जेन्जीके आवाजहे नीतिमे परिणत कैना प्रतिबद्ध बटु : मनु
पहुरा समाचारदाता
धनगढी, ७ माघ । प्रतिनिधि सभा निर्वाचन, कैलाली क्षेत्र नम्बर ५ के नेपाली कांग्रेस उम्मेदवार नर नारायण शाह ‘मनु’ इ बेला चुनावी घरदैलो अभियानहे तीव्र बनैले बटै ।
विशेष कैके युवापुस्ताके मुद्दा, रोजगारी, सूचना प्रविधि ओ उद्यमशीलताहे केन्द्रमे रख्टी उहाँ “जेन्जीके आवाजहे नीतिमे रूपान्तरण कैना” प्रतिबद्धता व्यक्त करले बटै । घरदैलो, टोलभेला ओ भेटघाटके क्रममे युवा मतदाता रोजगारी अभाव, विदेश पलायन, डिजिटल अवसरके कमी, लागूपदार्थ दुव्र्यसन जैसिन मुद्दा जोडतोडसे उठैटी रहल बटै ।
कतिपय आक्रोस फेन पोख्ले बटै । मने उम्मेदवार शाह भर उ गुनासा विनम्रतापूर्वक सुन्टी “झुटा वाचा नैकैना, करे सेक्ना किल प्रतिबद्धता कैना” अडानमे डेखल बटै । “जेन्जीके आवाजहे नीतिमे परिणत कैना आजके आवश्यकता हो । युवाहे विदेश नैपठाके, स्वदेशमे अवसर सिर्जना कैना मोर प्राथमिकता हो ।”
कैलाली क्षेत्र नम्बर ५ के नेपाली काँग्रेसके उम्मेदवार नर नारायण शाह ‘मनु’ कहलै, “आधुनिक सूचना प्रविधि पार्क स्थापना कैके युवाहे आईटी, डिजिटल सीप ओ स्टार्टअपसँग जोरम । युथ डाईलग ओ ईन्नोभेसन प्ल्याटफर्म मार्फत युवाके विचार सिढे नीति निर्माण प्रक्रियामे पुगैबु । युवा–मैत्री रोजगारी नीति निर्माणके लाग संसदमे सशक्त आवाज उठैबु ।”
युवाहे स्वरोजगार बनाइक लाग तालिम, सीप, उद्यमशीलता विकास कार्यक्रम तीनु तहके सरकारसँग समन्वय कैके सञ्चालन कैना उहाँके कहाइ रहल बा । लागूपदार्थ दुव्र्यसन रोकथामके लाग अभिभावक, विद्यालय ओ प्रशासनसँग सहकार्यमे अभियान चलैना योजना फेन मनुके रहल बा । उहाँ मतदाताहे आपन योजना ओ प्रतिबद्धता मार्फत मत मग्टी रहल बटै । मने उहाँ करे नैसेक्ना कामके आश्वासन डेहे नैसेक्ना अडान रख्टी आइल बटै ।
कैलाली क्षेत्र नम्बर ५ मे इ बेर चुनावी बहस विकाससँगे “युवा भविष्य” केन्द्रित डेखल बा । पूर्वाधार, स्टार्टअप ईकोसिस्टम, स्वरोजगार, दुव्र्यसन नियन्त्रण ओ युवा–मैत्री नीति निर्माणके एजेन्डा आघे सरटी उम्मेदवार नर नारायण शाह ‘मनु’ मतदातामाझ पुगल बटै ।
