकमैया महिला विकास मञ्चके रमेश चौधरीलगायत वडा नम्बरबासीहुक्रे, भल्मन्साहुकनके सहभागिता रहे ।

कार्यक्रममे यिहे माघ चुनल वडा नम्बर ४के २२ ठो लौवा भल्मन्साहुकनहे खादा मालासहित सम्मानफे कैगिल बा । कार्यक्रममे थारु समुदायके परिकारफे प्रर्दशनके लाग धारगिल रहे । ओस्टेक वडा नम्बर ४ के ढेर टोलके सास्कृतिक झाँकी प्रदर्शन कैगिल बा ।