फाप्ला क्रिकेट रंगशाला निर्माणसे विमानस्थल विस्तारसम

पहुरा समाचारदाता
धनगढी, २ फागुन । कैलाली निर्वाचन क्षेत्र नम्बर ५ मे उम्मेदवार रहल प्रेमबहादुर आले धनगढीके समग्र विकासके लाग महत्वाकांक्षी योजनासहित २० बुँदे प्रतिबद्धता सार्वजनिक करले बटै ।

नेपाली कम्युनिष्ट पार्टी (नेकपा) के ओरसे उम्मेदवार बनल आले शनिच्चरके रोज धनगढीस्थित पार्टी कार्यालयमे आपन चुनावी योजना सार्वजनिक करल हुइट । उहाँ लम्मा समयसे चर्चामे रहल धनगढीके फाप्ला क्षेत्रमा अन्तर्राष्ट्रियस्तरको क्रिकेट रंगशाला निर्माणके लाग आवश्यक बजेट व्यवस्थापन कैना प्रतिबद्धता जनैले बटै । सक्कु अध्ययन पूरा हुइलेसे फेन बजेट अभावके कारण रोकल उक्त परियोजना अपने निर्वाचित हुइलेसे आघे बह्रैना उहाँ बटैलै । धनगढीहे ‘क्रिकेट हब’के रूपमे विकास कैटी युवाहे खेलकुदमार्फत अनुशासन ओ राष्ट्र निर्माणमे जोर्ना योजना फेन उहाँ प्रस्तुत करल रहिट ।

ओस्टके, धनगढी विमानस्थलके धावनमार्ग २५०० मिटरमे विस्तार कैके बरवार जहाज अवतरण करे मिल्ना मेरके बनाके सुदूरपश्चिमहे राष्ट्रिय तथा अन्तर्राष्ट्रिय हवाई सेवासँग जोर्ना प्रतिबद्धता उहाँ व्यक्त करले बटै । अपने मन्त्री रहल बेला विमानस्थल विस्तारके लाग दुई अर्ब पाँच करोड रुपैयाँ व्यवस्थापन करल मने पाछे बजेट रकमान्तर होके योजना रोकल उहाँ उल्लेख करलै ।

स्वास्थ्य क्षेत्रअन्तर्गत शहिद दशरथ चन्द स्वास्थ्य विज्ञान विश्वविद्यालय अन्तर्गत तीनसय से छसय शैय्याके अस्पताल सञ्चालनमे लानके एमबिबिएस लगायतके शैक्षिक कार्यक्रम सुरु कैना योजना उहाँ आघे सरले बटै । सेती प्रादेशिक अस्पतालहे संघीय सरकार मातहत सञ्चालन कैके विशिष्टिकृत सेवा विस्तार कैना ओ सिकलसेल बिरामीके लाग छुट्टे वार्ड स्थापना कैना फेन उहाँ प्रतिबद्धतामे उल्लेख करले बटै ।

सडक पूर्वाधार ओर धनगढी–खुटिया–दिपायल–बझाङ–चैनपुर हुइटी उरै जोर्ना छोट दूरीके सडक शीघ्र सम्पन्न कैन उहाँ बटैले बटै । इहीसे प्रदेशके आर्थिक तथा धार्मिक गतिविधि बह्रना विश्वास व्यक्त कैटी आगामी कार्यकालमे निर्माण सम्पन्न कैना अठोट व्यक्त करले बटै । लडिया कटान ओ डुबान समस्याके दीर्घकालीन समाधानके लाग मोहना, खुटिया, घुरही, घुराहा ओ शिवगंगा लडिया किनारमे हरियालीसहित तटबन्ध निर्माण कैना उहाँ बटैले बटै । साथे टमान स्थानमे पक्की पुल निर्माण, ग्रामीण सडक स्तरोन्नति ओ धनगढी–३ मे प्रादेशिक बसपार्क निर्माण कार्यान्वयनमे लैजैना योजना फेन सार्वजनिक करले बटै ।

पर्यटन प्रवद्र्धनअन्तर्गत धनगढी–७ के वनस्पति उद्यान ओ जाखोर टल्वाहे धार्मिक तथा पर्यटकीय स्थलके रूपमे विकास कैना रहल बा । भूमिहीन, सुकुम्बासी, मुक्तकमैया तथा लालपुर्जा नैपाइलहे लालपुर्जा वितरण, सुरक्षित आवास कार्यक्रम लागू तथा आधारभूत पूर्वाधारके पहुँच सुनिश्चित कैना प्रतिबद्धता फेन उहाँ बटैले बटै । कृषि क्षेत्रमे आधुनिक प्रविधि विस्तार, सिँचाइ व्यवस्थापन ओ मल–बीउके सहज उपलब्धता सुनिश्चित कैना उहाँ बटैले बटै । महिला, दलित, अपाङ्गता रहल व्यक्ति, अल्पसंख्यक तथा सीमान्तकृत समुदायके अधिकार ओ अवसर सुनिश्चित कैना तथा थारू लगायत स्थानीय समुदायके भाषा, साहित्य ओ संस्कृतिके संरक्षणके लाग सांस्कृतिक संग्रहालय निर्माणमे पहल कैना उल्लेख करल बा ।

उद्योग, व्यापार ओ रोजगारी अभिवृद्धिके लाग साना तथा मध्यम उद्योग प्रवद्र्धन ओ स्थानीय उत्पादनके बजार सुनिश्चितता कैना उहाँ बटैले बटै । धनगढी चटकपुरस्थित नेपाल आयल निगमके डिपोहे जोखिमयुक्त बस्तीसे सुरक्षित स्थानमे सर्ना पहल कैना फेन उहाँ जनैले बटै । पाछेक तीन निर्वाचनमे डोटीसे विजयी हुइल आले इ बेर कैलाली क्षेत्र नम्बर ५ से उम्मेदवारी डेहल कारण धनगढीके विकासमे आपन आवश्यकता रहल बटैले बटै । जनतासँगके सम्बन्ध ओ निरन्तर साथके कारण अपने आघेक निर्वाचनमे सफलता पाइल उहाँ दाबी रहल बा ।