१३औं कमलरी मुक्ती दिवस मनागिल

पहुरा समाचारदाता
धनगढी, १४ असार । मुक्त कमलरीहुक्रे १३औं कमलरी मुक्ती दिवस शनिच्चरके रोज धनगढीमे मनैले बटै ।

मुक्तकमलरी विकास मञ्च कैलालीके आयोजना तथा बाल संरक्षण संस्था नेपाल कैलालीके सहयोगमे उ दिवस मनागिल हो । मञ्चके जिल्ला अध्यक्ष इन्द्रा चौधरीके अध्यक्षतामे मनागिल बा । कार्यक्रममे मुक्तकमलरीहुक्रे मुक्ती दिवस मनाईबेर राज्यसे मुक्त कमलरीहुकन हेर्ना दृष्टिकोणसे अपनेहुक्रे खुशी नैरहल बटैले बटै ।

मुक्त कमलरी विकास मञ्चके पूर्व केन्द्रिय अध्यक्ष तथा बाल संरक्षण संस्था नेपाल कैलालीके अध्यक्ष हिरामोती चौधरी मुक्तकमलरीहुक्रे दसताके जंजीरमे मुक्तीपाछे सक्कु परिचय पत्र नैपाइल ओ पाइल परिचयपत्रसे सेवा सुविधासे बञ्चित हुइल बटैली । उहाँ कहली, सरकार सक्कु मुक्त कमलरीनहे परिचयपत्र डेहे नैसेकल । जिहीजिही डेहल उ परिचयपत्रसेफ कहल सेवा सुविधा मिले नैसेकल ।

अपनेहुक्रे राज्यसे अपहेलित हुइल मने राज्य कमलरीनहे हेर्ना दृष्टिकोण कबु नैबडलल, सरकारहे दवाव डेहक लाग सक्कु मुक्तकमलरी एकजुट हुइना जरुरी रहल उहाँ बटैली । मुक्तकमलरीहुक्रे परिचयपत्रसे बञ्चित हुइल कहटी बाल संरक्षण संस्था नेपाल कैलाली एक चो फेरसे सक्कु मुक्तकमलरीनके तथ्यांक संकलन करटी रहलफे बटैली ।

मुक्त कमलरी तथा बाल संरक्षण संस्था नेपाल कैलालीके सहजकर्ता मनमति चौधरी मुक्तकमलरीनके नाउँमे और जाने फाइदा उठैटी रहल बटैली । उहाँ कहली, स्थानीय तहमे अनुदानके कार्यक्रम आई व्यानरफे मुक्तकमलरी उल्लेख कैना मने उ अनुदान और जनहनहे डेना करल बा । यी गलत हो, मुक्तकमलरीप्रति करल अन्याय हो । शिक्षामेफे मुक्तकमलरीनके कोटामे गैर मुक्तकमलरी फाइदा उठाइल उहाँ बटैली ।

कार्यक्रममे गैसस महासंघ कैलालीके सहसचिव अमिर राना हकअधिकारके लाग एकजुट हुके बह्रना आग्रह करलै । कार्यक्रममे बाल संरक्षण संस्था नेपाल कैलालीके उपाध्यक्ष रुपणी चौधरी, धनगढी उपमहानगरपालिका नगर अध्यक्ष सुनिता चौधरी, जिल्ला सदस्य मनिषा चौधरीलगायत मन्तव्य व्यक्त करल रहिट । कार्यक्रम संचालन जिल्ला सचिव सुस्मिता चौधरी करल रहिट । ओस्टेक करके दिवसके अवसरमे गुरही चोकमे दिप प्रज्वलन कैगिल रहे । कलेसे दिवसके अवसर पारके पाँच जाने मुक्तकमलरीहुकनहे खाद्ययन्न सहयोगफे कैगिल बा ।

नेपालके पश्चिमी जिल्ला विशेष करके दाङ बाँके, बर्दिया, कैलाली ओ कञ्चनपुरमे व्याप्त रहल कमलरी प्रथाके मानव अधिकारके क्षेत्रमे क्रियाशील टमान नागरिक अगुवा तथा संघ संस्था समेतके संयुक्त तथा निरन्तर अभियान ओ दवावके परिणामस्वरुप कमलरी प्रथाहे नेपाल सरकारसे यिहीहे अवैध घोषणा करटी १३ असार २०७० मे कमलरी मुक्त घोषणा करल रहे । नेपाल सरकार ओ कमलरी प्रथा उन्मुलनके लाग संयुक्त संघर्ष समिति विच २०७० जेठ २४ गते हुइल १० बुँदे सहमति करल रहे । जौन आज १३ बरस पुरा हुइल बा ।

कमलरी प्रथा उन्मूलनके लाग संयुक्त संघर्ष समिति ओ नेपाल सरकारवीच हुइल सम्झौताके पाँच नम्बर बुँदामे मुक्त कमलरीके हकहितके साथे विद्यमान कमलरी छात्रवृत्रिके रकम बृद्धिके लाग विद्यमान शिक्षा निर्देशिका संशोधन कैना कहल रहे मने कार्यान्वयन नइहुइलपाछे विद्यालय, क्याम्पसमे अध्ययनरत मुक्तकमलरी छात्रवृति अपुग हुइल कारण विद्यालय छोरना बटै ।
एसइइ पास करुइया रकम अभावमे अवसर नहुइल ओरसे प्राविधिक शिक्षाके पखाईमे बैठल बटै, विद्यालय शिक्षासे बन्चित हुके बालविवाहके शिकार, रोजगारीके अभावमे गोसिया तथा परिवारसे बहिष्कारण परके घरवार विहिन, आत्महत्या कैना अवस्था आइल बा । छात्रावासमे बसोवास करके अध्ययनरत अभिभावक तथा घरवार एवं सहारा विहिन मुक्तकमलरी खैना बैठना, शिक्षा, स्वास्थ्य तथा सुरक्षाके अभावमे तडपी रहल बटै । संबिधानके मौलिक हकमे आर्थिक रुपसे विपन्न नागरिकहे कानून बमोजिम निःशुल्क उच्च शिक्षाके हकके प्रत्याभूति करल बा ।

एकओर बालवालिकाहुकनहे श्रममे लगाई नइपैना कानूनी व्यवस्था रहटी रहटी कानून विपरित कमलरी रख्न कार्य औपचारिकरुपमे अन्त्यके घोषणा करल हुइलेसेफे अभिनफे बालवालिकाहे श्रममे लगैना कार्य निरन्तर रहल बा । कलेसे दुसर ओर मुक्त कमलरीके लाग उच्च शिक्षासमके पहुँचके लाग विद्यमान कानून कार्यान्वयनमे तीन तहके सरकारवीचमे आवश्यक समन्वय हुई नइसेक्के हाल कुछ छात्रावासमे अध्ययनरत मुक्त कमलरी ओ विशेष करके अपन परिवार, आवासविहिन मुक्त कमलरीहुकनके उच्च शिक्षा लगायत आवास तथा जिविकोपार्जनके अधिकार खोस्ना अवस्थामे पुगल बा । मुक्तकमलरीहुक्रे परिचयपत्र नइपाइल कारण उच्च शिक्षा, रोजगार, सरकारसे पैना टमान सेवा सुविधासे बन्चित हुइल बटै ।