धानबालीक लाग आवश्यक मल सहज रुपमे उपलब्ध हुई ः मन्त्री चौधरी
पहुरा समाचारदाता
काठमाडौं, २३ असार । कृषि, वन तथा पर्यावरणमन्त्री गीता चौधरी धानबालीके लाग आवश्यक मल सहज रुपमे उपलब्ध हुइना दाबी करले बटी ।
मंगरके रोज राष्ट्रिय सभा बैठकमे अपन मन्त्रालयके विनियोजन शिर्षकउप्परके छलफलके क्रममे सांसदहुक्रे उठाइल प्रश्नके जवाफ डेना क्रममे उहाँ धानबालीके आवश्यक मलके व्यवस्था करल स्पष्ट परली ।
‘हाल ९५ हजार मेट्रिक टन मल मौज्दात बा । ओ जीटूजीमार्फत थप ५० हजार मेट्रिक टन हाली आपूर्ति हुइना क्रममे रहल बा । यैसिक धान सिजनके लाग आवश्यक मल सहज रुपमे उपलब्ध हुइना डेखजाइठ,’ मन्त्री चौधरी कहली, ‘मल आपूर्तिके लाग बजेट अभाव हुई नैडेना अर्थ मन्त्रालयसे आवश्यक परल खण्डमे थप बजेट उपलब्ध हुइना प्रतिवद्धता हुइल व्यहोरा माननीय सदस्यहुकनहे जानकारी करैना चाहठु ।’
मलके अभाव हुई नैडेहक लाग सम्बन्धित संघीय ओ प्रादेशिक मन्त्रालयमे गुनासो सुनुवाईके लाग सम्पर्क व्यक्तिके व्यवस्था करलेसेफे जानकारी डेली ।
मन्त्री चौधरी मलके लाग बजेटके अभाव हुई नैडेना आश्वासन अर्थ मन्त्रालयस डेहलफे बटैली ।
‘अइना आर्थिक वर्षके मल आपूर्ति तथा व्यवस्थापनके कार्य योजना समेत तयार हुसेकल जानकारी कराइटु । रसायनिक मलके वितरण तथा उपलब्धताके गुनासो सुनेक लाग संघीय मन्त्रालय, प्रादेशिक मन्त्रालयमे गुनासो सुन्न सम्पर्क व्यक्तिके व्यवस्था करल बा,’ उहाँ कहली ।
