आरोही कार्यक्रम सुदूरपश्चिममा शुभारम्भः

मेन्टरशिप, सीप विकास ओ इकोसिस्टम सहयोगमार्फत महिला उद्यमशीलता प्रवद्र्धन

पहुरा समाचारदाता
धनगढी, १२ असार । महिला उद्यमीहुकनके क्षमता अभिवृद्धि, व्यवसाय विस्तार ओ दीर्घकालीन आर्थिक सशक्तीकरणहे प्रवद्र्धन कैना उद्देश्यसे एफसीए नेपालसे सञ्चालित “आरोहीः मेन्टरशिप, सीप ओ सहकार्य“ कार्यक्रम सुदूरपश्चिम प्रदेशमे औपचारिक रूपमे शुभारम्भ करल बा । फिनल्यान्डके वुमेन्स बैंक ओ परराष्ट्र मन्त्रालयके सहयोगमे सञ्चालित इ कार्यक्रम धनगढीस्थित रुबस होटलमे असार १० से १२ गतेसम आयोजना करल हो ।

नेपालमे महिला उद्यमीहुकनसे सामना कैना सामाजिक, आर्थिक ओ संरचनागत अवरोधहे सम्बोधन करटी व्यवसायिक वृद्धि ओ नेतृत्व विकासके अवसरहे सिर्जना कैना लक्ष्यसहित कार्यक्रम सञ्चालन करल हो । तीनदिने शुभारम्भ कार्यक्रमअन्तर्गत ३१ जाने महिला उद्यमी (मेन्टी), १६ जाने अनुभवी मेन्टर, विषयगत विज्ञ ओ उद्यमशीलता पारिस्थितिके तन्त्रके सरोकारवालाहुकनके सहभागिता रहल रहे ।

उद्घाटन सत्रहे सम्बोधन करटी उद्घाटन समारोहके प्रमुख अतिथि सुदूरपश्चिम प्रदेश सरकारके माननीय उद्योग, पर्यटन, वन ओ वातावरण मन्त्री मान बहादुर रावलसे महिला उद्यमशीलता प्रदेशके आर्थिक समृद्धि ओ रोजगारी सिर्जनाके महत्वपूर्ण आधार हुइल उल्लेख करल रहे । उहासे महिला उद्यमीहुकनहे सामना करटी रहल चुनौतीहे सम्बोधन कैना प्रदेश सरकार प्रतिबद्ध रहल बटैलै । उद्यम विकास, सीप अभिवृद्धि, बजार पहुँच ओ आवश्यक नीतिगत सहयोगमार्फत महिला उद्यमीहुकनके सशक्तीकरणमे सहकार्य कैना सरकार सदैव तयार रहल प्रतिबद्धता व्यक्त करल रहे । उहासे आरोहीजस्ते मेन्टरशिप ओ क्षमता विकास कार्यक्रमहे महिला उद्यमीहुकन आत्मविश्वास, नेतृत्व क्षमता ओ व्यवसायिक प्रतिस्पर्धात्मकता अभिवृद्धि कैना महत्वपूर्ण योगदान पुगैना विश्वास व्यक्त करल रहै ।

उद्घाटन सत्रहे सम्बोधन करटी एफसीए नेपालके राष्ट्रिय निर्देशक विद्यानाथ भुर्तेलसे महिला उद्यमीहुकनके लग अवसरहे बह्रटी हुइल फे पितृसत्तात्मक सोच, सीमित पहुँच ओ असमान सामाजिक संरचनासे अझै चुनौती सिर्जना करटी रहल उल्लेख करलै । उहासे आरोही कार्यक्रमसे महिला उद्यमीहुकन आत्मविश्वास, नेतृत्व क्षमता ओ व्यवसायिक प्रतिस्पर्धात्मकता विकास कैना आवश्यक सहयोग प्रदान कैना विश्वास व्यक्त करल रहै ।

कार्यक्रममे सुदूरपश्चिम प्रदेश महिला उद्यमी महासंघके अध्यक्ष मीना कुमारी फुलारा, अत्तरिया उद्योग वाणिज्य संघके अध्यक्ष कल्याण सिंह बोहरा, कैलाली उद्योग वाणिज्य संघके अध्यक्ष पुष्करराज ओझा, उद्योग वाणिज्य महासंघके अध्यक्ष पुष्प राज कुँवर ओ धनगढी उपमहानगरपालिकाके उपप्रमुख कन्दकला कुमारी राना विशिष्ट अतिथिके रूपमे सहभागी हुइल रहिट ।

हाँहुकनसे महिला उद्यमशीलता प्रवद्र्धनके लग मेन्टरशिप, संस्थागत सहकार्य ओ उद्यमशीलता पारिस्थितिकी तन्त्रसुदृढीकरणके आवश्यकता औँल्यइटी आरोही कार्यक्रमके सफल कार्यान्वयनके लग शुभकामना व्यक्त करल रहै ।
कार्यक्रमबारे जानकारी देहटी एफसीए नेपालके विषयगत विशेषज्ञ अष्ट प्रजापतिसे आरोही केवल एक प्रशिक्षण कार्यक्रम नैहुई महिला उद्यमशीलताके लग दीर्घकालीन सहयोग प्रणाली निर्माण कैना पहल हुइल बटैलै । उहाँके अनुसार कार्यक्रमसे मेन्टरशिप, प्राविधिक व्यवसायिक प्रशिक्षण ओ स्रोत ओ सञ्जाल निर्माणके अवसरहे एकीकृत करटी महिला उद्यमीहुकनहे व्यवसाय सञ्चालन ओ विस्तारके लग आवश्यक ज्ञान, सीप ओ सम्बन्धहे विकास कैना सहयोग करले बटै ।

कार्यक्रममे सहभागी ३१ जाने महिला उद्यमी (मेन्टी)हुकनसे उत्पादन करल विभिन्न वस्तु ओ सेवाहे मार्केटप्लेस शोकेस समेत आयोजना करल रहे । उक्त प्रदर्शनीसे सहभागी उद्यमीहुकनहे अपन उत्पादनहुकनके प्रवद्र्धन, अनुभव आदानप्रदान ओ सरोकारवालाहुकनसंग व्यवसायिक सञ्जाल विस्तार कैना महत्वपूर्ण अवसर प्रदान करल रहे ।
उद्घाटन समारोह अगाडी संचालित दुई दिने ‘व्यवसायके आधारशिला शसक्तिकरण ओ मेन्टरशिप सिनर्जी कार्यशालासे मेन्टर ओ मेन्टीबीच विश्वास, सहकार्य ओ साझा लक्ष्य निर्माणमे केन्द्रित अभ्यासहे समावेश करल रहे । सहभागीहुकनसे संरचित संवाद, अनुभव आदानप्रदान ओ लक्ष्य निर्धारण प्रक्रियामार्फत अपन साझेदारीके स्पष्ट कार्ययोजना तयार करल रहे । प्रत्येक मेन्टर–मेन्टी जोडीसे व्यवसायिक आकांक्षा, चुनौती, अपेक्षा ओ सिकाइके प्राथमिकताहे पहिचान करटी आगामी यात्राके लग साझा रोडम्याप निर्माण करल रहे ।

आरोही कार्यक्रमसे प्रारम्भिक कार्यशाला किल नैहुइना आगामी महिनाहे निरन्तर मेन्टरिङ, व्यवसायिक कोचिङ, प्राविधिक प्रशिक्षण, त्रैमासिक प्रगति समीक्षा ओ आवश्यकता आधारित विशेष सिकाइ सत्रहे समेटना बा । इहे महिला उद्यमीहुकनहे व्यवसाय विकासके विभिन्न चरणमे आवश्यक मार्गदर्शन ओ सहयोग उपलब्ध करल अपेक्षा करले बा ।

आरोही कार्यक्रमके पहिले चरण सफलतापूर्वक काठमाडौंमे सञ्चालन हुइल समापन कैसेकल बा, जहाँ सहभागी २७ महिला उद्यमीहुकनसे मेन्टरशिप, व्यवसायिक सीप विकास ओ सञ्जाल विस्तारके माध्यमसे उल्लेखनीय प्रगति हासिल करले बटै । हाल सुदूरपश्चिम प्रदेशमे दोस्रो चरणके शुभारम्भसँगे कार्यक्रमसे अपन प्रभाव क्षेत्र विस्तार करल बा । दोस्रो चरणके समापनपाछे नेपालके अ‍ैरे प्रदेशमे तेस्रो चरण सञ्चालन कैना योजना रहल बा ।

वुमेन्स बैंकके रणनीतिक सहयोग ओ एफसीए नेपालके कार्यान्वयन अनुभवसँगे, युएन विमेन नेपाल युवा उद्यमी मञ्च ओ महिला उद्यमी महासंघ नेपालके प्राविधिक सहकार्यमे सञ्चालन हुइल इ कार्यक्रमसे महिला नेतृत्व, आर्थिक सहभागिता ओ उद्यमशीलताके क्षेत्रमे मापनयोग्य परिवर्तन ल्यइना लक्ष्य राख्ले बा ।

आरोहीसे केवल व्यक्तिगत व्यवसायहुकनके वृद्धि किल नाइ, महिला उद्यमीहुकनके लग सहयोगी ओ समावेशी उद्यमशीलता वातावरण निर्माण करटी नेपालके आर्थिक विकासमे महिलाके अर्थपूर्ण सहभागिता सुनिश्चित कैना दीर्घकालीन दृष्टिकोणहे आघे बह्राइल बा ।