स्कारपियो दुर्घटनाः एक जानेक मृत्यु

पहुरा समाचारदाता
धनगढी, ५ फागुन । कैलाली जिल्लाको कैलारी गाउँपालिका–१ स्थित हुलाकी सडक खण्डमे मंगर दुपहर हुइल सवारी दुर्घटनामे एक महिलाके ज्यान गैल बा । कलेसे तीन जाने घाहिल हुइल बटै ।

जिल्ला प्रहरी कार्यालय कैलालीके अनुसार दुपहर करिब ३ बजेओर कैलारी–१ हुलाकी रोडमे विपरीत दिशासे अइटी रहल स्कारपियो गाडी ओ मोटरसाइकल एक आपसमे टक्राके दुर्घटना हुइल हो । दुर्घटनामे परके गम्भीर घाहिल हुइल मोटरसाइकल चालक कैलारी गाउँपालिका–५ बैठना अन्दाजी ३०–३५ वर्षीया ईप्सा चौधरीके उपचारके क्रममे नवजिवन अस्पतालमे मृत्यु हुइल प्रहरी जनैले बा ।

प्रहरीके अनुसार कैलारी गाउँपालिका–७ के वडा अध्यक्ष दिपेन्द्र बमसे चलाइल भे १ च ४२७५ नम्बरके महेन्द्रा कोरेक्स (स्कारपियो) ओ से ५ प २७८२ नम्बरके मोटरसाइकल एकआपसमे टक्राके उ दुर्घटना हुइल हो । स्कारपियोमे सवार कैलारी–७ के ५० वर्षीय तारा चौधरी गम्भीर घाहिल बटै ।

उहाँक नवजिवन अस्पतालमे उपचार हुइटी रहल बा । ओस्टेक करके उहे गाडीमे सवार ३४ वर्षीय बलिराम चौधरीके शरीर तथा बायाँ हातमे चोट लागल बा । कलेसे ३१ वर्षीय कमलेस चौधरीके बायाँ गोरमे चोट लागल प्रहरी जनैले बा । बलिरामके अवस्था मध्यम ओ कमलेसके अवस्था सामान्य रहल बटाइल बा ।

दुर्घटनामे संलग्न गाडी चालक तथा वडा अध्यक्ष बमके मुखमे सामान्य चोट लागल रहे । प्राथमिक उपचारपाछे उहाँहे जिल्ला प्रहरी कार्यालय कैलाली नियन्त्रणमे लेले बा । जिल्ला प्रहरी कार्यालय कैलालीके प्रवक्ता प्रहरी नायब उपरीक्षक योगेन्द्र तिमिल्सिनासे घटनाबारे थप अनुसन्धान हुइटी रहल जानकारी डेले बटै । दुर्घटनाके कारण खुल्न बाँकी रहल प्रहरी जनैले बा ।