उज्यालो नेपालके उम्मेदवार साउँदके प्रतिवद्धतापत्र सार्वजनिक

पहुरा समाचारदाता
धनगढी, २ माघ । उज्यालो नेपाल पार्टीसे कैलाली क्षेत्र नम्बर ५ से उम्मेदवारी डेहल चन्द्र साउँद आपन चुनावी प्रतिवद्धता पत्र सार्वजनिक करले बटै ।

कुलमान घिसिङके नेतृत्वमे रहल उ पार्टीसे उम्मेदवारी डेहल साउँद आपन १३ बुँदे प्रतिवद्धता पत्र शनिच्चरके रोज पत्रकार सम्मेलन मार्फत सार्वजनिक करल हुइट । उहाँ आपन प्रतिवद्धता पत्रमे धनगढी एयरपोर्टहे स्तरोन्नति कैना, शहिद दशरथचन्द राष्ट्रिय स्वास्थ्य विज्ञान विश्वविद्यालयहे राष्ट्रके गौरबके ऐतिहासिक विश्वविद्यालयके रुपमे स्थापित कैना ओ सेती प्रादेशिक अस्पतालहे स्तरोन्नति कैना उल्लेख करले बटै ।

ओस्टके जनताहे विषादी ओ अखाद्य वस्तु खैना बाध्य परुइया कालाबजरिया, माफिया, भ्रष्टाचारीनके जाल टुर्ना ओ सक्कु जाने स्वास्थ्य खैनाचीज खाइ पैना, स्वच्छ प्रतिप्रर्धा, स्वास्थ्य उपचार ओ शिक्षाके संवैधानिक अधिकारके सुनिश्चितता कराइक लाग सदन ओ सडकमे ससक्त आवाज उठैना बटैले बटै ।

ओस्टके उच्च अदालत धनगढीमे रख्ना ओ डोटीमे उच्च अदालतके युनिट रहना व्यवस्था कैना, युवाहे स्मार्ट आइटी विजनेसके व्यवस्था कैना, पाँच बरसमे कृषि, आइटी, वन, जलश्रोत लगायत क्षेत्रमे १२ हजारसे ढेर युवाहे रोजगारी सुनिश्चित कैना, कैलाली निर्वाचन क्षेत्र नम्बर ५ अन्र्तगतके निर्वाचन क्षेत्रसे जोर्ना स्थानमे सडक, पुलपुलेसा, शिक्षा, स्वास्थ्य, खानेपानी आवश्यकताके आधारमे बजेट विनियोजन करक लाग पहल कैना उहाँके प्रतिवद्धता पत्रमे उल्लेख रहल बा ।