कैलाली–५ मे ढुंगानाके चुनावी दौड तीव्र, ‘सोचलसे ढेर माया पैटी बटु’
पहुरा समाचारदाता
धनगढी, ३ फागुन । कैलाली क्षेत्र नम्बर ५ मे नेपाल कम्युनिस्ट पार्टी (एमाले) के ओरसे प्रतिनिधिसभा सदस्यके उम्मेदवार यज्ञ राज ढुंगाना चुनावी प्रचारप्रसारहे तीव्रता डेले बटै ।
घरदैलो अभियान, टोल–टोल भेटघाट तथा अन्तरक्रिया कार्यक्रममे व्यस्त रहल ढुंगाना अपने अपेक्षा करलसे ढेर समर्थन ओ सद्भाव पैटी रहल बटैले बटै ।
मतदाता भेटघाटके क्रममे सञ्चारकर्मीसँग बाट करटी उहाँ कहलै, “मै यहाँके सक्कु मतदाताहे व्यक्तिगत रूपमे नैचिन्ठु कना लागे । मने वर्षौसे करल जनसेवाके काम यहाँके नागरिकसे लग्गेसे नियल्ले बटै । अब्बे गाउँ–बस्ती पुगेबेर सोचलसे ढेर माया पैटी रहल बटु । यिहे माया ओ स्नेह मोर जित्न आधार हो ।”
उहाँक अनुसार निर्वाचन क्षेत्रके टमान गाउँ, टोल ओ बस्तीमे पुगेबेर विकास, रोजगारी, शिक्षा ओ स्वास्थ्यके विषयमे नागरिकसे राखल सुझावहे अपने प्राथमिकताके साथ नोट करटी रहल बटै । “मै करे सेक्ना केल्ह वाचा करटी रहल बटु । जनताके सुझाव सुन्टी बटु । जा जनतासे कहठै, उहे मोर प्राथमिकता रहठ,” उहाँ कहलै ।
ढुंगाना विशेष करके स्वास्थ्य ओ शिक्षाहे अपन मुख्य एजेन्डा बनाइल बटैले बटै । कैलाली–५ मे गुणस्तरीय स्वास्थ्य सेवा पहुँच अभाव, विशेषज्ञ चिकित्सकके कमी तथा सामुदायिक विद्यालयके शैक्षिक गुणस्तर सुधार आवश्यक रहल उहाँक कहाई बा । “स्वास्थ्य ओ शिक्षा बल्गर नैहुइटसम समग्र विकास सम्भव नैहो । स्थानीय तह ओ प्रदेशसँग समन्वय करके यी क्षेत्रमे ठोस पहल कैना प्रतिबद्धता व्यक्त करटु” उहाँ बटैलै ।
उहाँ युवाहे स्वरोजगारमुखी बनैना सीप विकास कार्यक्रम विस्तार, कृषि तथा साना उद्योग प्रवद्र्धन, सडक तथा खानेपानी पूर्वाधार सुधारहेफे प्राथमिकतामे धारल जानकारी डेलै । एमालेप्रतिके आकर्षण ओ अपन व्यक्तिगत कामके मूल्याङ्कनके आधारमे कैलाली–५ मे जित सुनिश्चित रहल दाबी उहाँ करलै ।
चुनावी मैदानमे टमान दलके उम्मेदवारबीच प्रतिस्पर्धा हुइटी रहल बेला ढुंगाना भर विकास ओ जनताके विश्वास अपन मुख्य आधार रहल उल्लेख करलै । “यी निर्वाचन केवल जित–हारके बाट नाही, आगामी पाँच वर्षके लाग विकासके मार्गचित्र तय कैना अवसर हो,” उहाँ थप्लै ।
