सुशासन मोर पहिल प्राथमिकता हो ः मनु
पहुरा समाचारदाता
धनगढी, १५ फागुन । कैलाली क्षेत्र नम्बर ५ के उम्मेदवार नरनारायण शाह “मनु” सुशासनहे अपन पहिल प्राथमिकता बनैना प्रतिबद्धता व्यक्त करले बटै ।
चुनावी अभियान अन्तर्गत टमान स्थानमे आयोजित भेटघाट, घरदैलो तथा कार्यकर्ता भेलाहे सम्बोधन करटी उहाँ पारदर्शी, जवाफदेही ओ जनमुखी शासन व्यवस्था स्थापना कैना अपन प्रमुख लक्ष्य रहल बटैले बटाइल हुइट ।मतदातासँग प्रत्यक्ष संवाद करटी शाहसे विकासके आधार सुशासन रहल उल्लेख करलै । विगतमे ढेर योजना घोषणा हुइलेसेफे प्रभावकारी कार्यान्वयन नैहुके जनतासे अपेक्षित उपलब्धी हासिल करे नैसेकल उहाँ बटैलै । उहाँ जनतासे सहज रूपमे सेवा पैना वातावरण बनैना, भ्रष्टाचार नियन्त्रण कैना ओ सार्वजनिक सेवा प्रवाहहे प्रभावकारी बनैना प्रतिबद्धता व्यक्त करलै ।
शाह निर्वाचित हुइलपाछे विकास निर्माणके योजनाहे पारदर्शी ढंगसे आघे बह्रैना, सार्वजनिक सेवामे हुइना ढिलासुस्ती हटैना ओ जनताके गुनासो सुन्न प्रभावकारी संयन्त्र बनैना बटैलै । उहाँ स्थानीय आवश्यकताके आधारमे योजना सञ्चालन कैना ओ जनताके प्रत्यक्ष सहभागितामे निर्णय प्रक्रिया आघे बह्रैना प्रतिबद्धता जनैैलै ।
चुनावी अभियानके क्रममे शाह घरदैलो कार्यक्रम मार्फत मतदातासँग निरन्तर भेटघाट करटी रहल बटै । टमान टोल ओ बस्तीमे पुगके उहाँहे स्थानीय बासिन्दासे स्वागत करटी अपन समस्या ओ अपेक्षा रख्न कर बटै । धनगढी उपमहानगरपालिका वडा नम्बर ८ के स्थानीय मतदाता रामबहादुर बोहरासे शाह नम्मा समयसे समाजसेवामे सक्रिय व्यक्ति रहल उल्लेख करटी कहलै, “मनुजीहे हम्रे खेलकुदसे सामाजिक क्षेत्रमे काम करल डेख्ले बटी । उहाँ इमान्दार बटै । सुशासनके बाट कैनाफे लागू करेसेक्ना व्यक्ति उहाँ हो कना विश्वास लागल बा ।”
ओस्टेक स्थानीय महिला मतदाता लक्ष्मीदेवी चौधरी विकाससंगे पारदर्शिताके आवश्यकता रहल बटैटी कहली, “हम्रहिनहे भारी बाट नाही, काम कैना नेता चाहल हो । मनुजी सुशासनहे प्राथमिकता डेम कहले बटै, टबमारे हम्रहिनहे आशा डेहल बा ।” युवा मतदाता सन्तोष राना नयाँ सोच ओ स्पष्ट योजना रहल उम्मेदवारके आवश्यकता रहल बटैटी कहलै, “हम्रे युवाहुकनहे अवसर चाहल बा । मनु डाडु पारदर्शिता ओ सुशासनके बाट करले बटै यिहीसे भविष्यमे मजा परिवर्तन आई कना लागल बा ।”
