उज्यालो नेपाल पार्टीके चुनावी घोषणा सभा
पहुरा समाचारदाता
धनगढी, ९ फागुन । कैलालीके अत्तरियामे शनिच्चर उज्यालो नेपाल पार्टीके चुनावी घोषणा सभा आयोजना करले बा । पार्टीके अध्यक्ष कुलमान घिसिङके प्रमुख अतिथियतामे आयोजना कैना तय करल कार्यक्रममे न्यून जनसहभागिता रहे । कलेसे कुलमान घिसिङ कार्यक्रममे सहभागी नैहुइलै ।
आयोजकसे कार्य व्यस्तताके कारण कुलमान आई नैसेक्ना बटैलेसेफे अत्तरियाके महोत्सव स्थलके भारी मैदानमे करल कार्यक्रम जनसहभागिता न्यून हुके कुलमान नैल्यानल पार्टीके कुछ नेता बटैले बटै । कार्यक्रममे कुलमान घिसिङ नैआइलपाछे पार्टीके उपाध्यक्ष एवम् जेनजी अगुवा राजेश प्रतेलहे प्रमुख अतिथि बनाइल सभा समापन करल रहे ।
सभाहे सम्बोधन करटी उहाँ जेन जी आन्दोलन पुरान भ्रष्टाचारीहे फ्याँकके नयाँ भ्रष्टाचारी ल्यानेक लाग नैहुइल कहटी जनेजी आन्दोलनके भावना अनुसार काम नैहुइल बटैलै ।
‘जेन जी आन्दोलन मुलुकसे भ्रष्टाचार हटे परठ कना उद्देश्यके साथ हुइल रहे’ उहाँ कहलै ‘अब्बे नयाँ शक्ति हम्रे हुई, हम्रे भ्रष्टाचार न्यूनीकरण कैबी कहिके आइल बटै । मने, ओइनके सभापति भ्रष्टाचारमे मुछल बटै ।’
उहाँ अब अपन जैसिन अङ्ग गुमाके बैठे नपरे कहक लाग लहर, भीडके पाछे नैलागके देश विकासके काम कैना पार्टीहे जिटैना आवश्यक रहल बटैलै । अपने अपनहे काम करके प्रमाणित व्यक्ति कुलमान घिसिङ हुइल ओरसे उहाँ नेतृत्व करल पार्टीहे जिटाई पर्ना उहाँ बटैलै ।
कार्यक्रममे बोल्टी कैलाली क्षेत्र नम्बर ४ के प्रतिनिधि सभा उम्मेदवार सुवास कुँवर अबफे वादके पाछे लागके देश नैबन्न बटैलै । उहाँ गरिब ओ पाछे परल जनताके आवाज बन्न प्रयास कैना कहल राजनीति हुइल बटैटी वाद जाती धर्मके आधारमे विभाजित करके देश नैबन्न बटैलै ।
‘यी देशमे बैठना सक्कु नेपालीके समान अधिकार हुई परठ’ उहाँ कहलै ‘यी देश बनाइक लाग कुलमान घिसिङके नेतृत्वमे अपनेहुक्रे चुनावमे होमल बटी ।’
कैलाली क्षेत्र नम्बर ५ से प्रतिनिधि सभा उम्मेदवार बनल चन्द्र साउँद अपनेहुक्रे सडकके मनै हुइल ओरसे, हटलेसेफ जिटलेसे सडकमे रहना बटैलै । उहाँ अपने जनताके भावना, आवश्यकताके लाग बोल्न बटैलै । देश कालाबजारीया, माफियाके चुङ्गुलमे परल बटैटी उहीसे देशहे निकर्ना आवश्यक रहल बटैलै ।
