कैलाली ४ के उम्मेदवार भट्टके चुनावी प्रतिवद्धतापत्र सार्वजनिक
पहुरा समाचारदाता
धनगढी, ७ फागुन । नेपाल कम्युनिष्ट पार्टी (एमाले)के ओरसे प्रतिनिधि सभा सदस्य निर्वाचन क्षेत्र नम्बर ४, कैलालीके उम्मेदवार लेखराज भट्ट आपन चुनावी प्रतिबद्धता पत्र सार्वजनिक करले बटै । बिफेक रोज आपन निवासमे पत्रकार सम्मेलनके आयोजना कैटी उहाँ प्रतिबद्धता पत्र सार्वजनिक करल हुइट ।
प्रतिबद्धता पत्रमे उहाँ शिक्षा, स्वास्थ्य, कृषि आधुनिकीकरण, औद्योगिकीकरण, पर्यटन प्रवद्र्धन ओ भौतिक पूर्वाधार विकासहे प्राथमिकतामे राखल बटैले बटै । प्रतिबद्धता पत्रमे सुदूरपश्चिम प्रदेश तथा कैलाली जिल्लाके समग्र विकासहे केन्द्रमे राखके योजना आघे सारल उल्लेख बा ।
शिक्षा क्षेत्र ओर सामुदायिक विद्यालयमे गुणस्तरीय शिक्षा प्रवाह, प्रविधिमैत्री शिक्षण प्रणाली विस्तार तथा आवश्यक भौतिक पूर्वाधार निर्माण कैना उल्लेख बा । शिक्षक तथा कर्मचारीके सेवा–सुविधा सुधार, पेशागत सुरक्षा ओ सामाजिक सुरक्षा कोषमे आबद्ध करैना पहल कैना प्रतिबद्धता जनाइल बा ।
स्वास्थ्यओर आधारभूत स्वास्थ्य केन्द्र तथा शहरी स्वास्थ्य क्लिनिकमे विशेषज्ञ सेवा विस्तार, आवश्यक जनशक्ति ओ उपकरण व्यवस्थापनमे जोड डेना जनाइल बा । महिला, बालबालिका तथा ज्येष्ठ नागरिकहे लक्षित गुणस्तरीय स्वास्थ्य सेवा उपलब्ध करैना तथा स्वास्थ्य बीमा कार्यक्रमहे प्रभावकारी बनैना योजना फेन आघे सारल बा ।
सुदूरपश्चिम प्रदेशमे रहल शहीद दशरथ चन्द स्वास्थ्य विज्ञान विश्वविद्यालयहे ६०० शय्याके अस्पतालके रूपमे विकास कैके एमबीबीएस अध्ययन सञ्चालनके लाग पहल कैना प्रतिबद्धता पत्रमे उल्लेख रहल बा ।
कृषकहे आधुनिक कृषि प्रविधि, उन्नत बीउ, मल तथा यान्त्रिकीकरणमे जोड डेना जनाइल बा । सिँचाइ सुविधा विस्तार, कृषि उपजके उचित मूल्य निर्धारण, कृषि बीमा ओ कृषि आधारित उद्योग स्थापनाके लाग पहल कैना प्रतिबद्धता व्यक्त करल बा । आवश्यक रासायनिक मलके उपलब्धताके लाग उत्पादन केन्द्र स्थापना कैना योजना समेत समावेश बा ।
तरकारी तथा फलफूल पकेट क्षेत्र विकास, कृषि उपज भण्डारणके लाग शीत भण्डार निर्माण तथा कृषिमे आधारित बजार व्यवस्थापन कैना कार्यक्रम आघे सारल बा । स्थानीय उत्पादनके संरक्षण ओ प्रवद्र्धनके लाग किसानहे बीउ, बिजन ओ मलखाद सहज रूपमे उपलब्ध करैना प्रतिबद्धता जनाइल बा ।
औद्योगिक क्षेत्र विस्तार, हरेक औद्योगिक कोरिडोर विकास तथा कृषि ज्ञान केन्द्र स्थापना कैके रोजगारीके अवसर सिर्जना कैना योजना सार्वजनिक करल बा । दलित, पिछरल समुदाय तथा गरिबीके रेखाटर रहल नागरिकके लाग सीपमूलक तालिम सञ्चालन कैके आत्मनिर्भर बनैना कार्यक्रम समेटल बा ।
उहाँ धार्मिक तथा सांस्कृतिक स्थलहे धार्मिक पर्यटकीय सर्किटके रूपमे विकास कैना उल्लेख बा । थारू, मगर लगायतके समुदायके सांस्कृतिक सम्पदाके संरक्षण तथा सांस्कृतिक संग्रहालय स्थापना कैना योजना आघे सारल बा । होमस्टे प्रवद्र्धन, नेपाल ताल लगायतके तालतलैयाके संरक्षण ओ पर्यटन प्रवद्र्धनमार्फत आन्तरिक तथा बाह्य पर्यटक आकर्षित कैना कार्यक्रम समावेश रहल बा ।
निर्वाचन क्षेत्रभिट्टर आवश्यक सडक निर्माण, स्तरोन्नति ओ विस्तार, मोटरेबल पुल तथा झोलुंगे पुल निर्माणके लाग पहल कैना जनाइल बा । बारह्, पहिरो तथा नदीजन्य कटानसे प्रभावित क्षेत्र संरक्षणके लाग तटबन्ध निर्माण कैना योजना फेन समावेश रहल बा । विद्युतीकरण नैरहल बस्तीमे विद्युत विस्तार ओ खानेपानी व्यवस्थापनमे जोड डेना प्रतिबद्धता जनाइल बा ।
उम्मेदवारसे लोकतन्त्रके मूल आधार जनमत रहल उल्लेख कैटी विकास, स्थायित्व ओ समृद्धिके लाग आपनहे पुनः निर्वाचित कराइक लाग मतदातासँग अपिल करले बटै । इ क्षेत्रके समग्र विकासके लाग सक्कु नागरिकके साथ ओ सहयोग आवश्यक रहल उल्लेख कैटी आपन प्रतिबद्धता कार्यान्वयनमे लन्ना दाबी करले बटै ।
