निर्वाचनमे पाँच हजार सशस्त्र प्रहरी तैनाथ करजैना
धनगढी, २१ माघ । आगामी फागुन २१ गते हुइना प्रतिनिधि सभा निर्वाचनहे लक्षित कैटी सुदूरपश्चिम प्रदेशके १६ निर्वाचन क्षेत्रमे सशस्त्र प्रहरी बल नेपालसे सुरक्षा योजना तयार कैके कार्यान्वयनमे लन्ले बा । सशस्त्र प्रहरी बल नेपाल नम्बर वैद्यनाथ बाहिनी मुख्यालय अत्तरिया कैलालीके अनुसार माघ २१ गतेसे प्रत्येक निर्वाचन क्षेत्रमे निर्वाचन क्षेत्र सुरक्षा बेस स्थापना करजैना बा । उ सुरक्षा बेसमे सशस्त्र प्रहरी नायब उपरीक्षक (डिएसपी) के कमान्डमे सुरक्षा फौज तैनाथ करजैना व्यवस्था मिलाइल बा ।
निमित्त बाहिनीपति सशस्त्र प्रहरी वरिष्ठ उपरीक्षक दिग्विजय सुवेदी सञ्चारकर्मीसँगके अन्तक्र्रियामे निर्वाचनहे शान्तिपूर्ण, निष्पक्ष ओ भयरहित बनाइक लाग व्यापक सुरक्षा तयारी करल जानकारी डेलै । उहाँके अनुसार फागुन ६ गतेसे छुट्टाछुट्टे मोबाइल टोली परिचालन करजैना बा । ओस्टके डिएसपीके कमान्डमे बाहिनीस्तरीय रिजर्भ टोलीसमेत तयारी अवस्थामे रहना उहाँ जानकारी डेलै ।
निर्वाचनविरोधी गतिविधि रोक्ना अनुगमन टोली परिचालन करजैना ओ सूचनाके प्राप्ति तथा विश्लेषणहे निरन्तरता डेना सुवेदी बटैलै । निर्वाचन सुरक्षामे करिब पाँच हजार एक सय सशस्त्र प्रहरी परिचालन करजैना उहाँके कहाइ रहल बा ।
