नेपाली सेना गौरवके प्रतीक हो : प्रदेश प्रमुख मियाँ

पहुरा समाचारदाता
धनगढी, २ फागुन । सुदूरपश्चिम प्रदेशके प्रदेश प्रमुख नजिर मियाँ नेपाली सेना जनताके विश्वास, राष्ट्रके ढाल ओ गौरवके प्रतीक रहल बटैले बटै ।

नेपाली सेना दिवसके अवसरमे शनिच्चरके रोज धनगढीमे आयोजित एकता दौडके उद्घाटन करटी उहाँ यैसिन बटाइल हुइट । उहाँ गौरवशाली इतिहास रहल नेपाली सेनासे राष्ट्रहे परे अइना टमान विपत्तिमे जनताके जनधनके क्षति हुइनासे बचैना सहयोग करटी आइल उल्लेख करलै ।

“जनताहे केन्द्र बिन्दुमे धारके राष्ट्रके कुनाकाप्चामे जनहितके कार्य करटी आइल बा”, उहाँ कहठै,“अपन ज्यानके परवाह नैकरके जनरक्षाके लाग नेपाली सेना निरन्तर खटटी रहल बा ।”

नेपाली सेनासे राष्ट्रके सुरक्षामे महत्वपूर्ण भूमिका खेल्टी आइल प्रदेश प्रमुख मियाँके ठम्याई बा । उहाँ देशके सार्वभौमसत्ता ओ अखण्डताके रक्षा, विपद् व्यवस्थापन, शान्ति व्यवस्थापन ओ राष्ट्रिय विकासमे नेपाली सेनासे महत्वपूर्ण योगदान पुगैटी आइल उल्लेख करलै ।

बहुल एकता ओ सुरक्षित राष्ट्रके भावनाहे आत्मसात करटी प्रदेशस्तरमे आयोजना करल एकता दौडसे सुदूरपश्चिम प्रदेशके जनताहे नेपाली सेनाके बारे अभिन लग्गेसे जन्ना बुझ्न अवसर प्रदान करल मियाँके कहाई बा । उहाँ एकता दौड केवल मनोरञ्जन केल्ह नैहुके राष्ट्रिय एकताके प्रतीक रहल उल्लेख करलै । यिहीसे जनताहे एकसाथ आछे बह्रना प्रेरणा डेहल प्रदेश प्रमुख मियाँ बटैलै ।

एकता दौडस विशेष करके विद्यार्थी तथा युवाहुकनहे नेपाली सेनाके गौरवशाली योगदानबारे बुझ्न ओ अपनत्व अनुभव कैना सहज वातावरण प्रदान करल उहाँके कहाई रहे । “यि भविष्यके पुस्तामे सेनाप्रति सम्मान, गर्व ओ प्रेरणा जगाइल बा”, मियाँ ठप्लै, “जेनजी आन्दोलनके संवेदनशील कालखण्डमे नेपाली सेनासे राष्ट्रहे सामान्य अवस्थामे लौटैना, शान्ति ओ सुव्यवस्था कायम कैना, नागरिक सुरक्षाहे पुनःस्थापित कैना तथा राष्ट्रिय एकता पुनः सुदृढ बनैना महत्वपूर्ण भूमिका खेलल बा ।”

नेपाली सेनाके संयमित उपस्थिति ओ जनतासंगके सहकार्यसे समाजहे पुनः शान्ति मार्गमे लौटाइल प्रदेश प्रमुख मियाँके कहाई रहे । उहाँ नेपाली सेनाके अनुशासित उपस्थिति ओ जनतासंगके सहकार्यसे समाजहे पनः शान्तिपूर्ण मार्गमे लौटाइल उल्लेख करलै । प्रदेश प्रमुख मियाँ सेना दिवसके अवसरमे नेपाली सेना तथा सङ्गठनमे कार्यरत सक्कु सदस्यहे हार्दिक बधाई डेटी उज्ज्वल भविष्यके कामनासहित शुभकामना व्यक्त करलै ।

उद्घाटन कार्यक्रममे सुदूरपश्चिम प्रदेशके आन्तरिक मामिला तथा कानुनमन्त्री हिरासिंह सार्की, भूमि, व्यवस्था, कृषि तथा सहकारीमन्त्री वीरबहादुर थापा, धनगढी उपमहानगरपालिकाके प्रमुख गोपाल हमाल, उपप्रमुख कन्दकला राना, सरकारी कर्मचारी लगायतके उपस्थिति रहे ।