विपद न्युनिकरणके लाग पूर्व तयारी आवश्यकः गाउँपालिका उपाध्यक्ष
पहुरा समाचारदाता
धनगढी, १ फागुन । कैलारी गाउँपालिका उपाध्यक्ष भगवतीकु्मारी चौधरी विपद जोखिम न्यूनिकरणके लाग पूर्व तयारी करेपर्ना जरुरी रहल बटैले बटी ।
शुकके रोज हसुलियामे कैलारी गाउँपालिका विपद व्यवस्थापन शाखाके आयोजना तथा युनिसेफ नेपालके सहयोगमे हुइल जलबायु परिवर्तन तथा विपद पूर्व तयारी सम्बन्धी वडास्तरसे आइल सुझावके बारेमे जानकारी तथा अन्तरक्रिया कार्यक्रममे उहाँ उ बाट बत्वाइल रहिट ।
विपद ढेर मेरिक रहल कहटी बाढ, पहिरो, आगलागी केल्ह नाही सडक दुर्घटना, बालविवाहके कारण समाजमे भयबाह अवस्था आइल उहाँ बटैली । विपद जोखिम न्युनिकरणके लाग सक्कु जाने लग्लेसे केल्ह सम्भव रहल उहाँ बटैली ।
वडा नम्बर ५ के वडा अध्यक्ष विष्णु प्रसाद चौधरी गाउँपालिकासे हरियाली प्रवद्र्धनके लाग कोई जग्गा धनी अपन निजि ५ कटठा जग्गामे वृक्षरोपण करलेसे उहीहे बेरहक लाग काँढे तार ओ पोल सहयोग कैना निर्णय हुइल बटैलै ।
ओस्टेक करके दारुके बोटल जथाभावी फेकल कारण समस्या आइल बटैलै ।
अन्तरक्रिया कार्यक्रममे यूनिसेफ नेपालके अशोक जोशी ओ कैलारी गाउँपालिका विपद व्यवस्थापन शाखाके प्रमुख भुवन बखरिया प्रस्तुतीकरण राखल रहिट । कार्यक्रममे वडा अध्यक्षहुक्रे, टमान शाखाके प्रमुखहुकनहे सहभागिता रहे ।
कार्यक्रमके सञ्चालन सहजकर्ता रोशन चौधरी करले रहिट ।
