समुन्नत, समावेशी ओ विकासोन्मुख कैलाली–१ के लाग जनकराज चौधरीके संकल्प पत्र सार्वजनिक

पहुरा समाचारदाता
टीकापुर, ३ फागुन । नेपाली काँग्रेस के कैलाली क्षेत्र नम्बर १ के प्रतिनिधि सभा सदस्य उम्मेद्वार जनकराज चौधरीसे अपन विस्तृत संकल्प पत्र सार्वजनिक करले बटै । फागुन २१ गते हुइ जैटी रहल निर्वाचनहे लक्षित करटि आयोजित एक समारोहके बीच चौधरीसे “समुन्नत, समावेशी ओ विकासोन्मुख कैलाली क्षेत्र नं. १” निर्माण कैना दीर्घकालीन दृष्टिसहित प्रतिबद्धता सार्वजनिक करल हुइट ।

चौधरीसे सार्वजनिक करल संकल्प पत्रमे शिक्षा, कृषि, युवा तथा रोजगारी, पर्यटन, थारू समुदायके पहिचान, स्वास्थ्य, पूर्वाधार, वातावरण संरक्षण ओ सुशासनलगायतके विषयहे प्राथमिकतामे राखल बा । उहाँ “विकास सक्कुहुन्के लाग, अवसर सक्कुहुन के लाग” कना मूल मन्त्रके साथ समावेशी, आत्मनिर्भर ओ समृद्ध निर्वाचन क्षेत्र निर्माण कैना लक्ष्य आगे सारल बाटै ।

“शिक्षा लोकतन्त्र ओ विकासके मूल आधार हो” कना नारासहित चौधरी सामुदायिक विद्यालयके गुणस्तर सुधार, दक्ष जनशक्ति विकास, डिजिटल कक्षा सञ्चालन तथा अंग्रेजी ओ सूचना प्रविधि शिक्षामे जोड डेना योजना प्रस्तुत कर्ले बटै ।

इ क्षेत्रमे रहल प्राविधिक शिक्षालयह स्तरवृद्धि कैना सिटिईभिटी अन्तर्गतके कार्यक्रम सुदृढ बनैना उहा बटै । ओस्तेक करके कृषि विधालय, प्राकृतिक स्रोत व्यवस्थापन कलेज ओ टीकापुर पोलिटेक्निक इन्स्टिच्यूटसँग सहकार्य कर्के प्राविधिक तथा व्यावसायिक शिक्षाहे रोजगारीसँग प्रत्यक्ष जोर्ना योजना बा ।

गरिब, थारू, दलित, महिला तथा सीमान्तकृत समुदायके विद्यार्थीके लाग‘ सांसद छात्रवृत्ति कोष’ स्थापना कैना तथा स्पष्ट कार्यविधि बनाके कार्यान्वयन कैना प्रतिबद्धता जनाइल बा ।

ओस्टेक, टीकापुर बहुमुखी क्याम्पस, वीरेन्द्र विद्या मन्दिर क्याम्पस ओ रघुनाथ बहुमुखी क्याम्पसके भौतिक पूर्वाधार, प्रयोगशाला ओ पुस्तकालय सुदृढीकरण कैना उल्लेख बा। प्रारम्भिक तहमे मातृभाषा (थारू भाषा) मे आधारित शिक्षा प्रवद्र्धन कैना योजना फे संकल्प पत्रमे समेटल बा ।

“कृषि अर्थ व्यवस्थाके मेरुदण्ड हो” कना अवधारणासहित चौधरीसे सिँचाइ विस्तार, कृषि यान्त्रिकीकरण ओ जलवायु अनुकूल खेती प्रणालीमे जोड डेहल बटै। विशेष करके रानी जमरा कुलरिया सिँचाइ आयोजनाके विस्तार तथा प्रभावकारी कार्यान्वयनहे प्राथमिकता डेना बा ।

धान, गहुँ, मकै, तरकारी, माछापालन ओ पशुपालनमे व्यवसायिक कृषि प्रवद्र्धन, संकलन केन्द्र ओ शीतभण्डार स्थापना, कृषि प्रशोधन उद्योग विस्तार तथा किसानहे सहुलियत ऋण ओ बिमा सुविधा सुनिश्चित कैना योजना आगे सारल बा ।

थारू समुदायके परम्परागत कृषि ज्ञानहे आधुनिक प्रविधिसँग जोर्ना, युवाहे कृषि उद्यमशीलताओर आकर्षित कैना ओ कृषि स्टार्टअपके लाग ‘सिड मनी’ उपलब्ध करैनाअ नीति लेना उल्लेख बा।

टीकापुरमे स्थापना हुइल बा सुदूरपश्चिम विश्वविद्यालय अन्तर्गतके कृषि शिक्षालयसँग सहकार्य कर्के किसान–शिक्षक–विद्यार्थी बीच सहकार्यात्मक कार्यक्रम सञ्चालन कैना चौधरी बटैले ब्टै। साथे केरा, च्याउ, डेरी ओ मत्स्यपालन जैसिन उच्च मूल्यके कृषि उत्पादनमे वृद्धि कैना नीति निर्माणके पहल कैना बा ।

“विदेश नाहि, गाउँमे अवसर” कना नारासहित चौधरीसे युवा लक्षित कार्यक्रम आगे सर्ले बटै। सिप विकास तथा उद्यमशीलता केन्द्र स्थापना कैना, ‘पढि ओ कमाइ’ कार्यक्रम सञ्चालन कर्के बारिस्टा, डिजिटल मार्केटिङ, इभेन्ट म्यानेजमेन्ट, ग्राफिक डिजाइन, आतिथ्य सेवा लगायतके तालिम सञ्चालन कैन योजना सार्वजनिक करल बा ।

युजिसी नेपालदसे टीकापुर बहुमुखी क्याम्पसमे स्थापना करल इन्क्युबेशन सेन्टरसँग सहकार्य विस्तार कैना उल्लेख बा ।

वैदेशिक रोजगारीसे लौटल युवाके लाग पुनःस्थापना कार्यक्रम, सार्वजनिक–निजी साझेदारीमार्फत रोजगारी सिर्जना, श्रमिकके सामाजिक सुरक्षा सुनिश्चितता तथा प्रत्येक वर्ष सय जना युवाहे कृषि तथा उद्यमशीलता क्षेत्रमे ‘सिड मनी’ प्रदान कैना योजना फे समेटल बा ।

“अतिथि देव भवः” कना नारासहित चौधरी कैलाली क्षेत्र नं. १ हे पर्यटन सर्किटके रूपमे विकास कैना योजना आगे सारल बटै। टीकापुर पार्क, घोडाघोडी ताल, बर्दिया राष्ट्रिय निकुञ्ज ओ चिसापानी क्षेत्र जोर्ना पर्यटकीय मार्ग निर्माण कैना योजना बा ।

थारू सांस्कृतिक पर्यटन, होमस्टे प्रवद्र्धन, सांस्कृतिक एकाडेमी स्थापना तथा धार्मिक धरोहरके संरक्षणमे जोड डेना उल्लेख बा। पदमप्रकाशेश्वर ओ कैलाशेश्वर जस्ता धार्मिक स्थलके विकासमार्फत धार्मिक पर्यटन प्रवद्र्धन कैना योजना फे संकल्प पत्रमे समेटल बा । यहाँके चर्च, मदरसा, मन्दिर ओ गुम्बाके संरक्षण तथा धार्मिक सहिष्णुतामा जोड डेना उल्लेख बा ।

“पहिचान ओ सम्मानसहितके विकास” कनालक्ष्यसहित थारू भाषा, संस्कृति, कला ओ पर्वके संरक्षण तथा प्रवद्र्धन कैना प्रतिबद्धता व्यक्त करल बा। थारू सांस्कृतिक केन्द्र ओ सङ्ग्रहालय स्थापना, विकास प्रक्रियामा समान सहभागिता तथा सक्कु समुदायबीच सामाजिक सद्भाव सुदृढ कैना योजना प्रस्तुत करल बा ।

“स्वास्थ्य नागरिकके मौलिक अधिकार हो” कहटी चौधरीसे टीकापुर अस्पताल हे १०० शैय्यामे स्तरोन्नति कर्के विशेषज्ञ सेवा विस्तार कैनाघोषणा करले बटै ।

प्राथमिक स्वास्थ्य केन्द्रके स्तरोन्नति, चिकित्सक ओ औषधि आपूर्ति सुनिश्चितता, मातृशिशु स्वास्थ्य सेवा सुदृढीकरण, विपन्न वर्गके लाग स्वास्थ्य बिमामे सहज पहुँच ओ महिला स्वास्थ्य स्वयंसेविकाहे थप प्रभावकारी बनैना नीति समेटल बा ।

सडक, सिँचाइ, ऊर्जा ओ सूचना प्रविधिमा विशेष जोड डेटी चौधरी टीकापुर–सनकट्टी, टीकापुर–जोशीपुर–भजनी तथा अन्य ग्रामीण सडक कालोपत्रे कैना प्रतिबद्धता जनैले बटैं ।

सेती लोकमार्ग निर्माणमे तीव्रता, कर्णाली करिडोर विस्तार, जल यातायात ओ जल पर्यटन प्रवद्र्धन, तथा दीर्घकालमे टीकापुर क्षेत्रमे सुख्खा बन्दरगाह (ड्राइ पोर्ट) निर्माणके पहल कैना उल्लेख बा । साथै रानी–जमरा–कुलरिया सिँचाइ आयोजनासे उत्पादित विद्युतमे स्थानीयबासीके स्वामित्व सुनिश्चित कैना कहल बा ।