बरघर तथा भलमन्सा सम्बन्धि कार्यविधि तथा कानुन निर्माणके लाग छलफल

पहुरा समाचारदाता
धनगढी, १८ चैत । बरघर तथा भलमन्साहुक्रनके काम, कर्तब्य ओ अधिकार सम्बन्धि कार्यविधि तथा कानुन निर्माण कैना उद्देश्यसे धनगढी उपमहानगरपालिका टमान पालिकाके असल अभ्यासके अध्ययन अवलोकन सहित अनुभव आदान–प्रदान तथा आवश्यक छलफल करले बा ।

थारु समुदायके भलमन्सा प्रणालीबारे कार्यविधि तथा कानुन निर्माणके लाग धनगढी उपमहानरपालिकासे कैलारी गाउँपालिका ओ भजनीनगरपालिकाके प्रमुख तथा उपप्रमुखसँग गाउँपालिका तथा नगरपालिकाके असल अभ्यास सम्बन्धी अध्ययन तथा अवलोकन सहित छलफल करल हो ।

धनगढी उपमहानगरपालिकाके मेयर गोपाल हमाल सहितके टोलीसे कैलारी गाउँपालिका अध्यक्ष राजसमझ चौधरी, उपाध्यक्ष भगवती कुमारी चौधरी लगायत कर्मचारीनसे गाउँपालिकासे करल असल अभ्यासबारे अध्ययन अवलोकन सहित अनुभव आदान प्रदान करल हो । ओस्टके उक्त टोलीसे भजनी नगरपालिकाके नगरप्रमुख केवल चौधरी ओ उपप्रमुख राजु तिरुवा ओ कर्मचारीनसे फेन छलफल करल हो ।

नगरप्रमुख हमाल धनगढी उपमहानगरपालिकासे २०७९/८० सालके नीति तथा कार्यक्रमसे नै निरन्तर भलमन्सा प्रणालीहे कार्यक्रम तथा नीतिमे लानके आवश्यक कानुनी लगायतके तालिम ओ कार्यालय सञ्चालनमे सहयोग कैटी आइल बटैले बटै ।

उक्त टोलीमे नगर उपप्रमुख कन्दकलाकुमारी राना, वडा नम्बर १० के वडाध्यक्ष शिवकुमार राना, १९ नम्बरके वडाध्यक्ष बाँधुराम चौधरी, कार्यपालिका सदस्य सुष्मा चौधरी, प्रमुख प्रशासकीय अधिकृत नरेन्द्र बहादुर खाती, कानुनी सल्लाहकार बीर बहादुर जेठारा, थाकस कैलाली सभापति वीर बहादुर थारू, नेपाल राना थारु समाजके अध्यक्ष कमल सिंह राना, नगर भलमन्सा समितिके अध्यक्ष रोहित चौधरी, लेखा अधिकृत मेम्बर सिंह, सामाजिक विकास अधिकृत टंक बहादुर विष्ट ओ कानून अधिकृत खडक सिंह कुञ्जेडा लगायत रहल रहिट ।