मुख्यमन्त्री फेर्ना मागबारे गगनके चासो

पहुरा समाचारदाता
धनगढी, २७ बैशाख । नेपाली कांग्रेसके सभापति गगनकुमार थापा सुदूरपश्चिम प्रदेश संसदीय दलमे विकसित घटनाक्रमबारे छलफल करले बटै ।

सरकारसँग असन्तुष्ट ओ मन्त्री हुई नैपाइल प्रदेश सभा सदस्यहुक्रे मुख्यमन्त्री कमलबहादुर शाहहे पदसे हटाईपर्ना माग करटी आइल रहिट । शनिच्चरसे प्रदेशस्तरीय भेलापाछे सभापति थापासे उपसभापति विश्वप्रकाश शर्मा, महामन्त्री गुरु घिमिरेसहितके नेताहे धारके प्रदेशके मुख्यमन्त्री, मन्त्री ओ सांसदसंग सघन छलफल करले बटै ।

अबेर रातसम चलल छलफलमे असन्तुष्ट प्रदेश सभा सदस्यसे सभापति थापाहे खुलके आपन बाट रख्ले बटै । ओइने कार्यसम्पादन सन्तोषजनक नैरहल कहटी तत्काल सरकार पुर्नगठन करेपर्ना माग करले बटै । मुख्यमन्त्री शाहसे बैतडीसे निर्वाचित शिवराज भट्टहे दुसरा चो मन्त्री बनाइल प्रसंगसमेत उठाइल रहिट । ‘कौनो व्यक्तिहे दुई÷दुई चो मन्त्री डेना, कोहीहे कार्यकाल सेक्ना बेलासम भूमिका नैडेना बाट मजा नैहुइल,’ छलफलमे सहभागी सांसदसे कहलै, अब्बेक सरकारके कामकारबाही सन्तोषजनक नैहो । तत्काल पुर्नगठन करे परी कना बाट उठल ।

छलफलके सुरूमे मुख्यमन्त्री शाह ओ विद्यायन तथा प्रदेश मामिला समितिके सभापति दिवानसिंह बिष्टबीच नोकझोक चलल रहे । बिष्टसे शाहसे थापाहे पार्टी सभापति नैमन्ना कहटी अपनेफे दलके नेता स्वीकार नैकैना बटैले रहिट । ओकरपाछे ओइनबीच नोकझोक चलल रहे । अदालतसे विशेष महाधिवेशनहे वैध कहटी उहाँ (गगन)हे सभापतिमे निरन्तरता डेसेकल मने मुख्यमन्त्रीसे सभापति नैमानम कहठै, बिष्ट कहले रहिट, उहाँ सभापति नैमन्ना हुइलपाछे मैफे दलके नेता नैमानम । ओकरपाछे कड्कल मुख्यमन्त्री शाहसे अदालतके निर्णयपाछे सभापति नैमन्ना बाट नैकरल बटैटी यी आघे भर बिष्टसहितके सहभागितामे शेरबहादुर देउवाके पक्षमे ठरहयइना निर्णय करल जवाफ डेहल रहिट ।

विशेष महाधिवेशनके पक्षमे अपने हम्रे नैरही । सभापति ज्यूहेफे यी बाट पटा बा । माननीय जुना दानी बाहेक सक्कु जाने देउवाहे सभापति मन्ना निर्णय करल बाट स्मरण रहे, मुख्यमन्त्री शाह कहल रहिट । मुख्यमन्त्री फेरेपर्ना पक्षमे ठरहयइल कुछ सांसदसे सरकारसे योजना किनबेच करल, बजेटमे एमालेके मन्त्री हाबी हुइल, पहुँचके आधारमे मन्त्रीहुक्रे अपन क्षेत्रमे केल्ह खन्यइल आरोप लगैले रहिट ।

उहे कारण मुख्यमन्त्री ओ मन्त्री समेत फेरेपर्ना ओइनके माग रहे । मने, मध्यमार्गी बाट राखल प्रमुख सचेतक बिक्रम सिंह धामी लगायतके सांसदसे सरकारके कामकारबाही नैमिलल बटैलेसेफे तत्काल मुख्यमन्त्री नैहुके मन्त्री हेरफेर करेपर्ना माग रख्लै । अब्बे मुख्यमन्त्री चलाईबेर राजनीतिक समीकरण फेरल कांग्रेससे सरकार बाहेर बैठबेपर्ना अवस्था बने सेकठ, आृेइने कहले रहिट, झबरू सरकारमे हुइल सक्कु मन्त्री फेरके नयाँहे अवसर डि । मुख्यमन्त्री फेर्ना बाटसे नेपाली कम्युनिस्ट पार्टी ओ एमाले एकठाउँमे ठरहयके सरकार बनैना परस्थिति बन्नाबारे गहन छलफल हुइल नेता बटैठै ।

यी बाटमे सभापति थापाफे सहमत डेखल रहिट । मने, बजेट आघे मन्त्रीमण्डल हेरफेर करेपनौ माग जोरसे उठल बा । सक्कु सांसद, मन्त्री ओ मुख्यमन्त्रीके बाट सुनलपाछे बोलल सभापति थापासे प्रदेशमे बजेट निर्माण लगायतके विषयमे काठमाडौं लौटलपाछे कुछ मार्गदर्शन उपलब्ध करैना बटैले रहिट । ओसिन मार्गदर्शनसे बजेट सन्तुलित बनैना सहज हुइना उहाँक कहाई रहे । अब्बे पार्टीहे एकताबद्ध बनाके लैजाईपर्ना समय हुइल बटाइल थापासे मुख्यमन्त्री ओ मन्त्रीके बारेमेफे काठमाडौं लौटलपाछे थप छलफल करके निर्णय लेना बटैलै ।

अब्बे एकदुसरहे असन्तुष्टि पोख्न समय नैहो । सक्कु जे एकताबद्व हुके काम करी । विश्वप्रकाश दाइके संयोजकत्वके समितिसे प्रदेश सरकारके सम्बन्धमे एमालेसँग संवाद करटी रहल बा, थापा कहलै, यहाँ उठल सक्कु विषयमे हम्रे काठमाडौं लौटलपाछे थप छलफल कैबी । उहाँ निवर्तमान सभापति शेरबहादुर देउवा पार्टीके आदर्श नेता रहल बटैटी सदा सम्मान रना बटैले रहिट । निवर्तमान कार्य समितिमे रहल मने अब्बे छुटल नेताहे समेत केन्द्रीय कार्य समितिमे व्यवस्थापन कैना प्रतिबद्वता जनैले बटै ।