कैलारीमे सिकलसेल रोग पहिचान शिविर कैना

पहुरा समाचारदाता
धनगढी, २८ बैशाख । कैलारी गाउँपालिकाके नौ वडामे सिकलसेल रोग पहिचान तथा जाँच शिविर कैना बा ।

कैलारी गाउँपालिकाके आयोजना तथा वडा कार्यालय ओ स्वास्थ्य चौकीसंगके समन्वयमे नौ वडामे सिकलसेल रोग तथा थालेसिमिया रोग सम्बन्धी निःशुल्क पहिचान तथा जाँच शिविर सञ्चालन कैना गाउँपालिकाके स्वास्थ्य शाखा प्रमुख नरेशकुमार चौधरी जनैलै ।

उ शिविरमे हालसम सिकलसेल रोगके पहिचान सम्बन्धी रक्त परिक्षण नैकराइल ५ वर्षसे उप्परके थारु समुदायके व्यक्तिहुकनके सिकलसेल रोग तथा वालेसिमिया रोगके पहिचानके लाग जाँच शिविर सञ्चालन करे लागल उहाँ जनैलै ।
उ शिविर यिहे बैशाख ३१ ओ जेठ १ गते उदासिपुर प्राथमिक स्वास्थ्य केन्द्र, पृथ्वीपुर, कैलारी–८ ओ गदरिया स्वास्थ्य चौकी, गदरिया, कैलारी–९ मे संचालन हुइना उहाँ जनैलै ।

जेठ ४ ओ ५ गते बसौटी स्वास्थ्य चौकी, उजलीसेमरा, कैलारी–२ मे ओ बनकट्टा आधारभुत स्वास्थ्य केन्द्र, बनकट्टा, कैलारी–६ हुइना बा । जेठ ६ ओ ७ गते हसुलिया स्वास्थ्य चौकी, टि.सि.एन., कैलारी–३ मे ओ के–गाउँ आधारभूत स्वास्थ्य केन्द्र, कैलारी–४ मे हुइना बा ।

ओस्टेक जेठ ८ ओ ९ गते पवेरा स्वास्थ्य चौकी, पबेरा, कैलारी–५ मे ओ मनाउँ बाधारभूत स्वास्थ्य केन्द्र, मनाउँ, कैलारी–१ मे उ शिविर संचालन हुइना बा । कलेसे जेठ ११ ओ १२ गते रतनपुर स्वास्थ्य चौकी, बड्का बसन्ता, कैलारी–७ संचालन स्वास्थ्य शाखा प्रमुख जनैलै ।

उ शिविरमे सिकलसेल रोग तथा थालेसिमिया रोग सम्बन्धी पहिचानके लाग निःशुल्क रक्त परिक्षण सेवा, सिकलसेल रोग तथा थालेसिमिया रोग सम्बन्धी परामर्श सेवा, सामान्य स्वास्थ्य जाँच सेवा, रक्त परिक्षणमे सिकलिङ पोजेटिभ आइल विरामीके निःशुल्क एचवि इलेक्ट्रोफोरोसिस जाँच कैना, पहिचान हुइल सिकलसेल रोगके बिरामीहे सेती प्रादेशिक अस्पतालमे नियमित उपचारके लाग प्रेषण सेवा प्रदान कैना उहाँ जनैलै ।

कैलारी गाउँपालिकामे १०४ जाने सिकलसेल रोगके विमारी नियमित रुपमे उपचार करैटी रहल स्वास्थ्य शाखा प्रमुख बटैलै । उहाँ कहलै, कैलारी गाउँपालिकामे टमान चो सिकलसेल रोग तथा थालेसिमिया रोग सम्बन्धी पहिचानके लाग निःशुल्क उ शिविर संचालन करल बा । अभिनफे बहुट जाने जाँच करैनासे बञ्चित हुइल बटै । यी फेरा पहिलेक जाँच करैनासे छुटलहुकनहे लक्षित करके शिविर संचालन करे जाइटी ।

सिकलसेल रोग उपचार सेती प्रादेशिक अस्पतालमे हुइना करल बा । गाउँपालिकासे धनगढी उपचार करे अइना विमारीहुकनके यातायात सेवा प्रदान करटी आइल बा । यम्ने गाउँपालिकाके बार्षिक १० लाख रुप्या सम खर्च हुइटी आइल बा ।