एमालेसँगके सत्ता सहकार्य तत्काल नैटुटीः कांग्रेस सभापति थापा

पहुरा समाचाचरदाता
धनगढी, २६ वैशाख । नेपाली कांग्रेसके सभापति गगन थापा एमालेसँगके सत्ता सहकार्य तत्काल नैटुट्न बटैले बटै । प्रदेशमे एमाले कांग्रेसके समिकरण टुट्नबारे चर्चा चल्टी रहल बेला ‘जरा अभियान’ अन्तर्गत कैलालीके धनगढीमे सभापति थापा अब्बेक राजनीतिक परिस्थितिमे नेपाली कांग्रेस ओ नेकपा एमालेबाहेक दुसर सरकार बन्न अवस्था नैरहल बटैलै ।

उहाँ एमाले नेतृत्वसँग निरन्तर छलफल हुइटी रहल उल्लेख करटी सरकारके नीति तथा कार्यक्रम तथा बजेटबारेफे संवाद जारी रहल बटैलै । प्रदेश सरकारहुक्रे ठीक ढंगसे चालेपर्नामे उहाँ जोड डेलै ।

मधेश प्रदेशमे समेत नेकपासहित छलफल हुइटी रहल जानकारी उहाँ डैलै । थापासे कांग्रेस कार्यकर्ताहे पराजित मानसिकतासे बाहेर निकरके नयाँ जिम्मेवारी ओ सोचसहित आघे बह्रना आग्रह करलै । पार्टीके उम्मेदवारहे असहयोग कैना नेता–कार्यकर्ताहे कुछ समय जिम्मेवारीसे बाहेर राखन चेतावनीफे उहाँ डेलै ।

‘नेतासँग असन्तुष्टि हुइ सेकठ, मने कांग्रेसके टिकट लेके चुनावमे उठल उम्मेदवारहे भोट नैडारम कना नैमिली, ’ उहाँ कहलै, ‘ओसिन गतिविधिमे संलग्न डेखल उप्पर कारबाही हुई । ’ उहाँ यी बार करिब १० लाख कांग्रेस मतदातासे पार्टीहे भोट नैडेहल दाबी करटी कांग्रेस भूमिकाविहीन नैहुइल स्पष्ट परलै । ‘हम्रे हटली कहिके जिम्मेवारीसे भागे नैमिली, ’ उहाँ कहलै ।

राष्ट्रिय स्वतन्त्र पार्टीहे पाँच वर्ष सरकार चलैना जनादेश प्राप्त हुइल उल्लेख करटी उहाँ कांग्रेससे प्रतिपक्षके भूमिका प्रभावकारी रूपमे निर्वाह कैना बटैलै । ‘हम्रे सचेत करैना छोरलेसे भर लोकतन्त्रके आत्मा मरठ,’ उहाँ कहलै ।

सुशासनके सन्दर्भमे सरकारसे करल सकारात्मक प्रयासहे समर्थन रना मने शक्ति ओ सत्ताके आडमे लोकतन्त्र नियन्त्रण करे खोज्लेसे कांग्रेस ‘सतीसाल’हस ठरहयइना बटैलै । थापासे अव्यवस्थित भूमिहीन तथा सुकुम्बासी समस्यामे राज्य संवेदनशील हुईपर्ना उल्लेख करटी उहाँ कहलै, ‘सनकके भरमे डोजर चलाई नैपरठ, ओइनकेफे आत्मसम्मान हुइठ ।’

कार्यक्रममे उहाँ शेरबहादुर देउवा सहित कांग्रेसके पूर्व सभापतिके योगदानसमेत स्मरण करल रहिट । सभापति थापासे सक्कुहुनहे समेटके पार्टीहे एकताबद्ध बनैना प्रयास हुइटी रहल बटैलै ।

निर्वतमान सभापति देउवाके स्वास्थ्य लाभके कामना करटी पछिल्का समय अपनेहुकनबीच संवाद नैहुइल उहाँ बटैलै । थापासे चुनावआघे बनल गठबन्धन नैकैना अपने सुझाव डेहल मने तत्कालीन सभापति देउवासे नैमानल बटैलै ।

उहाँ ‘जेनजी आन्दोलन’ अघिल्का दिनमेफे सरकार छोरसे अन्य टमान सुझाव डेहल मने उ फे कार्यान्वयन नैहुइल स्मरण करलै । पार्टीके नेताहुकनसंग छलफल करके सक्कुहुनहे जोरके लैजैना तयारी हुइटी रहल समेत उहाँ बटैलै ।