राससके ६५औँ वार्षिकोत्सव सम्पन्न
पहुरा समाचारदाता
धनगढी, ७ फागुन । राष्ट्रिय समाचार समिति (रासस) के ६५औँ वार्षिकोत्सव समारोह सम्पन्न हुइल बा ।
स्थानीय सञ्चारमाध्यम तथा रासस सेवाग्राहीके सहभागितामे आयोजित कार्यक्रममे सुदूरपश्चिम प्रदेश सरकारके आन्तरिक मामिला तथा कानुन मन्त्री हिरा सार्की बर्का पहुना रहल रहिट ।
कार्यक्रममे बर्का पहुना मन्त्री सार्की रासससे जनताके आवाज राज्यसम पुगैना महत्वपूर्ण भूमिका खेलल् बटाइल रहिट । पत्रकारहुक्रे सत्यतथ्यमे आधारित समाचार उठान करेबर सरकारहे काम कैना सहज हुइना अनुभव अपने पाइल उल्लेख करल रहिट । मन्त्री सार्की मिडिया राज्यके चौथौ अङ्ग रहल बटैटी सरकारहे मिडिया खबरदारी कैके सहयोग करे पर्ना बटाइल रहिट । उहाँ मिडियाके खबरदारीहे सकारात्मक रुपमे लेके आघे बह्रे पर्ना फेन बटाइल रहिट ।
नेपाल पत्रकार महासंघके सुदूरपश्चिम प्रदेश अध्यक्ष भरत शाह कौनो दलप्रति झुकाव नैराखके सत्य ओ तथ्यमे आधारित पत्रकारिता करे पर्ना जोड डेहल रहिट ।
ओस्टके पत्रकार महासंघके प्रदेश महासचिव शिवराज भट्ट रासस आपन सेवाहे समयअनुकूल परिवर्तन करे पर्ना बटाइल रहिट । उहाँ समाचारदाता नियुक्तिमे नै समस्या हुइल ओरसे सुधारके आघे बह्रे पर्ना सुझाव डेहल रहिट ।
कैलाली अध्यक्ष श्रवण देउवा राससके कारण छोट मिडिया फेन लाभ लेटी रहल उल्लेख कैटी आगामी निर्वाचनहे दृष्टिगत कैके सक्कु राजनीतिक दलप्रति सन्तुलित समाचार सम्प्रेषण करे पर्ना धारणा राखल रहिट ।
कार्यक्रममे नेपाल पत्रकार महासंघके पूर्वअध्यक्ष हिमाल जोशी कैलालीमे राससके सेवा विस्तार प्रभावकारी बनाइ पर्र्ना आवश्यकता औंल्याइल रहिट । उहाँ जनताके आवाज केन्द्रसम पुगाइक लाग रासस आउर सक्रिय भूमिका खेले पर्ना बटाइल रहिट ।
कार्यक्रममे वक्ताहुक्रे ६५औँ वार्षिकोत्सवके अवसरमे शुभकामना व्यक्त कैटी आगामी दिनमे रासससे आउर प्रभावकारी, निष्पक्ष ओ जनमुखी सेवा अपेक्षा करल बटाइल रहिट । कार्यक्रम राससकर्मी मीन ठकुरीके अध्यक्षतामे सम्पन्न हुइल रहे । स्वागत मन्तब्य राससकर्मी गगन ऐडी करल रहिट कलेसे सञ्चालन सुरेन्द्र ताम्राकार करल रहिट ।
