सुभारम्भ मन्टेश्वरीके छैटौँ वार्षिकोत्सव
पहुरा समाचारदाता
धनगढी, ७ फागुन । धनगढी उपमहानगरपालिका–८ मे सुभारम्भ मन्टेश्वरी स्कुलके छैटौँ वार्षिकोत्सव विविध कार्यक्रमके साथ सम्पन्न हुइल बा ।
विद्यालयके संस्थापक प्रिन्सिपल जानकी भट्टके अध्यक्षता तथा धनगढी उपमहानगरपालिकाके उपप्रमुख कन्दकला कुमारी रानाके प्रमुख आतिथ्यतामे कार्यक्रम हुइल हो । कार्यक्रममे सम्बोधन करटी उपप्रमुख राना मन्टेश्वरी शिक्षाके विकासमे सुभारम्भसे महत्वपूर्ण भूमिका खेलल बटैली । बालबालिकाहे छोटसे संस्कारयुक्त ओ व्यवहारिक शिक्षा डेहे सेक्लेसे उज्ज्वल भविष्य निर्माण करेसेक्ना उहाँ बटैली ।
वडा नम्बर ८ के वडा अध्यक्ष जुगराम चौधरी बालबालिकाके भविष्य निर्माणके लाग सकारात्मक, रचनात्मक तथा व्यवहारिक दिशा निर्देशसहित सहज वातावरणमे शिक्षासँगे संस्कारके पाठ सिखाईपर्ना आवश्यकता औंल्यइलै ।
कार्यक्रमके विशिष्ट अतिथि प्याब्सन धनगढीके नगर सभापति धुव्र सिंह बालबालिका सबल ओ सक्षम हुइलेसे देशके जग बल्गर हुइना धारणा व्यक्त करलै ।
धनगढी नमुना माध्यमिक विद्यालयके प्रधानाध्यापक लक्ष्मण दत्त भट्ट लगायतसे शुभकामना मन्तव्य व्यक्त करल रहिट ।
वार्षिकोत्सवके अवसरमे स्वास्थ्य क्षेत्रमे योगदान डेहल बाल रोग विशेषज्ञ डा. प्रदिप मिश्र, हिमालयन गौरीशंकर डेन्टलके सञ्चालक रतन एसके, अन्तर्राष्ट्रिय कराँते रेफ्री प्रकाश कुमार चन्द, कला साहित्य क्षेत्रमे योगदान पुगाइल किङस मोसन डान्स सेन्टरके आदर्श महतोंहेफे सम्मान करल बा ।
विद्यालयके सञ्चालक मोहनराज ओझाके अनुसार विद्यालयमे मन्टेश्वरी तालिम प्राप्त शिक्षिकासे मन्टेश्वरी विधिअनुसार शिक्षण–सिकाइ करटी आइल बा ।
