“चुनावी प्रतिस्पर्धा मर्यादित बनाइ”
पहुरा समाचारदाता
धनगढी, ९ फागुन । कैलाली क्षेत्र नम्बर ५ के प्रतिनिधि सभा सदस्य उम्मेदवार नर नारायण शाह ‘मनु’ अपन कार्यकर्ताहे अन्य उम्मेदवारके विषयमे नकारात्मक टिप्पणी नैकैना स्पष्ट निर्देशन डेले बटै ।
आसन्न निर्वाचनहे लक्षित करटी आयोजित घरदैलो चुनावी कार्यक्रम ओ आन्तरिक बैठकमे बोल्टी उहाँ चुनावी प्रतिस्पर्धा मर्यादित, सभ्य ओ सकारात्मक हुईपर्नामे जोड डेहल हुइट ।
उम्मेदवार मनु निर्वाचन लोकतान्त्रिक अभ्यासके महत्वपूर्ण माध्यम हुइल ओरसे यिहीहे स्वस्थ ओ अनुशासित बनैना सक्कु कार्यकर्तासे जिम्मेवार भूमिका निर्वाह करेपर्ना बटैले रहिट । उहाँ सामाजिक सञ्जाल, सार्वजनिक सभा, घरदैलो कार्यक्रम तथा भेटघाटके क्रममे कौनोफे उम्मेदवारके व्यक्तिगत जीवन, चरित्र वा निजी विषयमे टिप्पणी नैकैना आग्रह करले बटै । उहाँ निर्वाचन अभियानहे मुद्दामुखी बनाईपर्नामे जोड डेटी अपन एजेन्डा, योजना ओ विकासके प्रतिबद्धता जनतामाझ स्पष्ट रूपमे प्रस्तुत कैना कार्यकर्ताहे सुझाव डेले बटै ।
मतदाताहे भ्रमित पर्ना, अपुष्ट आरोप लगैना वा उत्तेजना फैलैना गतिविधिहे दुर रना उहाँ निर्देशन डेले बटै ।
मनु सकारात्मक सोच ओ व्यवहारसे केल्ह जनताके विश्वास जिटे सेक्ना उल्लेख करटी सम्मानजनक राजनीतिक संस्कार स्थापित कैना सक्कुहुनहे जिम्मेवार बन्न आग्रह करले बटै । उहाँ प्रतिस्पर्धी उम्मेदवारप्रति सम्मान कायम रख्टी अपन कार्यक्रम ओ योजनाके आधारमे मत मग्ना कार्यकर्ताहे निर्देशन डेले बटै ।
उहाँक अनुसार स्वस्थ ओ निष्पक्ष प्रतिस्पर्धासे केल्ह लोकतान्त्रिक मूल्य–मान्यताहे मजबुत बनैना विश्वास व्यक्त करल बा । चुनाव केवल जित–हारके विषय केल्ह नैहुके जनताके सेवा कैना अवसर हुइल ओरसे सभ्य ओ शालीन व्यवहार प्रदर्शन करेपर्ना उहाँ बटैलै ।
मनु चुनावी अभियानहे सिर्जनात्मक, सकारात्मक ओ जनमुखी बनैना सक्कु कार्यकर्ताहे एकताबद्ध हुके लग्ना आह्वान करले बटै । उहाँ कैलाली क्षेत्र नम्बर ५ के विकास ओ समृद्धिके लाग स्पष्ट योजना ओ प्रतिबद्धता सहित अपने मतदातामाझ पुगल उल्लेख करटी सकारात्मक अभियानसे मजा सन्देश जैना विश्वास व्यक्त करले बटै ।
