एसइईमे ४ जिपिए ल्यनुइयाहे विद्यार्थीहे ल्यापटपसहित सम्मान
पहुरा समाचारदाता
धनगढी, ८ फागुन । कैलालीके धनगढीमे रहल एरिष्टो इंगलिस बोर्डिङ स्कूलके ३३औँ वार्षिकोत्सव तथा अभिभावक दिवस कार्यक्रम शुकके रोज सम्पन्न हुइल बा ।
विद्यालयके संस्थापक तथा कोडनेटर शान्ति अधिकारी क्षेत्रीके अध्यक्षतामे हुइल कार्यक्रममे कैलाली बहुमुखी क्याम्पसके पूर्व क्याम्पस प्रमुख प्राध्यापक डा. धर्मराज उपाध्याय प्रमुख अतिथि रहल रहिट ।
कार्यक्रममे बोल्टी उहाँ एरिष्टो माध्यमिक विद्यालय समयअनुकूल तथा युगसे माग करल गुणस्तरीय शिक्षा प्रदान करटी आइल बटैलै । एसइईके परिक्षामे दुई जाने विद्यार्थी ४ जिपिए ल्यानके सुदूरपश्चिममे इतिहास रचल उहाँ बटैलै ।
विशिष्ट पहुना धनगढी उपमहानगरपालिका वडा नम्बर ८ के वडा अध्यक्ष जुगराम चौधरी यी विद्यालयमे अध्ययनरत रहल विद्यार्थी पह्राईसंगे सांस्कृतिक रुपमे अब्बल डेखल बटैलै ।
कार्यक्रममे प्याब्सन कैलालीके अध्यक्ष धुर्व बहादुर सिंह, नाष्ट कलेजके निर्देशक शिवहरि मुडभरी शर्मा, धनगढी माविके प्रिन्सिपल लक्ष्मणदत्त भट्टलगायत मन्तव्य राखल रहिट ।
विद्यालयके संस्थापक प्रिन्सिपल हरि क्षेत्री विद्यालयके आर्थिक तथा प्रशासनिक प्रतिवेदन सुनैती यी विद्यालय २०४९ सालमे ४० जाने विद्यार्थीनसे भर्ना करके सुरुवाट विद्यालयमे आज २२ सय विद्यार्थी रहल बटैलै । विद्यालयमे १२८ जाने शिक्षक कर्मचारी कार्यरत रहल ओ ओइनहे सरकारी स्केलमे तलव डेटी रहल उहाँ बटैलै ।
विद्यालयके संस्थापक शान्ति अधिकारी क्षेत्री अभिभावकहुकनके विश्वास ओ सहयोगके कारण विद्यालय निरन्तर सफलता हासिल करटी रहल ओरसे अब्बे प्लस टु संचालन कैना सफल हुइल बटैली ।
यिहे विच गैल बरसके एसइईके परिक्षामे ४ जिपिए ल्यनुइया गौरव उपाध्याय, प्रदीप गिरीहे विद्यालयसे ल्यापटप सहित सम्मान करल बा । कलेसे ४ जिपिए ल्यनुइया दुसर विद्यालयके जस्तिन चन्द ओ अशोक अवस्थीहेफे सम्मान कैगिल बा ।
