निर्वाचन परिवेक्षक अभिमुखीकरण कार्यक्रम सम्पन्न
पहुरा समाचारदाता
धनगढी, ८ फागुन । सुदूरपश्चिम प्रदेशमे आगामी प्रतिनिधि सभा निर्वाचनहे स्वच्छ, निष्पक्ष ओ विश्वसनीय बनैना लक्षित करटी निर्वाचन परिवेक्षकहुकनके लाग अभिमुखिकरण कार्यक्रम कैगिल बा ।
नियोकके प्रदेश अध्यक्ष देवी प्रसाद खनालके अध्यक्षता तथा नियोकके आयोजनामे हुइल कार्यक्रममे केन्द्रीय समितिके प्रतिनिति, प्रदेश प्रतिनिधि, जिल्ला स्तरीय प्रतिनिधि सहभागी रहिट ।
कार्यक्रममे सहभागी परिवेक्षकहुकनहे निर्वाचनसम्बन्धी कानुनी व्यवस्था, आ्चारसंहिता, मतदान केन्द्रमे पालना करेपर्ना प्रक्रिया, मानवअधिकारके संरक्षण, प्रतिवेदन लेखन तथा सूचना व्यवस्थापनके विषयमे प्रशिक्षण डेहल रहे । निर्वाचन अवधिभर निष्पक्ष रूपमे अवलोकन करके यथार्थ प्रतिवेदन तयार पर्ना विशेष जोड डेहल आयोजक जनैले बा ।
अभिमुखिकरणमे निर्वाचन आयोगके प्रतिनिधि, नागरिक समाजके अगुवा, सञ्चारकर्मी तथा टमान जिल्लासे आइल परिवेक्षकहुकनके सहभागिता रहे । प्रशिक्षकहुक्रे पारदर्शिता, उत्तरदायित्व ओ मतदाताके विश्वास अभिवृद्धि कैना परिवेक्षकके भूमिका महत्वपूर्ण हुइना बटैलै ।
नव उर्जावान युवाके जोश राजनीति सचेतना समेटन करके सुदुरपश्चिमके १० जाने नवयुवा (जेन्जी) परिवेक्षकहुक्रेफे टमान निर्वाचन स्थलमे परिवेक्षणमे सहभागी हुइना बाट जेन्जी परिवेक्षक प्रतिनिधि पदम धामी जानकारी डेलै । उहाँके अनुसार प्रदेशके टमान जिल्लामे खटन परिवेक्षकहुक्रे मतदान पूर्व, मतदान डेना ओ मतदान पश्चात् चरणमे अनुगमन करके प्रतिवेदन केन्द्रमे बुझैही । यिहीसे निर्वाचन प्रक्रियाहे अन्तर्राष्ट्रिय मान्यताअनुसार व्यवस्थित बनैना सहयोग पुग्न विश्वास व्यक्त करल बा ।
कार्यक्रम निर्वाचनमे स्वच्छ निस्पक्ष भयरहित बतावरणमे सम्पन्न कैना नियोकके केन्द्रीय उपाध्यक्ष देवकी तिमिल्सिना सामु परिवेक्षकहुक्रे सपथ ग्रहण करल रहिट ।
