निसर्ग हस्पिटल बर्का भजहर कपके उपाधि नेम्स क्लबहे
पहुरा समाचारदाता
धनगढी, २५ वैशाख । कैलालीके कैलारी गाउँपालिकामे हुइल ‘छैटौँ निसर्ग हस्पिटल बर्का भजहर कप फुटबल प्रतियोगिता’ के उपाधि बर्दियाके नेम्स क्लबसे जिटले बा ।
श्री युवा जनहित क्लबके आयोजनामे वैशाख १७ गतेसे हुइल प्रतियोगिताके फाईनलमे जित हात परटी नेम्ससे उपाधि जिटल हो । कैलारी गाउँपालिका वडा नम्बर ८ लोहलपुरके खेल मैदानमे हुइल फाईनलमे आयोजक श्री युवा जनहित क्लबहे २–० से हरैटी नेम्स च्यामपीयन हुइल हो ।
प्रतियोगिताके विजेता बनल नेम्ससे एक लाख रुपैयाँ ओ उपविजेता बनल आयोजक श्री जनहित क्लब ५० हजार रुपैयाँ नगद पुरस्कार प्राप्त करले बटै ।
प्रतियोगिताके समापन कार्यक्रममे प्रमुख अतिथि मुख्य प्रायोजक निसर्ग हस्पिटल एण्ड रिसर्च सेन्टर, धनगढीके अध्यक्ष तिर्थ पन्त, बिशिष्ठ अतिथि कैलारी गाउँपालिका उपाध्यक्ष भगवती चौधरी रहल रहिट ।
प्रतियोगिताके मुख्य प्रायोजक निसर्ग हस्पिटल एण्ड रिसर्च सेन्टर, धनगढी रहल बा कलेसे कैलारी गाउँपालिका मुख्य प्रवद्र्धकके रूपमे रहे । साथे टमान संघसंस्था तथा निजी व्यावसायिक फर्मसे समेत प्रायोजन तथा प्रवद्र्धनमे सहयोग करले बटै ।
थारु समुदायके लोप हुइटी गैल मौलिक लोक पर्व तथा संस्कृतिके संरक्षण ओ प्रवद्र्धन कैना उद्देश्यसे भजहर पर्वके अवसरमे हरेक वर्ष प्रतियोगिता आयोजना करटी आइल बा । फुटबल प्रतियोगितासंगे थारु समुदायके परम्परागत खेलफे सञ्चालन करल रहे ।
