बोण्ड स्कूलके १८औं वार्षिकोत्सव
पहुरा समाचारदाता
हसुलिया, १ फागुन । कैलाली जिल्लाके कैलारी गाउँपालिका वडा नम्बर ५ पवेरामे रहल बोण्ड ईंगलिस बोर्डिङ स्कूलके १८औं वार्षिकोत्सव तथा अभिभावक दिवस सम्पन्न हुइल बा ।
विद्यालय व्यवस्थापन समितिके अध्यक्ष बजारीराम चौधरीके अध्यक्षतामे हुइल कार्यक्रममे कैलारी गाउँपालिका वडा नम्बर ३ के वडा सदस्य किसुनलाल चौधरी प्रमुख अतिथि रहल रहिट । कार्यक्रममे सम्बोधन करटी उहाँ गुणस्तरीय शिक्षा खेलकुद लगायत अतिरिक्त गतिविधिमे ध्यान डेहे पर्ना बटैलै ।
उहाँ कहलै, ‘घर पहिल विद्यालय हो, अभिभावक पहिल शिक्षक हुइट । घरमे मजा संस्कार सिखैले विद्यार्थीके पह्राईमे ओस्टेफे सुधार ल्याने सेक्जाइठ ।’ अभिभावक आपन लर्कनके पह्राईके लाग जटराफे लगानी लगैना तयार हुइना ओरसे विद्यार्थीके भविष्य मजा बनैना आर्दश शिक्षकके भूमिकाफे बरवार रहना वडा सदस्य चौधरी बटैलै । यी विद्यालय शैक्षिकसंगे खेलकुदमे मजा प्रगतीफे करटी रहल उहाँ बटैलै ।
कार्यक्रमके विशिष्ट अतिथि दिपेन्द्र माविके प्रअ विनोद प्रसाद भट्टराई कैलारी गाउँपालिकामे संस्थागत विद्यालयमे बोण्ड इंगलिस बोडिङ ओ सामुदायिक विद्यालयमे दिपेन्द्र मावि अब्बल बन्टी गैल बटैलै । गाउँपालिकासे शिक्षा क्षेत्रमे मजा नतिजा ल्यानल विद्यालयहे प्रोत्साहन कैना जरुरी रहल बटैलै ।
विद्यालयके संस्थापक प्रिन्सिपल तिलक बोहरा विद्यालयहे यहाँसम पुगैना अभिभावकहुकनके योगदान रहल बटैलै । उहाँ कहलै, ‘यी विद्यालयमे अध्ययन करल विद्यार्थी कक्षा आठके पालिकास्तरीय परिक्षा मजा स्थान हासिल करटी रहल बटै । विद्यालय संस्कारसंगे व्यवहारिक शिक्षामे जोर डेटी आइल बा ।’
कार्यक्रममे थारु कलाकार मञ्चके प्रदेश कोषाध्यक्ष राजु चौधरी राज, अभिभावक तथा जनकल्याण माविके तेजराम चौधरी, कक्षा ९ मे अध्ययनरत विद्यार्थी आरजु बोहरालगायत मन्तव्य राखल रहिट ।
विद्यालयके भाइस प्रिन्सिपल बमबहादुर धामी १७ बर्ष पहिले विद्यालय संचालन करेबेर जम्मा ६०/७० जाने विद्यार्थीसे सुरुवाट करल मने अब्बे करिब ७ सय विद्यार्थी रहल बटैलै । उहाँ कहलै, ‘बोण्ड स्कूल गुणस्तरीय शिक्षा प्रदान करटी अभिभावकहुकनके मन जिटना सफल हुइल बा । पहिले विद्यार्थी खोजे पर्ना अवस्था रहे । अब्बे अभिभावक ओ विद्यार्थीनके आर्कषण बह्रल बा ।
कार्यक्रममे गैल बर्षके कक्षा आठके बोर्ड परिक्षामे पालिका भर उत्कृष्ट अंक ल्यानल आरजु बोहराहे ५ हजार ५ सय रुप्या नगदसहित सम्मान कैगिल बा ।
ओस्टेक करके २०८१ सालके एसइईमे गापामे उत्कृष्ट हुइल यूवराज ढुङगानाहे ११ हजार एक सय ११ रुप्या नगदसहित ओ कक्षामे विद्यालयमे पहिल स्थान हासिल करल ग्रेसी चौधरीहेफे सम्मान कैगिल बा ।
ओस्टे शैक्षिक क्षेत्रमे उत्कृष्ठ स्थान हासिल करुइया विद्यार्थी ओ यी बर्षके बार्षिकोत्सवके अवसरमे हुइल टमान खेलकुद प्रतियोगितामे विजयी हुइलहुकनके पुरस्कार वितरण कैगिल बा । वार्षिकोत्सवके अवसरमे विद्यार्थीहुकनसे सामुहिक तथा एकल नृत्य डेखागैल बा । कार्यक्रमके संचालन विरेन्द्र धामी करल रहिट । कार्यक्रममे टमान संस्थागत विद्यालयके प्रिन्सिपल, अभिभावकहुकनहे सहभागिता रहे ।
