बालविवाह न्यूनीकरण सम्बन्धी सम्वाद कार्यक्रम

पहुरा समाचारदाता
धनगढी, १० जेठ । कैलारी गाउँपालिकाके हसुलियामे बालविवाह न्यूनीकरण सम्बन्धी सरोकारवाला निकायसे सम्बाद कार्यक्रम कैगिल बा ।

कैलारी गाउँपालिका न्यायिक समितिके आयोजनामे केर्नी मिडिया प्रालिकाके समन्वय तथा दलित महिला अधिकार मञ्च, फोर्स नेपाल ओरेक कैलाली, सहास नेपालके सहकार्यमे बालविवाह न्यूनीकरण सम्बन्धी सरोकारवाला निकायसे सम्बाद कार्यक्रम कैगिल हो ।

कार्यक्रमके मुख्य वक्ता कैलारी गाउँपालिका उपाध्यक्ष भगवतीकुमारी चौधरी बालविवाह व्याप्त रहल कहटी समन्वय, सहकार्यके साथे सयूक्त प्रयाससे न्यूनिकरण करेसेक्ना बटैली । गाउँपालिकाके दुई बर्षके तथ्याङक हेरेबेर २३८ जाने बालबालिका बालविवाह करल ओ यी बरस केल्ह ३८ जाने बालविवाह हुई डेखल उहाँ बटैली ।

बालविवाह सामाजिक मुद्दा रहल कहटी भौतिक विकासके हुइल नैडेख्ना हमार समाज रहल उहाँ बटैली । भौतिक विकास हुइटी रही मने सामाजिक विकाससंगसंगे लैजाईपर्ना उहाँ बटैली । समाजमे बालविवाह हुइना पाछे उहीहे विवाहके मान्यता डेहुवाइक लाग पर्छौटी भोज कैना चलन रहल कहटी, उमेर नैपुगल बालबालिकाहुकनहे रोक्ना आवश्यक रहल बटैली ।

सामाजिक अभियन्ताके तरफसे वक्ताके रुपमे रहल दलित महिला अधिकार मञ्चसे संचालित किशोरी सशक्तीकरण परियोजनाके संयोजना विमला कडायत बालविवाहके कारण बालबालिका पह्राई छोरटी जैना बालविवाहसे जन्म हुइना लर्का ओ डाई मनैन स्वास्थ्य समस्या हुइना करल बटैली ।

उहाँ कहली, डाईहे आर्थिक रुपमे समस्या आई । लिख पह्रके जौन मेरिक दक्ष जनशक्ति उत्पादन हुइना रहठ उ रोके सेक्ना, सामाजिक कलहा, द्वन्द्व पैदा हुइना, घरेलु तथा महिला हिंसा बह्रना बटैली । पहिलेक पुर्खाके समयमे प्राय बालविवाह होए, अब्बे घटटी क्रममे बा ।

समाजमे अन्तरजातीय विवाह करेबेर बलात्कारके आरोपमे जेन कोच्ना अवस्था रहल उहाँ बटैली । बालविवाह अपराध हो कहटी सरकार कहिसेकल बा मने बालविवाह हुईबेर उ खबर प्रहरीके थेन नैपुग्ना, हुइलेसेफे मेलमिलाप हुई डेखा पर्ना उहाँ बटैली । बालविवाहसे पछिल्का पुस्ताहे सखाप परटी रहलफे उहाँ बटैली ।

इलाका प्रहरी कार्यालय हसुलियाके प्रमुख सावनसिंह भाट क्षेत्री बालविवाह हुइटी रहल तथ्यांकसे डेखा परल मने अपनेहुकनथेन बालविवाह हुइल कना कबु नै मुद्दा हुइना बटैलै । इप्रकामे उमेर नैपुगल बालबालिका हेराइल कना मुद्दा दर्ता हुइना मने बालविवाह करल कना मुद्दा नैहुइल बटैलै ।

वडा नम्बर ४ के वडा अध्यक्ष ठागुराम चौधरी बालविवाहसे समाजसे कुरुप बनाइल बटैलै । उहाँ कहलै, बालविवाहके कारण समाज पाछे धकेल्टी गैल बा । यिहीहे रोके नैसेक्ेसे बह्रटी जाके समाजह् घाटा हुई । छोटेक भोज करलपाछे आपन जिउटे हेर्ना कर्रा रहठ टे लर्कन कैसिक हेर्ना आउर समस्या रहठ ।

कैलारी गाउँपालिका वडा नम्बर १ हसुलिया गाउँक भल्मन्सा मनोज चौधरी अब्बे मोवाइल ओ डिजिटल प्रविधिके कारण बालविवाह बह्रल बटैलै । बालविवाह न्यूनीकरण कैना अभिभावक जागरुक हुइनाके साथे विद्यालयमेफे उहे मेरिक शिक्षा प्रणाली हुइना जरुरी रहल बटैलै । उहाँ कहलै, गाउँघरमे कोन्टीमे बालविवाह कैना, विगरेबेर भल्मन्साहे हारगुहार कैटी मिलाडेना समस्या कहल बटैलै ।

आबसे सक्कु भल्मन्साहुक्रेफे सचेतनामूलक कार्यक्रम कैना जरुरी रहल बटैलै । गाउँघरमे कोई लौवा भोज करटा कहलेसे आबसे सोधपुछ करके खोज खाई जाईपर्ना उहाँ बटैलै ।

वडा नम्बर ५ बैसपुरके भल्मन्सा ओमप्रकाश चौधरी गाउँघरमे बालविवाहके कारण उहीहे जन्मल लर्कनहे जलमदर्ताके समस्या हुइल बटैलै ।

कैलारी गाउँपालिका महिला बालबालिका तथा जेष्ठ नागरिक शाखाके प्रमुख बालकुमारी चौधरी कैलारी गाउँपालिकासे वडा ४, ५ ओ ८ हे बालमैत्री वडा घोषणा कैना तयारीमे रहल बटैलै । घोषणा करृेक लाग ५१ सूचक पुरा करेपर्ना रहठ । उ सूचक पुरा कैना कुछ कुछ बाँकी रहल मने ओरसे कुछ दिनमे पुरा हुइटी बालमैत्री वडा घोषणा कैना कहलै । बालमैत्री वडा घोषणामे बालविबाह न्यूनिकरणफे सूचकमे रहल बा ।

गाउँपालिकासे बालसंरक्षण निति, बाल संजाल गठनके साथे विद्यालय स्तरमे बालविवाह न्यूनिकरण सम्बन्धी कार्यक्रम करटी रहल बटैली । गाउँमे हानिकारक प्रथा, विद्यालय छोरना बह्रल, लागु औषध दुव्र्यशनीमे फस्टी गैलफे उहाँ बटैली ।

गाउँपालिकासे विद्यालय छोरल यूवाहुकनहे व्यस्त बनाइक लाग सीपमुलक आयमुलक कार्यक्रममे सहभागि बनाइल उहाँ बटैली । नेपाल सरकार भोज कैना उमेर २० बरस टोक्ले बा, मने यूवायूवतीहुक्रे विद्यालय छोरना बालविवाह कैना करठै उहीहे रोकेक लाग पालिकासे टमान कार्यक्रममे सहभागी कराइलफे उहाँ बटैली । संचारकर्मी पहुरा दैनिकके सम्पादक प्रेम चौधरी थारु समुदायमे उमेर नैपुगल बालबालिका लिभिङ टुगेदरमे बैठना विकृतिके रुपमे बह्रल बटैलै । बालविवाहके कारण छोटहीम लर्का जलमलपाछे डाई ओ लर्कनहे समस्या पर्ना उहाँ बटैलै ।

विद्यार्थी ममता जैसि बालविवाह रोकेक लाग अभिभावक जागरुक हुई पर्ना बटैली । उहाँ कहली, पहिले आपन बालबालिका उप्पर केयर नैकर्ना पाछे विगरलपाछे एकफाल्े दवाव देना कारण बालबालिका गलत निर्णय लेटी आत्महत्या समेट कैना करल बटैली ।

वडा नम्बर ४ के वडा सदस्य हरिद्वारी चौधरी जनचेतना मुलक कार्यक्रम करके बालविवाह न्यूनिकरण करेसेक्ना बटैली । सम्वाद कार्यक्रमके सहजीकरण केर्नी मिडिया प्रालिके अध्यक्ष उन्नती चौधरी करल रहिट । कार्यक्रममे महिला स्वास्थ्य स्वयम सेविका, नागरिक समाजके अगुवा, भल्मन्सा, अभिभावक, यूवा संजालके प्रतिनिधिहकनके सहभागिता रहे ।