प्रगतिशिल सामुदायिक वनके ३२औं वार्षिकोत्सव

पहुरा समाचारदाता
पहलमानपुर, १० फागुन । कैलालीके भजनी नगरपालिका वडा नम्बर ४ धनौरामे रहल प्रगतिशिल सामुदायिक वन उपभोक्ता समुहके ३२औं वार्षिक साधारण सभा तथा सार्वजनिक सुनुवाई कार्यक्रम अँटवार रोज सम्पन्न हुइल बा ।

समुहके अध्यक्ष दिपक चौधरीके घरगोस्याईमे हुइल कार्यक्रममे वरका पहुना सुदूरपश्चिम प्रदेश सभा सदस्य माननीय घनश्याम चौधरी रहल रहिट । विशिष्ट पहुना वडा नम्बर ४ के वडा अध्यक्ष जनता राम चौधरी ओ पूर्व मेयर शेरबहादुर चौधरी रहल रहिट ।

कार्यक्रममे सिएफसीसी भजनीके अध्यक्ष खोजराम चौधरी, सब डिभिजन वन कार्यालयके वन रक्षक अंकित चौधरी, कालीराम चौधरीलगायतसे वन संरक्षण करेक लाग मनभिटरसे इच्छा हुईपर्ना बटैलै ।

एहे अवसरमे टमान संघसंस्थाहे कुर्सी वितरण, एकल महिलाहुकनहे झुल वितरण, अपाङता रहल बालबालिकाहुकनहे शैक्षिक सामग्री वितरण कैगिल रहे । समुहके कोषाध्यक्ष देशु चौधरी १६ लाख १३ हजार ४२१ रुप्या बराबरके आयव्यय विवरण प्रस्तुत करल रहिट । कार्यक्रममे स्वागत मन्तव्य समुहके उपाध्यक्ष बेलसरा साउँद ओ संचालन पत्रकार धमेन्द्र विष्ट करल रहिट ।