काँग्रेस कैलाली–५ मे ‘मोर १५ दिन पार्टीहे’ अभियान सुरू
पहुरा समाचारदाता
धनगढी, ५ फागुन । फागुन २१ गते हुइना प्रतिनिधि सभा सदस्यके निर्वाचनके तयारी अन्तर्गत नेपाली काँग्रेससे आपन विशेष जनसञ्चार अभियान ‘मोर १५ दिन पार्टीहे’ सुरू करले बा ।
इ अभियान अन्तर्गत पार्टीके सक्कु तह ओ तप्काके कार्यकर्ताहे आपन पदीय जिम्मेवारी कुशलतापूर्वक निर्वाह कैके नेपाली काँग्रेसके उम्मेदवारहे विजयी बनैना सक्रिय हुइना आह्वान करल बा ।
पार्टी प्रवक्ता अनुसार, अभियानके मुख्य उद्देश्य घर–घर, टोल–टोल, वडा–वडा ओ शहर–शहरमे पार्टीके झण्डा फहरैटी जनमत सिर्जना कैना हो । कार्यकर्तासे १५ दिनसम लगातार प्रचार–प्रसार, भेटघाट ओ जनसम्पर्क संलग्न रहिके नेपाली काँग्रेसके उम्मेदवारके पक्षमे व्यापक समर्थन जुटैना योजना बनाइल बा ।
उ अभियानके माध्यमसे नेपाली काँग्रेससे आम नागरिकसँग प्रत्यक्ष संवाद कैटी पार्टीके नीति, कार्यक्रम ओ उम्मेदवारके योग्यताबारे जानकारी डेजैना बा । पार्टीके मुख्य उम्मेदवार नर नारायण शाह ‘मनु’ के पक्षमे जनमत जुटैना ओ निर्वाचनमे विजयी बनैना उद्देश्यसे इ १५ दिने अभियान अत्यन्त महत्वपूर्ण मानल बा ।
पार्टीके नेताहुक्रे सक्कु तहके कार्यकर्ताहे व्यक्तिगत रुपमे सक्रिय हुइट, टोल–वडा स्तरमे बैठक, घरदैलो भ्रमण ओ सामाजिक संजालमार्फत प्रचार प्रसार कैना निर्देशन डेहल बटै । विशेष कैके अभियानके प्रत्येक दिनहे रणनीतिक रूपमे विभाजन कैके जनमत सिर्जनामे उच्चतम प्रभाव पर्र्ना योजना बनाइल बा ।
क्षेत्रीय सभापति भिम पडालसे जारी विज्ञप्तीमे कहल बा, ‘पार्टीसे स्थानीय तहके प्रतिनिधि, युवासमिति ओ महिला सञ्जालहे फेन अभियानमे संलग्न करैटी समाजके सक्कु वर्गमे पार्टीके पहुँच विस्तार कैना लक्ष्य राखल बा । अइसीक १५ दिनसम निरन्तर सक्रिय रहेबर नेपाली काँग्रेससे आगामी निर्वाचनमे मजबुत जनसमर्थन हासिल कैना विश्वास लेहल बा ।’
उहाँ कहलै, ‘मोर १५ दिन पार्टीहे’ कना संकल्पसहित आपन टोल ओ घरमे पार्टीके झण्डा फहरैटी सक्रिय परिचालनमे जुट्ना ओ पार्टीके उम्मेदवारहे विजयी बनैना आपन योगदान डेहे परल ।’
