एकल महिलाहे कौनो धर्ममे विभेद कैना कहल नैहो
पहुरा समाचारदाता
धनगढी, ७ असार । एकल महिलाहे कौनोफे धर्ममे विभेद कैना बाट उल्लेख नैहुइल धार्मिक अगुवाहुक्रे बटैले बटै ।
मानव अधिकारका लागि महिला एकल महिला समुहके आयोजना तथा कुर्वे विष्ट्रोके सहयोगमे अँटवारके रोज धनगढीमे हुइल पितृ सत्तात्मक समाजमे एकल महिलाके अवस्था विषयमे धार्मिक तथा सामाजिक सहिष्णुता सम्बन्धी साझा सवाल कार्यक्रममे टमान धार्मिक अगुवाहुक्रे ओसिन बाट बत्वाइल रहिट ।
कार्यक्रममे मुस्लिम धर्मगुरु पप्पु कुरैसी इस्लाम धर्ममे महिलाहुकनहे विभेद नैकरल बल्की उच्च स्थानमे राखल बटैलै ।
हिन्दु धर्मलम्बी गुरु मंगलाशैनी मन्दिरके पुजारी, हिन्दु धर्मके ज्ञाता पदमराज जोशीफे महिलाके स्थान उच्च रहल बटैलै ।
ओस्टेक करके बौद्धधर्म गुरु कारसङ लामाफे एकल महिलाके कौनो विभेद नैरहल बटैलै ।
धनगढी उपमहानगपालिकाके नगर भल्मन्सा अध्यक्ष रोहितकुमार चौधरी थारु समुदायमे एकल महिलाहुकनके कौनो विभेद नैकरल बटैलै । बहस कार्यक्रमके सहजीकरण पत्रकार जयन्तराज भाट करल रहिट ।
बहस कार्यक्रममे थारु कल्याणकारिणी सभाके केन्द्रीय उपाध्यक्ष प्रभातकुमार चौधरी, ओरेक कैलालीके जिल्ला संयोजक गीता चौधरी, मानव अधिकारका लागि महिला एकल महिला समुहके प्रदेश अध्यक्ष भगवती हमाल, फेडाके सविना सुनार, महिला भल्मन्सा रमेशी चौधरीलगायत प्रश्न करल रहिट ।
मानव अधिकारका लागि महिला एकल महिला समुहके जिल्ला अध्यक्ष मीना भण्डारीके अध्यक्षतामे हुइल कार्यक्रमके संचालन समुहके प्रदेश कार्यक्रम अधिकृत वेद अवस्थी करल रहिट ।
