भूँइचालसे सुरक्षित रहक लाग कृत्रिम घट्ना अभ्यास
पहुरा समाचारदाता
धनगढी, ११ असार । कैलारी गाउँपालिकाके वडा नम्बर ९ स्थित श्री जनता मावि गदरियामे बिफेक रोज भुँइचाल सम्बन्धी कृत्रिम घटना अभ्यास करल बा ।
उक्त अभ्यासमे विद्यालयके शिक्षक, विद्यार्थीहे भुँइचालके समयमे सुरक्षित रहक लाग ओ क्षति न्यूनीकरण कैना आवश्यक ज्ञान तथा सीप प्रदान करल रहे साथे भुँइचाल सम्बन्धी कृत्रिम घटना अभ्यास करल हो ।
एमपीडिएस ओ यूनिसेफके सहकार्यमे हुइल उक्त अभ्यास कार्यक्रमके मुख्य उद्देश्य आपतकालीन अवस्थामे हालीसे हाली ओ सही प्रतिक्रिया डेहक लाग सक्षम बनैना, सुरक्षित रहना, निरन्तर सिकाईके लाग जनधनके क्षति कम कैना यकर साथे विद्यालयहे विपद्–तयारी ओ सुरक्षित रहक लाग सचेत बनैना रहल जनाइल बा ।
कुछ दिन आघे गाउँपालिकाके वडा नम्बर २ मे रहल श्री राष्ट्रिय मावि बिचैपुरके विद्यार्थीहे बारह्के जोखिमसे सुरक्षित रहन, आपतकालीन तयारी बह्रैना, सुरक्षित उद्धार तथा स्थानान्तरणके अभ्यास ओ जनधनके क्षति कम करक लाग बारह् सम्बन्धी कृत्रिम घटना अभ्यास कराइल एमपीडिएसके निरु चौधरी जानकारी डेली ।
