पूर्व प्रधानमन्त्री ओली ओ लेखक पक्राउ
पहुरा समाचारदाता
काठमाडौं, १४ काठमाडौं । पूर्व प्रधानमन्त्री ओ केपी शर्मा ओली ओ पूर्व गृहमन्त्री रमेश लेखक पक्राउ परल बटै ।
नयाँ सरकार बनल लगत्ते बैठल मन्त्रिपरिषद् बैठकसे गौरीबहादुर कार्की नेतृत्वके जाँचबुझ आयोगसे तयार पारल प्रतिवेदन कार्यान्वयन कैना निर्णय करल रहे ।
पूर्वप्रधानमन्त्री ओलीहे गुण्डुस्थित निवाससे प्रहरीसे पक्राउ करल रहे । अपराध अनुसन्धान कार्यालय टेकुके एसएसपी सन्तोष खड्का नेतृत्वके टोलीसे उहाँहे निवाससे पक्राउ करल रहे । उहाँहे पक्राउ कैना रातसे प्रहरी टोली ओली निवास गुण्डु पुगल रहे ।
ओली नेतृत्वके तत्कालीन सरकारके गृहमन्त्री रमेश लेखकहेफे शनिच्चर सकारे प्रहरीसे भक्तपुरके कुटुन्जेस्थित निवाससे पक्राउ करले बा ।
भदौ २३ गतेके जेनजी आन्दोलनमे १९ जानेक ज्यान जैना घटनाममे संलग्न हुइल आरोपके अनुसन्धानके लाग कहटी प्रहरीसे ओली ओ लेखकहे पक्राउ करल हो ।
नेपालके इतिहासमे मुलुकके कार्यकारी प्रमुख ज्यान मुद्दामे पक्राउ परल यी पहिल घटना हो । यी आघे कतिपय अवस्थामे राजनीतिक प्रकृतिके घटना ओ प्रदर्शनमे पूर्वप्रधानमन्त्री प्रहरी नियन्त्रणमे रहलेसेफे फौजदारी जाहेरीके अनुसन्धानके सिलसिलामे पक्राउ परल नैरहिट ।
तीन दिनआघे मिडियामे सार्वजनिक हुइल जाँचबुझ आयोगके प्रतिवेदनमे पूर्वप्रधानमन्त्री ओली, तत्कालीन गृहमन्त्री रमेश लेखक, पूर्वप्रहरी महानिरिक्षक चन्द्रकुवेर खापुङ लगायतउप्पर मुलुकी अपराध संहिता २०७४ के दफा १८२ के कसुर करल आरोपमे पक्राउ करल हो ।
उ दफामे ‘हेलचक्र्याईं करके ज्यान मारे नैहुइना’ कना व्यवस्था बा । हेलचेक्राईपूर्वक केक्रे ज्यान मर्ना काम करलमे ३ वर्षसम कैद ओ ३० हजार रुप्याससम जरिवाना हुई सेकी ।
ओली–लेखकके रिहा मग्टी प्रदर्शन
पूर्वप्रधानमन्त्री केपी शर्मा ओली ओ पूर्वगृहमन्त्री रमेश लेखकहे रिहा कैना माग करटी देशके टमान ठाउँलगायत धनगढीफे प्रदर्शन करल बा । नेकपा एमालेके केन्द्रीय सर्कुलर अनुसार जिल्लामे क्रियाशील २३ जनसंगठनके संयुक्त आयोजनामे धनगढीमे शनिच्चर दुपहर प्रदर्शन करल हो । एमाले पार्टी कार्यालयसे जिल्ला प्रशासन कार्यालयके मूल गेटसम सरकारविरुद्ध नाराबाजी करटी प्रदर्शन करल बा ।
प्रदर्शनपाछे जिल्ला प्रशासन कार्यालयके मूल गेट आघेक सडकमे आयोजित कोण सभाहे अनेरास्ववियु कैलालीके अध्यक्ष कुबेर खड्का, किसान महासंघ सुदूरपश्चिमके नेता मदन रेग्मी ओ भूमीहीन सुुुकुम्बासी संगठनके केन्द्रीय उपमहासचिव लोकेन्द्र सिंह सम्बोधन करल रहिट ।
ओस्टेक करके नेपाली कांग्रेस सुदूरपश्चिम प्रदेशके महामन्त्री मेघराज खड्कासे पूर्वप्रधानमन्त्री केपी शर्मा ओली ओ पूर्वगृहमन्त्री रमेश लेखकहे करल पक्राउके विरोध करले बटै । सदूरपश्चिम प्रदेश सरकारके सामाजिक विकासमन्त्री खड्का विधि ओ प्रक्रिया नैपुगाके ओली–लेखकहे पक्राउ करल कहटी विरोध करल हुइट ।
‘पूर्वप्रधानमन्त्री ओली ओ पूर्वगृहमन्त्री लेखकके पक्राउ विधि ओ प्रक्रिया नैपुगाके पूर्वाग्रही ओ प्रतिशोधपूर्ण कदम हो घोर निन्दा करटु,’ उहाँ सोसल मिडिया प्लेटफर्म ‘एक्स’ पोस्टमे कहले बटै ।
कैलालीमे संयुक्त सुरक्षा बैठक
कैलाली जिल्लाके पाछिल्लो सुरक्षा अवस्थाहे मध्यनजर कैटी प्रदेश तथा जिल्ला सुरक्षा समिति कैलालीके संयुक्त सुरक्षा बैठक सम्पन्न हुइल बा ।
जिल्ला प्रशासन कार्यालय कैलालीमे शनिच्चर सकारे प्रमुख जिल्ला अधिकारीके कार्यकक्षमे बैठल बैठकसे जिल्लाके शान्ति सुरक्षाके समग्र अवस्थाबारे समीक्षा कैनाके साथे अइना दिनमे अपनाजैना रणनीतिबारे महत्वपूर्ण निर्णय करल बा ।
बैठकमे सुदूरपश्चिम प्रदेशके प्रमुख सचिव बैकुण्ठप्रसाद अर्यालके उपस्थिति रहल रहे कलेसे सुदूरपश्चिम पृतना मुख्यालयके पृतनापति उपरथी किरण केसी, आन्तरिक मामिला तथा कानून मन्त्रालयके सचिव तेजप्रकाश जोशी, प्रमुख जिल्ला अधिकारी हिरालाल रेग्मी, राष्ट्रिय अनुसन्धान विभाग सुदूरपश्चिमके निर्देशक किशोर कुमार श्रेष्ठ लगायत नेपाली सेना, नेपाल प्रहरी तथा सशस्त्र प्रहरी बलके उच्च अधिकारीनके सहभागिता रहल रहे ।
बैठकसे हाल कैलाली जिल्लाके शान्ति सुरक्षा अवस्था सामान्य रहल निष्कर्ष निकारल बा । यद्यपि, देशके पछिल्लो बडलटी रहल राजनीतिक तथा सामाजिक परिस्थितिहे दृष्टिगत कैटी सम्भावित चुनौतीके सामना कैना सुरक्षा संयन्त्रहे थप सक्रिय, समन्वयात्मक ओ सतर्क बनैना निर्णय करल बा ।
विशेष कैके सम्भावित विरोध प्रदर्शन, जुलुस तथा टमान राजनीतिक गतिविधि शान्ति सुरक्षामा असर पारे सेक्ना हुइल ओरसे ओइसीन गतिविधिउपर निगरानी बह्रैना, आवश्यक स्थानमे सुरक्षा उपस्थिति सुदृढ कैना तथा समयमे सूचना आदानप्रदान कैना विषयमे जोड डेहल बा । बैठकसे सक्कु सुरक्षा निकायबीच आपसी सहकार्य ओ समन्वयहे आउर प्रभावकारी बनैटी उच्च सतर्कताके साथ परिचालन हुइना निर्णय समेत करल बा ।
ओस्टके, पूर्वप्रधानमन्त्री तथा गृहमन्त्रीसँग सम्बन्धित पछिल्लो घटनाक्रमके कारण उत्पन्न हुइ सेक्ना संवेदनशील अवस्थाहे ध्यानमे रख्टी जिल्लाके मुख्य चोक, बजार क्षेत्र, सरकारी कार्यालय, सीमा नाका तथा अन्य संवेदनशील स्थानमे निगरानी बह्रैना, चेकजाँच कडाइ कैना ओ आवश्यक सुरक्षा रणनीति प्रभावकारी रूपमे कार्यान्वयन कैना निर्णय करल बा ।
बैठकमे सहभागी अधिकारीहुक्रे शान्ति सुरक्षा कायम राखक लाग नागरिकके सहयोग अपरिहार्य रहल उल्लेख कैटी कौनो फेन शंकास्पद गतिविधि डेखलमे तुरुन्त सुरक्षा निकायहे जानकारी करैना सर्वसाधारणमे आग्रह करल बावै ।
साथे, अफवाह ओ भ्रामक सूचनासे सचेत रहना तथा सामाजिक सद्भाव कायम रख्ना सक्कु पक्षहे आह्वान करल बा । समग्रमे, बैठकसे जिल्लामे शान्ति सुरक्षा अवस्था सामान्य रहलेसे फेन संभावित जोखिमहे समयमे व्यवस्थापन कैना पूर्वतयारी स्वरूप सुरक्षा संयन्त्रहे थप मजबुत बनैना निर्णय करल जनाइल बा ।
