नगर प्रमुख हमाल पाइल सुविधामे ठप करके ४४ लाखके सामाजिक विकासके क्षेत्रमे वितरण
पहुरा समाचारदाता
धनगढी, २५ बैशाख । कैलाली जिल्ला धनगढी उपमहानगरपालिकाके नगर प्रमुख गोपाल हमाल अपने पाइल सुविधामे ठप करके ४४ लाख पुगाके सामाजिक विकासमे वितरण करले बटै ।
शुकके रोज धनगढीमे पत्रकार सम्मेलनके आयोजना करके अपने नगरपालिकासे यी आर्थिक बर्षसम पाइल सेवा सुविधामे ठप करके सामाजिक विकासके क्षेत्रमे वितरण करल जानकारी डेलै । नगर प्रमुख हमाल आर्थिक बर्ष २०८२/०८३ सम ३८ लाख ८२ हजार ८७३ रुप्या ८३ पैसा पाइल रहिट । ओम्ने आपन ओरसे ५ लाख १७ हजार ११२ रुप्या १७ पैसा करके ४४ लाख रुप्या बराबरके यी बरससम सामाजिक विकासके क्षेत्रमे वितरण करल जानकारी डेलै ।
उहाँ आर्थिक बर्ष २०८२/०८३ सम ३८ लाख ८२ हजार ८७३ रुप्या ८३ पैसा पाइल रहिट । ओम्नेसे २३ लाख ९७ हजार ६७८ रुप्या ८३ पैसा सामाजिक विकासमे वितरणमे कैसेकल बटै । कलेसे १४ लाख ८५ हजार १९५ रुप्या बचल बा, उफे सामाजिक विकासमे वितरण कैना नगरप्रमुख हमाल पत्रकार सम्मेलनमे जानकारी डेलै ।
नगर प्रमुख हमाल आर्थिक बर्ष २०७८÷०७९ सालमे १ लाख ३७ हजार २७३ रुप्या पाइलमे १ लाख ३७ हजार २७३ रुप्या ८३ पैसा सामाजिक विकासके क्षेत्रमे वितरण करल रहिट । आर्थिक बर्ष २०७९÷०८० सालमे ९ लाख ३६ हजार ४ सय रुप्या प्राप्त हुइलमे १ लाख ६७ हजार ८ सय रुप्या सामाजिक विकासके क्षेत्रमे वितरण करल रहिट ।
आर्थिक बर्ष २०८०/०८१ सालमे ९ लाख ३६ हजार ४ सय रुप्या प्राप्त हुइलमे ९ लाख ९२ हजार ८ सय ५ रुप्या सामाजिक विकासके क्षेत्रमे वितरण करल रहिट ।
आर्थिक बर्ष २०८१.०८२ सालमे ९ लाख ३६ हजार ४ सय रुप्या प्राप्त हुइलमे १० लाख रुप्या सामाजिक विकासके क्षेत्रमे वितरण करल रहिट । आर्थिक बर्ष २०८२/०८३ सालमे ९ लाख ३६ हजार ४ सय रुप्या प्राप्त हुइल हुई । आर्थिक बर्ष २०७८÷०७९ से आर्थिक बर्ष २०८२/०८३ सम पाइल कुल सुविधा ३८ लाख ८२ हजार ८६३ रुप्या मन्से २३ लाख ९० हजार ८७८ रुप्या ८३ पैसा सामाजिक विकासके क्षेत्रमे वितरण करले बटै कलेसे बाँकी रहल १४ लाख ८५ हजार १९५ रुप्याफे सामाजिक विकासके क्षेत्रमे वितरण कैना उहाँ जनैलै ।
कौन–कौन क्षेत्रमे सहयोग कैगिल टे
धनगढी उपमहानगरपालिकासे नगर प्रमुख गोपाल हमालसे आर्थिक बर्ष २०७८/०७९ से आर्थिक बर्ष २०८२/०८३ सम पाइल कुल सुविधा मन्से सार्वजनिक शिक्षाके विकास तथा विपन्न वर्गके शिक्षामे पहुँच स्थापना, गौसरक्षण ओ व्यवस्थापनमे, सामाजिक विकासके क्षेत्रमे सहयोग कैगिल बा ।
आर्थिक बर्ष २०७८/०७९ सालमे प्राप्त सुविधासे गौ संरक्षण सेवा समिति धनगढी–३ हे ५५ हजार ६८७ रुप्या ८३ पैसा सहयोग करल बा । दक्षिणकाली आधारभूत बहिरा आवासिय विद्यालयहे ८१ हजार ५८५ रुप्या सहयोग करल बा ।
आर्थिक बर्ष २०७९/०८० सालमे सामाजिक उत्तरदायित्व अन्र्तगत टमान संस्थामे आश्रितहे कपरा सहयोग करल बा । जेम्ने दृष्टि फाउण्डेसनमे ५५ जनहन, मानव सेवा आश्रमके ५६ जनहन, आमाको माया छात्राबासके ३० जनहन, खगेन्द्र नवजीवन केन्द्र(अपाङ संघ)के ५ जनहन कपरा सहगोग करल उहाँ जनैलै । उहे सालके प्राप्त सुविधा मन्से दक्षिणकाली आधारभूत बहिरा आवसिय विद्यालयहे डस्या डेवारीके अवसरमे गरम लुगा सहयोग १०५ जनहन ओ पञ्चोदय मावि धनगढी–५ के दृष्टि विहिन विद्यार्थी १८ जनहनहे लुगरा सहयोग करल नगर प्रमुख हमाल बटैलै ।
आर्थिक बर्ष २०८०/०८१ सालमे आधारभूत तह कक्षा ८ के वार्षिक परीक्षामे अन्तिम नतिजा शुन्य आइलपाछे १७ ठो सामुदायिक विद्यालयके ३ हजार ४८९ जाने विद्यार्थीनहे पठनपाठन सहयोग सामाग्रीके रुपमे शैक्षिक सामाग्री वितरण बा । सामुदायिक विद्यालयके विद्यार्थीनहे स्टेसनरी खरिद वितरण (कपी, पेन्सिल, कटर, इरेजर) करके ९ लाख ९२ हजार ६०५ रुप्या बराबरके सहयोग कैगिल बा ।
आर्थिक बर्ष २०८१/०८२ सालमे सामुदायिक विद्यालयमे अध्ययनरत विद्यार्थीहुकनके पठनपाठनमे सहज पहुँच स्थापना कैना शैक्षिक सामाग्री वितरण कैगिल बा ।
ओम्ने सामुदायिक विद्यालयके विद्यार्थीहुकनहे स्टेसनरी खरिद वितरणमे ४२ आधारभूत ओ ५ मावि नमुना करके ४७ विद्यालयके ७ हजार ४७५ जनहनहे १० लाख बराबरके शैक्षिक सामाग्री वितरण करल उहाँ जनैलै ।
ओस्टेक करके चालु आर्थिक बर्ष २०८२/०८३ सालमे प्राप्त करल सुविधा ९ लाख ३६ हजार ४ सय रुप्याकेफे चालु आर्थिक बर्षमे वितरण कैना कार्यके तयारी हुइटी रहल नगर प्रमुख हमाल बटैलै ।
